Vakiteny voalohany

Boky mitantara ny Asan’ny Apôstôly (Asa 20, 28-38)

Ankiniko amin’Andriamanitra ianareo, dia amin’Ilay mahay mandavorary sy manome lova anareo.

Tamin’izany andro izany,
i Paoly niteny tamin’ireo Pretran’ny Fiangonana tany Efezy nanao hoe:

“Tandremo ny tenanareo sy ny ondry rehetra, nanendren’ny Fanahy Masina anareo ho mpitandrina
mba hifehezanareo ny Eglizin’ny Tompo izay novidiny tamin’ny Rany.
Fantatro fa rahefa lasa aho, dia hisy amboadia masiaka hiditra eo aminareo,
izay tsy hitsitsy ny ondry.
Ary ny sasany aminareo aza dia hitsangana hampianatra hevi-diso,
ka hitaona ny mpianatra hanaraka azy.
Koa miambena re, ary tsarovy lahy
fa telo taona maninjitra anie aho no tsy nitsahatra andro aman’alina
nananatra anareo tsirairay avy tamin-dranomaso!
Ary ankehitriny,
ankiniko amin’Andriamanitra sy amin’ny tenim-pahasoavany ianareo,
dia amin’Ilay mahay mandavorary sy manome lova anareo miaraka amin’izay efa masina rehetra.
Tsy mba naniry izay volafotsy, na volamena, na fitafian’olona aho.
Fantatrareo fa ireto tanana ireto no nahazoako izay rehetra nilaiko
sy nilain’izay rehetra niaraka tamiko.
Nasehoko anareo tamin’ny zavatra rehetra
fa tsy maintsy hiasa toy izany koa ianareo mba hanampiana ny mahantra,
ka hahatsiaro ny tenin’i Jesoa Tompo manao hoe:
Mahasambatra kokoa ny manome noho ny mandray.”

Nony avy nilaza izany izy,
dia nandohalika ka niara-nivavaka tamin’izy rehetra.
Ary nitomany mafy izy rehetra sy namihina ny vozon’i Paoly ary nanoroka azy,
fa nalahelo loatra izy,
indrindra ange fa tamin’ny nilazany hoe:

“Tsy hahita ny tarehiko intsony ianareo.”

Dia nanatitra azy hatreny an-tsambo izy ireo.

— Izany àry ny tenin’ny Tompo.

Setriny

Salamo 67, 29-30. 33-35a. 35b-36d

Ry mpanjakan’ny tany, antsao ny Tompo.

Andriamanitra ô! omeo baiko ny herinao!
Hamafiso ny efa vitanao ho anay!
Avy any an-tempolinao any Jerosalema
no hanasinan’ny Mpanjaka Anao.

Ry mpanjakan’ny tany, ataovy ny hira!
Ianareo andriamanitra, aoka hiantsa ny Tompo;
dia Ilay mpitaingina ambony kalesy
any an-tampon’ny lanitra fahagola!
Injay Izy mamoaka feo dia ilay feony mahery:
aoka hidera Azy ianareo andriamanitra!

Ao amin’i Israely ny fiandrianany;
ao anaty rahona ny heriny!
Mahatahotra Andriamanitra any an-toerany masina:
dia Ilay Andriamanitrao, ry Israely.
Ilay manome hery sy tanjaka anao,
ry ilay vahoaka tahin’Andriamanitra.

Evanjely

Aleloia. Aleloia.

Ny Fanahy Masina no hampianatra anareo ny zavatra rehetra, hoy ny Tompo, sy hampahatsiaro anareo ny zavatra rehetra nolazaiko taminareo.

Aleloia.

Evanjely Masina nosoratan’i Masindahy Joany (Jo. 17, 11b-19)

Ho iray tahaka Antsika anie izy ireo.

Tamin’izany andro izany i Jesoa
niandrandra ny lanitra ka nivavaka hoe:

“Ray masina ô,
tahirizo amin’ny Anaranao ireo izay nomenao Ahy,
mba ho iray tahaka antsika izy.
Raha mbola teo amin’izy ireo Aho,
dia nitahiry azy tamin’ny Anaranao.
Eny, nitahiry izay nomenao Ahy Aho,
ka tsy nisy very izy na dia iray aza,
afa-tsy ilay zanaky ny fahaverezana
mba ho tanteraka ny Soratra Masina.
Ankehitriny mankany aminao Aho,
ka manao izany fangatahana izany dieny mbola amin’izao tontolo izao,
mba hananan’izy ireo ny fifaliako tanteraka ao aminy.
Nomeko azy ny teninao ka halan’izao tontolo izao izy ireo,
satria tahaka ny tsy maha-olon’izao tontolo izao Ahy
no tsy maha-olon’izao tontolo izao azy koa.
Tsy ny hanesoranao azy amin’izao tontolo izao no angatahiko,
fa ny hiarovanao azy amin’ny ratsy.
Tahaka ny tsy maha-olon’izao tontolo izao Ahy
no tsy maha-olon’izao tontolo izao azy ireo koa.
Ankamasino amin’ny fahamarinana izy ireo.
Ny teninao no fahamarinana.
Tahaka ny nanirahanao Ahy ho ao amin’izao tontolo izao
no nanirahako azy ho ao amin’izao tontolo izao koa.
Manamasina ny tenako ho azy ireo Aho,
mba hohamasinina amin’ny fahamarinana koa izy.”

— Izany àry ny tenin’ny Tompo.

Vakiteny voalohany

Boky mitantara ny Asan’ny Apôstôly (Asa 20, 17-27)

Tanterahiko ny diako ka vitaiko ny raharaha noraisiko tamin’i Jesoa Tompo.

Tamin’izany andro izany, raha mbola tany Mileto i Paoly,
dia naniraka hankany Efezy, nampaka an’ireo Pretran’ny Fiangonana.
Ka nony tafavory teo aminy izy ireo, dia hoy izy taminy:

“Fantatrareo hatramin’ny andro voalohany nahatongavako teto Azia
izay toetry ny fitondran-tenako taminareo hatrany hatrany;
fa nanompo ny Tompo tamim-panetren-tena lehibe sy tamin-dranomaso aho,
ary tamim-piaretana ny fahoriana noho ny nikendren’ny Jody ahy.
Tsy nisy nafeniko izay nahasoa anareo,
fa notorìko taminareo sy nampianariko anareo ampahibemaso sy isan-trano.
Nambarako tamin’ny Jody sy tamin’ny Jentily ny fanatonana an’Andriamanitra
amin’ny fibebahana sy ny finoana an’i Jesoa Tompontsika.
Ary ankehitriny, indro teren’ny Fanahy hankany Jerosalema aho;
nefa tsy fantatra izay hanjo ahy any.
Izao ihany no ambaran’ny Fanahy Masina amiko:
Isan-tanàna alehako, dia misy famatorana sy fanenjehana miandry ahy.
Tsy misy atahorako anefa izany zavatra izany;
ary tsy ataoko ho zavatra ny aiko rahefa tanteraka ny diako,
ka vitako ny raharaha noraisiko tamin’i Jesoa Tompo,
dia ny mitory ny Evanjelin’ny fahasoavan’Andriamanitra.
Eny iky, ry olona nalehako nitoriako ny fanjakan’Andriamanitra!
fantatro fa tsy hahita ny tarehiko intsony ianareo rehetra.
Koa izany no ilazako aminareo anie, fa afa-tsiny amin’ny ranareo rehetra aho,
satria efa nambarako avokoa fa tsy nisy nafeniko taminareo
ny sitra-pon’Andriamanitra rehetra.”

— Izany àry ny tenin’ny Tompo.

Setriny

Salamo 67, 10-11. 20-21

Ry mpanjakan’ny tany, antsao ny Tompo.

Orana izaitratra no nabosasakao:
ka velombelona terý ny lovanao efa trotraka.
Ny fiantranao ny ory, ry Andriamanitra,
manomana fonenana ho an’ny ondrinao.

Isaorana ny Tompo isan’andro isan’andro;
ilay Andriamanitra Mpamonjy mitrotro antsika,
Andriamanitra mahavonjy, Andriamanitsika;
Tompo mahala amin’ny fahafatesana.

Evanjely

Aleloia. Aleloia.

Mangataka amin’ny Ray Aho, hoy ny Tompo, ka homeny Mpanafaka alahelo hafa ianareo, izay ho eo aminareo mandrakariva.

Aleloia.

Evanjely Masina nosoratan’i Masindahy Joany (Jo. 17, 1-11)

Raiko ô, omeo voninahitra ny Zanakao.

Tamin’izany andro izany,
i Jesoa niandrandra ny lanitra ka nivavaka nanao hoe:

“Raiko ô, tonga ny fotoana: omeo voninahitra ny Zanakao,
mba hanomezan’ny Zanaka voninahitra Anao,
fa efa nomenao fahefana amin’ny nofo rehetra Izy,
mba hanomezany ny fiainana mandrakizay an’izay rehetra nomenao Azy.
Ary izao no fiainana mandrakizay,
dia ny mahalala Anao hany Andriamanitra marina sy i Jesoa Kristy izay nirahinao.
Nanome voninahitra Anao Aho tety ambonin’ny tany,
fa tanterako ny asa nomenao Ahy hataoko.
Ary ankehitriny kosa dia Anao, Raiko ô,
ny manome voninahitra Ahy eo aminao,
dia ny voninahitra ananako tao aminao talohan’ny nahariana izao tontolo izao.
Nitory ny Anaranao tamin’ny olona nomenao Ahy eo amin’izao tontolo izao Aho;
Anao izy ireo, ka nomenao Ahy, ary efa nitandrina ny teninao izy.
Fantany ankehitriny fa avy aminao ny zavatra rehetra nomenao Ahy;
satria nomeko azy ny teny nomenao Ahy ka noraisiny;
dia fantany marina fa avy aminao Aho,
ary ninoany tokoa fa Ianao no naniraka Ahy.
Mangataka ho azy ireo Aho.
Tsy mangataka ho an’izao tontolo izao Aho,
fa ho an’izay nomenao Ahy, satria Anao izy ireo (fa Anao izay Ahy rehetra),
ary nahazo voninahitra amin’izy ireo Aho.
Tsy ho eto amin’izao tontolo izao intsony Aho,
izy ireo no ho eto amin’izao tontolo izao,
fa Izaho kosa ho any aminao.”

— Izany àry ny tenin’ny Tompo.

Vakiteny voalohany

Boky mitantara ny Asan’ny Apôstôly (Asa 19, 1-8)

Efa nandray ny Fanahy Masina va ianareo fony vao nino?

Raha mbola tany Kôrinto i Apôlô,
i Paoly kosa tonga tany Efezy rahefa nitety faritany ambony tany Azia.
Nony nahita mpianatra sasany teo izy, dia nanao taminy hoe:

“Efa nandray ny Fanahy Masina va ianareo fony vao nino?”

Fa hoy izy ireo taminy:

“Tsy mbola nandre akory aza izahay fa hoe misy Fanahy Masina.”

Ary hoy izy:

“Batemin’iza no noraisinareo?”

Hoy ireo:

“Batemin’i Joany.”

Dia hoy i Paoly:

“Batemim-pibebahana no nomen’i Joany
fa Ilay ho avy ao aoriany,
izany hoe, i Jesoa no nambarany ho tsy maintsy hinoan’ny vahoaka.”

Nony nahare izany izy ireo,
dia nangataka hatao batemy amin’ny anaran’i Jesoa Tompo;
ary rahefa nametrahan’i Paoly tanana indray,
dia nidinan’ny Fanahy Masina, ka niteny fiteny samihafa sady naminany;
tokony ho roa ambin’ny folo lahy izy rehetra.
Nony afaka izany, dia niditra tao amin’ny sinagôga i Paoly,
ka niteny tamin-kasahiana,
ary nampianatra telo volana nilazalaza ny momba ny fanjakan’Andriamanitra
tamin’ny lahateny mandaitra.

— Izany àry ny tenin’ny Tompo.

Setriny

Salamo 67, 2-3. 4-5ad. 6-7ab

Ry mpanjakan’ny tany, antsao ny Tompo.

Vao mitsangana Andriamanitra,
dia mihahaka ny fahavalony;
mandositra eo anoloany ny mpankahala;
toy ny fielin’ny setroka ny fieliny.
Toy ny savoka mitsonika manoloana ny afo,
ny olon-dratsy mikoa manoloana an’Andriamanitra.

Ny olo-marina kosa, manoloana an’Andriamanitra,
mifaly, miravo sy mirobiroby!
Mihirà, ho an’Andriamanitra, mankalazà ny Anarany.
Tompo no Anarany, mifalia eo anatrehany!

Fa Rain’ny kamboty Izy, mpanome rariny ny mpananotena,
Andriamanitra, ao amin’ny Toerany Masina,
mampitoetra an-trano ny tokan-tena,
mamoaka ny babo voagadra.

Evanjely

Aleloia. Aleloia.

Mandehana, mampianara ny firenena rehetra. Indro Aho eo aminareo ambara-pahatapitr’izao tontolo izao.

Aleloia.

Evanjely Masina nosoratan’i Masindahy Joany (Jo. 16, 29-33)

Matokia, efa nandresy an’izao tontolo izao Aho.

Tamin’izany andro izany, ny mpianatr’i Jesoa nanao taminy hoe:

“Indro milaza tsotra Ianao ankehitriny, fa tsy manao fanoharana akory.
Fantatray amin’izao fa mahalala ny zavatra rehetra Ianao,
ka tsy mila hanontanian’olona:
izany no inoanay fa avy amin’Andriamanitra Ianao.”

I Jesoa namaly azy hoe:

“Mino ange ianareo ankehitriny?
Indro avy ny andro, na efa tonga sahady aza,
izay hielezanareo samy ho any amin’izay halehany avy,
sy handaozanareo Ahy ho irery;
nefa tsy irery Aho tsy akory, fa ato amiko ny Ray.
Izaho no nilaza izany taminareo,
dia ny mba hanananareo fiadanana amiko.
Hozoim-pahoriana ianareo eto amin’izao tontolo izao;
fa matokia, efa nandresy an’izao tontolo izao Aho.”

— Izany àry ny tenin’ny Tompo.

Vakiteny voalohany

Boky mitantara ny Asan’ny Apôstôly (Asa 1, 15-17)

Aoka hisy anankiray ho namantsika mba ho vavolombelon’ny nitsanganany ho velona.

Tamin’izany andro izany,
dia nitsangana teo afovoan’ireo havana iray finoana i Piera
(tokony ho roapolo amby zato no isan’izay nivory teo) ka nanao hoe:

“Ry kristianina havana,
tsy maintsy tanteraka ilay Soratra voalazan’ny Fanahy Masina tamin’ny vavan’i Davida
momba an’i Jodasy, izay nitarika ny mpisambotra an’i Jesoa;
fa anisantsika koa izy,
sady nanana anjara tamin’izao fandraharahantsika izao.
Ary izany indrindra no voasoratra ao amin’ny bokin’ny Salamo hoe:
‘Aoka ho lasan’olon-kafa ny anjara raharahany’.
Koa amin’ireo lehilahy niaraka tamintsika
tamin’ny andro rehetra nitoeran’i Jesoa Tompo teto amintsika,
hatramin’ny nanaovan’i Joany batemy Azy ka hatramin’ny andro niakarany any an-danitra,
dia aoka hisy anankiray ho namantsika,
mba ho vavolombelon’ny nitsanganany ho velona”.

Dia nanokana roa lahy tamin’izy ireo izy
dia i Jôsefa atao hoe Barsabasy sy nampiana anarana hoe ilay Marina,
ary i Matiasy,
ka nivavaka nanao hoe:

“Tompo ô,
Ianao no mahalala ny fon’ny olona rehetra,
ka asehoy izay voafidinao amin’izy roa lahy ireto,
mba hanana anjara amin’izao fandraharahan’ny Apôstôly izao,
izay nialan’i Jodasy hankanesany any amin’ny fitoerany”.

Dia nanaovany loka izy roa lahy,
ary i Matiasy no nahazo ny loka,
ka izy no lany ho isan’ny Apôstôly roa ambin’ny folo lahy.

— Izany àry ny tenin’ny Tompo.

Salamo fandinihana

Sal. 102, 1-2. 11-12. 19-20

Naoriny any an-danitra ny fiketrahany.

Isaory ny Tompo, ry fanahiko;
ny Anarany masina, ry ato anatiko rehetra!
Isaory ny Tompo, ry fanahiko
ny soa avy aminy aza misy hadinoina.

Tahaka ny lanitra mambomba ny tany
ny fitiavany mambomba ny matahotra Azy.
Tahaka ny atsinanana lavitry ny andrefana,
ny hadisoantsika halaviriny amintsika.

Naoriny any an-danitra ny fiketrahany,
mifehy ny tontolo ny Fanjakany.
Misaora ny Tompo, ianareo Anjeliny
izay feno hery hankatò ny didiny.

Vakiteny faharoa

Taratasy voalohan’i Masindahy Joany Apôstôly (1 Jo. 4, 11-16)

Izay mitoetra ao amin’ny fitiavana, dia mitoetra ao amin’Andriamanitra, ary Andriamanitra ao aminy.

Ry hava-malala,
efa notiavin’Andriamanitra fatratra isika ka tokony mba hifankatia koa.
Tsy mbola nisy olona nahita an’Andriamanitra na oviana na oviana.
Fa raha mifankatia isika dia mitoetra ao amintsika Andriamanitra,
ary lavorary ao amintsika ny fitiavana Azy.
Ny fananantsika ny Fanahiny no ahafantarantsika
fa mitoetra ao aminy isika, ary Izy ao amintsika.
Ary efa nahita izahay,
ka manambara fa naniraka ny Zanany ho Mpamonjy an’izao tontolo izao ny Ray.
Na iza na iza hanaiky an’i Jesoa ho Zanak’Andriamanitra,
dia mitoetra ao aminy Andriamanitra, ary izy ao amin’Andriamanitra.
Ary izahay efa nahalala sy nino ny fitiavan’Andriamanitra antsika.
Andriamanitra dia fitiavana;
koa izay mitoetra ao amin’ny fitiavana dia mitoetra ao amin’Andriamanitra
ary Andriamanitra ao aminy.

— Izany àry ny tenin’ny Tompo.

Evanjely

Aleloia. Aleloia.

Tsy havelako ho kamboty ianareo, hoy ny Tompo, fa handeha Aho, ary ho avy eo aminareo indray, ka ho faly ny fonareo.

Aleloia.

Evanjely Masina nosoratan’i Masindahy Joany (Jo. 17, 11b-19)

Ho iray tahaka Antsika anie izy ireo.

Tamin’izany andro izany dia niandrandra ny lanitra i Jesoa ka nivavaka hoe:

“Ray masina ô,
tahirizo amin’ny Anaranao izay nomenao Ahy,
mba ho iray tahaka Antsika izy.
Raha mbola teo amin’izy ireo Aho, dia nitahiry azy tamin’ny Anaranao.
Eny, nitahiry izay nomenao Ahy Aho,
ka tsy nisy very izy na dia iray aza, afa-tsy ilay zanaky ny fahaverezana,
mba ho tanteraka ny Soratra Masina.
Ankehitriny mankany aminao Aho,
ka manao izany fangatahana izany dieny mbola amin’izao tontolo izao,
mba hananan’izy ireo ny fifaliako tanteraka ao aminy.
Nomeko azy ny teninao, ka halan’izao tontolo izao izy ireo,
satria tahaka ny tsy maha-olon’izao tontolo izao Ahy
no tsy mahaolon’izao tontolo izao azy koa.
Tsy ny hanesoranao azy amin’izao tontolo izao no angatahiko,
fa ny hiarovanao azy amin’ny Ratsy.
Tahaka ny tsy maha-olon’izao tontolo izao Ahy
no tsy maha-olon’izao tontolo izao azy ireo koa.
Ankamasino amin’ny fahamarinana izy ireo.
Ny teninao no fahamarinana.
Tahaka ny nanirahanao Ahy ho ao amin’izao tontolo izao
no nanirahako azy ho ao amin’izao tontolo izao koa.
Manamasina ny tenako ho azy ireo Aho,
mba hohamasinina amin’ny fahamarinana koa izy”.

— Izany àry ny tenin’ny Tompo.