- Eto izao ianao :
-
Fandraisana
-
Pastôraly
-
Kintan'ny finoana
- All languages
- Atolotr'i Ramamonjisoa Rivo Alain
- Lohahevitra : Vaovao
♦ Fihaonana roa samy hafa androany, no nataon'ny Birao Maharitry ny Fivondronamben'ny Evekan'i Madagasikara, izay mamita iraka any Vatican... ♦ Samy nanao fihantsiana sy fanaratsiana tamin'ny tambazotran-tserasera, ireo mpanohana ny ankamaroan'ireo kandidà, hoy ny Justice et Paix androany, raha nanao tatitra savaranonando tamin'ny fanaraha-maso ny fifidianana... ♦ Tsy tompon'andraikitra tamin'ny fihetsika sy ny fampiasana fiaram-panjakana nataon'ilay tale teo aloha, maty teny Andohanimandroseza omaly, ny INSTAT, araka ny fampahafantarana nataony...
- Atolotr'i Solonomenjanahary Hermann
- Lohahevitra : Tenin'ny Tompo
-
Voadika amin'ny fiteny :
24 nôvambra 2023 — Zoma, Herinandro Tsotra fahatelo amby telopolo Mandavantaona — Ankalazao ny Tompo, ry Jerosalema. Izy Ilay mandefa ny didiny eto an-tany — Evanjely Masina nosoratan’i Masindahy Lioka (Lk. 19, 45-48)
- Atolotr'i Ranaivomanantsoa Harilanto
- Lohahevitra : Tsotra Mandavantaona
-
Voadika amin'ny fiteny :
Vakiteny voalohany
Boky voalohan’i Makabeo (1 Makab. 4, 36-37. 52-59)
Nitokanana ny ôtely, ary an-kafaliana no nanaterana ny sorona dorana.
Tamin’izany andro izany,
hoy i Jodasa sy ireo rahalahiny:
“Efa resy itý ny fahavalontsika,
ka ndeha amin’izao hiakatra hanadio ny tempoly sy hitokana azy indray.”
Dia nivory ny tafika manontolo,
ka niakatra ho any an-tendrombohitra Siôna.
Dia nifoha maraina koa izy,
tamin’ny andro fahadimy amby roapolon’ny volana fahasivy,
izay volana atao hoe Kasleo,
tamin’ny taona fahavalo amby efapolo amby zato,
ka nanatitra sorona,
araka ny lalàna teo ambonin’ny ôtelin-tsorona dorana vaovao izay narafiny.
Tamin’ny volana sy ny andro nandotoan’ny firenena ny ôtely indrindra
no nanamasinana azy indray, tamin’ny hiran’ny salamo,
sy tamin’ny feon’ny harpa aman-dokanga sy kipantsona.
Indray nihohoka ny vahoaka dia nitsaoka sy niandrandra ny lanitra,
nisaotra an’Ilay nanambina azy.
Naharitra valo andro no nanaovany ny fitokanana ny ôtely,
ary an-kafaliana no nanaterany ny sorona dorana
sy ny sorom-pisaorana amam-piderana.
Noravahany fehiloha aman’ampinga be renty ny anoloan’ny tempoly,
namboariny koa ny fidirana amin’ny tempoly sy ny efi-trano
sady nasiany varavarana.
Nisy fifaliana lehibe indrindra teo amin’ny vahoaka
ka afaka ny fahafaham-baraka nafitsoky ny firenena.
Ary i Jodasa nifanara-kevitra tamin’ireo rahalahiny
mbamin’ny fiangonan’i Israely rehetra,
dia nandidy ny hankalazana ireo andro nitokanana ny ôtely,
amim-pifaliana sy firavoravoana mandritra ny havaloana isan-taona
miantomboka amin’ny fahadimy amby roapolon’ny volana Kasleo.
— Izany àry ny tenin’ny Tompo.
Setriny
Salamo: 1 Tant. 29, 10-11a. 11bde. 12
Midera ny Anaranao be voninahitra izahay, ry Tompo.
Isaorana ianao, ry Tompo Andriamanitr’i Israely Razanay:
hatramin’ny mandrakizay ka ho mandrakizay!
Anao, ry Tompo, ny halehibiazana sy hery,
sy hamirapiratana, fahamendrehana sy fiandrianana.
Anao ny zava-drehetra:
na ny any an-danitra na ny eto an-tany!
Anao, ry Tompo, ny fanjakana,
sy ny fisandratana ho lohan’ny zava-drehetra!
Ny harena, ny voninahitra dia avy aminao!
Ianao no mifehy ny zava-drehetra!
An-tananao ny hery sy ny tanjaka!
Ny tananao no mahalehibe sy mahamafy ny rehetra!
Evanjely
Aleloia. Aleloia.
Ankalazao ny Tompo, ry Jerosalema. Izy Ilay mandefa ny didiny eto an-tany.
Aleioia.
Evanjely Masina nosoratan’i Masindahy Lioka (Lk. 19, 45-48)
Ataonareo zohin’ny mpangalatra ny tranon’Andriamanitra.
Tamin’izany andro izany,
niditra tao an-tempoly i Jesoa,
dia nandroaka ny mpivarotra sy ny mpividy tao,
ka nanao taminy hoe:
“Efa voasoratra,
fa ny tranoko dia trano fivavahana,
nefa ianareo kosa nanao azy ho zohin’ny mpangalatra.”
Dia nampianatra isan’andro tao an-tempoly Izy;
fa ny lehiben’ny mpisorona sy ny mpanora-dalàna ary ny loholona kosa
nitady hahafaty Azy;
nefa tsy hitan’izy ireo izay hevitra hoenti-manao izany,
satria faly sy ravo nihaino Azy ny vahoaka rehetra.
— Izany àry ny tenin’ny Tompo.
- Atolotr'i Solonomenjanahary Hermann
- Lohahevitra : Tenin'ny Tompo
-
Voadika amin'ny fiteny :
23 nôvambra 2023 — Alakamisy, Herinandro Tsotra fahatelo amby telopolo Mandavantaona — Andriamanitra no nampihavana an’izao tontolo izao indray tamin’ny alalan’i Kristy sy nametraka indray ny teny fampanantenana tamintsika — Evanjely Masina nosoratan’i Masindahy Lioka (Lk. 19, 41-44)
- Atolotr'i Ranaivomanantsoa Harilanto
- Lohahevitra : Tsotra Mandavantaona
-
Voadika amin'ny fiteny :
Vakiteny voalohany
Boky voalohan’i Makabeo (1 Makab. 2, 15-29)
Hanaraka ny faneken’ny razanay izahay.
Tamin’izany andro izany,
dia tonga tao Môdìna handahatra fanaovan-tsorona ireo manam-boninahitry ny mpanjaka,
nomena raharaha hanery ny olona hivadika.
Israelita maro be no nomba azy ireo;
ary i Matatiasa sy ireo zanany dia nivory ihany koa.
Niteny tamin’i Matatiasa ireo irak’i Antiôkosa, ka hoy izy taminy:
“Ianao eto an-tanàna no lohany indrindra voahaja sy mahamena-maso
mihoatra noho ny sisa rehetra ary maro zanaka aman-drahalahy.
Koa ianao no aoka hanatona voalohany,
hanatanteraka ny didin’ny mpanjaka toraky ny efa nataon’ny firenena rehetra,
sy ny lehilahy amin’i Jodà,
mbamin’ireo tafajanona any Jerosalema,
dia ho anisan’ny sakaizan’ny mpanjaka avokoa ianao sy ny ankohonanao,
samy hahazo firavaka volamena amam-bolafotsy
sy fanomezana maro ianao mbamin’ireo zanakao.”
Ary i Matatiasa namaly niteny tamim-peo avo nanao hoe:
“Na dia hanaiky an’i Antiôkosa avokoa aza
ny firenena rehetra anatin’ny fanjakany,
ka samy hahafoy ny fombam-pivavahan’ny razany,
sy hanaraka an-tsitrapo ny didiny,
izaho sy ireo zanako aman-drahalahiko kosa hanaraka ny faneken’ny razanay.
Sanatria anay ny hanary ny lalàn’Andriamanitra amam-pitsipiny!
Tsy hanaiky ny didin’ny mpanjaka izahay,
ka hiala amin’ny fombam-pivavahana,
na ho amin’ny ankavanana na ho amin’ny ankavia.”
Vao tapitra izay teniny izay,
dia nisy Jody anankiray nandroso teo imason’ny olona rehetra teo hanao sorona,
araka ny didin’ny mpanjaka,
teo amin’ny ôtely natsangana tao Môdìna.
Nony nahita izany i Matatiasa, dia tezitra sady niontana ny fony;
navelany hisondrotra araka ny lalàna ny hatezerany,
ka niantoraka namono an-dralehilahy teo amin’ny ôtely izy.
Novonoiny niaraka tamin’izay koa ilay manamboninahitry ny mpanjaka,
nanery hanao sorona, sady nazerany ny ôtely.
Toy izany no nirehetan’ny zotom-pony hiaro ny lalàna,
toy ny nataon’i Finea izay namono an’i Zambrì, zanak’i Salôma.
Dia nandeha eran’ny tanàna i Matatiasa, niantso tamim-peo avo hoe:
“Izay rehetra manam-pahazotoana hiaro ny lalàna sy mitana ny fanekena,
samia mivoaka sy manaraka ahy avokoa.”
Izay izy mbamin’ireo zanany,
dia nandositra nankany an-tendrombohitra;
nilaozany izay rehetra nananany tao an-tanàna.
Nisy Jody maro be koa,
izay nikatsaka ny fahamarinana sy ny lalàna
ka nidina tamin’izay ho any an’efitra.
— Izany àry ny tenin’ny Tompo.
Setriny
Salamo 49, 1-2. 5-6. 14-15
Izay mahitsy famindra hohetsahin’Andriamanitra amin’ny vonjiny.
Ny Tompo Andriamanitra lehibe
manaika ny tany tontolo:
dia izay iposahan’ny andro
ka hatrany amin’izay ilentehany.
Indro Andriamanitra mamiratra
ao Siôna fanaperan-tsoa!
Vorio eto amiko ny mpivavaka amiko
izay nifanaiky tamiko tamin-tsorona.
Ny fahamarinany ambaran’ny lanitra.
Eny, Andriamanitra no Ilay Mpitsara.
Ny saotra atao fanatitra ho an’Andriamanitra;
ny voadinao, tovina ho an’ny Avo indrindra.
Dia antsoy Aho amin’ny andro fahoriana,
fa hanafaka sy hampipetraka amin’ny fanasana!
Evanjely
Aleloia. Aleloia.
Andriamanitra no nampihavana an’izao tontolo izao indray tamin’ny alalan’i Kristy sy nametraka indray ny teny fampanantenana tamintsika.
Aleloia.
Evanjely Masina nosoratan’i Masindahy Lioka (Lk. 19, 41-44)
Raha mba nahalala izay hampiadana anao manko ianao.
Tamin’izany andro izany,
nony mby akaiky an’i Jerosalema i Jesoa
dia nitomany azy nanao hoe:
“Raha izay kosa manko ianao no mba nahalala izay hampiadana anao,
na dia amin’itý andro nomena anao itý ihany aza!
Fa takona ny masonao izany ankehitriny.
Ka ho avy aminao ny andro
hanaovan’ny fahavalonao hady manodidina anao;
hosaronany ianao sy hotereny hatraiza hatraiza,
ary hofongorany hatramin’ny tany mbamin’ny zanakao eo anatinao
ka tsy havelany hisy vato mifanongoa eo aminao,
satria tsy nahalala ny andro namangiana anao ianao.”
— Izany àry ny tenin’ny Tompo.
- Atolotr'i Ratovoarivelo Ndrasantsoa Marie Frédeline
- Lohahevitra : Raki-tsarobidy
-
Voadika amin'ny fiteny :
Zava-dehibe ny fianakaviana ho an'ny fiaraha-monina : ankohonana voajanahary. Ny fianakaviana dia ankohonana mampiombona olona àry ny fiaraha-monin'olombelona voalohany. Manana anjara toerana lehibe amin'izany ny kristiana hoy ny konsily : tsy maintsy araraotin'ny kristiana ny fotoana ankehitriny, noho izany tokony hiasa mafy izy hanandratra ny hasin'ny fanambadiana sy ny fianakaviana. Katesizy momba ny Eglizy, ny fianakaviana sy ny pôlitika, iarahana amin'i P. Abdon Rafidison.
- Atolotr'i Ratovoarivelo Ndrasantsoa Marie Frédeline
- Lohahevitra : Raki-tsarobidy
-
Voadika amin'ny fiteny :
Tompon'antoka ara-piaraha-monina ny fianakaviana. Hita taratra izany amin'ny fanehoany ny firaisan-kina sy ny fahaizany mizara, tsy ao anatin'ny fianakaviana fotsiny, fa eo amin'ny sehatra isan-karazany. Mba hahatratrarana ny soatoavin'ny fanambadiana sy ny fianakaviana dia mitaona ny rehetra ny Eglizy manao hoe : aoka ny fitiavana sy ny hevitra iombonana ary ny fahamasinana no hanakambana ny mpivady. Katesizy momba ny Eglizy, ny fianakaviana sy ny pôlitika, iarahana amin'i P. Abdon Rafidison.
- Atolotr'i Radio Don Bosco
- Lohahevitra : Vaovao
♦ Mandeha ny resaka fa kasaina hahongana ny filohan'ny Antenimieram-pirenena. Tsy mitombina izany vaovao izany hoy ny depiote Lanto Rakotomanga, anisan'ireo mpikamban'ny Birao maharitra nivory teny Tsimbazaza omaly... ♦ Litchis hatrany amin'ny 18.000 taonina no haondrantsika any ivelany amin'ity taona ity. Efa tonga ao seranan-tsabon'i Toamasina ny sambo lehibe roa hitondra ireo vokatra ireo, raha ny nambaran'ny tompon'andraikitra... ♦ Nanitsy ny tale jeneralin'ny fandraharahana ny fonja fa tsy maty tany am-ponja ny mpanakanto Ninie Donia. Efa nihoatra ny fe-potoana tokony ho izy, hoy izy no nitsaboana azy tany amin'ny hôpitaly...
- Atolotr'i Radio Don Bosco
- Lohahevitra : Mba ho vanona
-
Voadika amin'ny fiteny :
Mandalo fotoan-tsarotra ny firenentsika noho ny tsy fahaizana manaja ny safidin'ny hafa. Ny fanajana safidy dia mitondra filaminana sy fahatsaram-piainana. Fandaharana "mba ho vanona" iarahana amin'ny jeneraly Désiré Ramakavelo.
- Atolotr'i Radio Don Bosco
- Lohahevitra : Vaovao
♦ Ny sabotsy izao no hamoaka ny voka-pifidianana vonjimaika ny CENI, raha tsy misy ny fiovàna. Hitondra fanazavana eto ny mpanolon-tsaina eo anivon'ny Vaomiera mahaleon-tena misahana ny fifidianana ity... ♦ Hiverina hampiato ny fampianarana eny amin'ny Anjerimanontolo indray ireo mpampianatra eny Ankatso. Fanaovana tsinontsinona ireo mpampianatra hoy izy ireo ny fanapahana karama ataon'ny Fitondràna amin'izao... ♦ Nipoaka ny basy teny Andohanimandroseza-Ambohipo sy ny manodidina omaly antoandro. Jiolahy 5 lahy no maty, vokatry ny fifampitifirana teo amin'izy ireo sy ny mpitandro ny filaminana...
- Atolotr'i Ramamonjisoa Rivo Alain
- Lohahevitra : Vaovao
♦ Hotanterahana amin'ny sabotsy izao, ny famoahan'ny CENI ny voka-pifidianana vonjy maika, izay natao tamin'ny 16 nôvambra 2023... ♦ Nanakoako ny feom-basy teny Andohanimandroseza sy ny manodidina. Olona 5 no lavon'ny mpitandro ny filaminana... ♦ Miisa telo ireo mpampianatra tapaka karama ka nanapa-jevitra ny hampiato ny fampianarana indray ny vondron'ireo mpampianatra eny amin'ny Oniversiten'Antananarivo...
- Atolotr'i Ratovoarivelo Ndrasantsoa Marie Frédeline
- Lohahevitra : Raki-tsarobidy
-
Voadika amin'ny fiteny :
Tsy maintsy miaro ny hasin'ny fanambadiana sy ny fianakaviana ny Eglizy sy ny olon-drehetra, ny fiaraha-monina sy ny Fanjakàna ary ny Fikambanam-be iraisam-pirenena. Lazain'ny Eglizy fa ny fianakaviana no fototra iorenan'ny fokonolona ; ao ny taranaka mifandimby no mifanampy hahazo fahendrena bebe kokoa sy hampirindra ny zon'ny olona amin'ny zavatra ilaina eo amin'ny fiainana ara-tsosialy. Katesizy momba ny Eglizy, ny fianakaviana sy ny pôlitika, iarahana amin'i P. Abdon Rafidison.
Sous-catégories
[Miara-dàlana] Alatsinainy 25 nôvambra 2024
- Samy nanana ny nanamarihana ny Andro maneratan-tany ho an'ny Tanora ny isan-diôsezy, ny isan-distrika ary ny isam-paroasy, omaly Alahadin'i Kristy Mpanjaka...
- Manao ezaka ho fanatsararana ny kalitaon'ny fanabeazana omena ireo zanaky ny Fiangonana manovo fanabeazana eny amin'ny Sekoly Katôlika ny eto Mdagasikara sy ny any amin'ny Diôsezy. Isan'izany ny eto amin'ny Diôsezin'Antananarivo...
- Mitoetra ao amin'ny teny marina sy mandaitra ny fahefana maha Mpanjaka an'i Jesoa, hoy ny Papa François tamin'ny fampianarana nataony talohan'ny vavaka Angelus, ny alahady 24 nôvambra 2024...
Famantarana ny fitiavan'Andriamanitra antsika ny Noely
Noho ny fetin'ny Noely, Fankalazana manetriketrika ny nahaterahan'i Kristy Mpamonjy an'izao tontolo izao, dia manafatra ary miray soa ho antsika i Mompera Bizimana Innocent, Lehiben'ny Salezianin'i Don Bosco eto Madagasikara sy ny Nosy Maorisy.
Tohiny...Zatti, rahalahinay
Ny horonan-tsary "Zatti, notre frère" (Argentina, 2020) dia manoritsoritra ireo vanim-potoana tena sarotra teo amin'ny fiainany. Tao Viedma no nitranga ny tantara tamin'ny taona 1941 : 60 taona i Zatti ary noterena handao ilay toeram-pitsaboana izay nikatrohany amam-polo taonany maro. Fitsapana mivaivay ho an'ny finoany sy ny herim-pony izany.
Tohiny...© 2024 Radio Don Bosco