Vakiteny voalohany

Bokin’i Malakia Mpaminany 3, 1-4. 23-24

Indro Aho haniraka an’i Elia ho anareo alohan’ny hahatongavan’ny andron’ny Tompo.

Izao no lazain’ny Tompo Andriamanitra:

Indro Aho haniraka ny irako;
ka izy no hamboatra ny lalana eo alohako;
dia ho tonga tampoka ao an-Tempoliny ny Tompo tadiavinareo,
ilay anjelin’ny fanekena irinareo.
Indro avy izy, hoy ny Tompon’ny tafika.
Iza no hahatanty ny andro hiaviany,
ary zovy no hahajoro, raha miseho izy?
Fa ho tahaka ny afon’ny mpandrendrika izy
sy ho sahala amin’ny pôtasin’ny mpanery lopòtra.
Hipetraka mandrendrika sy manadio ny volafotsy izy;
hanadio ny taranak’i Levï izy,
ka hanadio azy toy ny volamena sy ny volafotsy,
ka dia ho mpanompo izy ho an’ny Tompo,
hanolotra fanatitra ara-drariny aminy
ary hankasitrahin’ny Tompo toy ny tamin’ny andro taloha;
toy ny tamin’ny taona fahiny, ny fanatitr’i Jodà sy i Jerosalema.
Indro Aho haniraka an’i Elia, mpaminany, ho aminareo,
alohan’ny hahatongavan’ny andron’ny Tompo,
sady lehibe no mahatahotra.
Hampody ny fon-dray ho amin’ny zanany izy,
sy ny fon-janaka ho amin’ny rainy,
fandrao ho avy Aho ka hataoko anatema ny tany.

— Izany àry ny tenin’ny Tompo.

Setriny

Salamo 24, 4bd-5ab. 8-9. 10 sy 14

Miandrandrà ka asandrato ny lohanareo, fa efa akaiky ny fanavotana anareo.

Ny lalanao, ry Tompo, ampahafantaro ahy;
ny soritrao ampianaro ahy!
Tariho amin’ny fahamarinanao aho, ry Tompo;
fa Ianao no Andriamanitra Mpamonjy ahy.

Tsara sy mahitsy ny Tompo,
ka ny mpanota toroany lalana:
ny ory tarihiny amin’ny hitsiny;
ny ory ampianariny ny lalany.

Ny lalan’ny Tompo rehetra: hatsaram-po sy fahamarinana
amin’ny mpitandrina ny fanekeny sy ny fanambaràny.
Ny tsiambaratelon’ny Tompo ho an’izay matahotra Azy;
ny fanekeny manome fahalalana tokoa azy ireo.

Evanjely

Aleloia. Aleloia.

Ianao ilay Emanoela Mpanjaka sy Mpanalalana anay; avia hamonjy anay, ry Tompo Andriamanitray.

Aleloia.

Evanjely Masina nosoratan’i Masindahy Lioka (Lk 1, 57-66)

Ny nahaterahan’i Joany Batista.

Nony tonga ny andro hiterahan’i Elizabeta dia tera-dahy izy.
Ary nahare ny miara-monina aminy sy ny havany
fa efa nankalazain’ny Tompo ny famindram-pony taminy,
ka dia niara-nifaly taminy.
Nony afaka havaloana, dia tonga izy hamora ny zaza,
ary Zakaria, araka ny anaran-drainy
no ndeha hataony anarany.
Fa niteny reniny nanao hoe:

“Tsia, tsy izany, fa hatao hoe: Joany izy.”

Fa hoy izy ireo taminy:

“Tsy misy na dia iray aza amin’ny havanao
manana izany anarana izany.”

Ary nanao baikon’ny moana tamin’ny rainy izy ireo
nanontany izay tiany hatao anarany.
Dia nangataka fàfana izy,
ary nanoratra hoe:

“Joany no anarany”;

ka gaga daholo ny rehetra.
Niaraka tamin’izay dia nisokatra ny vavany,
ary nivaha ny lelany,
dia niteny izy ka nisaotra an’Andriamanitra.
Azon’ny tahotra avokoa ny mponina rehetra teny manodidina,
ary niely hatraiza hatraiza
tany amin’ny tendrombohitr’i Jodea izany zava-mahatalanjona izany.
Ary izay rehetra nahare
dia nandatsaka izany tao am-pony ka nanao hoe:

“Ho inona re ity zaza ity?”

Fa nomba azy ny tanan’ny Tompo.

— Izany àry ny tenin’ny Tompo.

Vakiteny voalohany

Boky voalohan’i Samoela 1, 24-28

Velom-pisaorana i Annà noho ny nahaterahan’i Samoela.

Tamin’izany andro izany,
nony efa notazan’i Annà, reniny, i Samoela,
dia nentiny niakatra niaraka taminy,
sady naka vantotr’ombilahy telo
sy lafarina iray efah ary divay eran’ny siny hoditra izy;
dia nentiny nankao an-tranon’ny Tompo tao Silao izy.
Mbola tanora kely ny zaza.
Dia novonoin’izy ireo ny vantotr’ombilahy iray,
ary nentiny nankao amin’i Helî ny zaza.
Ka hoy i Annà:

“Aza mahafady, tompoko.
Raha velona koa ny ainao, tompoko, dia izaho ilay vehivavy
nitoetra teto akaikinao nivavaka tamin’ny Tompo.
Ny hahazoako ity zaza ity no nangatahiko
ary neken’ny Tompo ny fangatahana nataoko taminy.
Koa inty koa aho, mahafoy azy ho an’ny Tompo;
nafoy ho an’ny Tompo izy amin’ny andro hiainany rehetra.”

Dia niankohoka teo anatrehan’ny Tompo izy ireo.

— Izany àry ny tenin’ny Tompo.

Setriny

Boky voalohan'i Samoela 2, 1. 4-5. 6-7. 8

Ravo amin’ny Tompo ny foko!

Endrey ny hafaliako manana ny Tompo!
Ny lohako nitanondrika mitraka.
Ka indro aho misoka-bava hiaro tena.
Mifaly aho, ry Tompo, fa voavonjinao.

Ny olo-mahery tapaka tsipîka,
ny osa kanefa miatrana aman-kery.
Ny voky nasainy miasa mikarama,
ny noana kanefa homana tsy miasa.
Ny momba nomeny zanaka amam-para,
kanefa ny maro anaka malazo.

Mamono ary koa mamelona ny Tompo:
mampidina sy mampakatra ny maty,
mampanana sy mandevona ny Tompo,
mampietry Izy fa manandratra avy hatrany.

Alàny tsy ho eo am-bovoka ny ory,
akariny avy eo am-pako ny mahantra,
ka indro nomeny toerana mpanjaka,
tolorany fiketrahana mihaja.

Evanjely

Aleloia. Aleloia.

Ry ilay Fahendrena izay mandahatra ny zavatra rehetra amin-kery sy amin-kalemem-panahy, avia mba hampianatra anay ny lalan’ny fahamarinana.

Aleloia.

Evanjely Masina nosoratan’i Masindahy Lioka (Lk 1, 46-56)

Nahefa be tamiko Ilay Mahefa.

Tamin’izany andro izany,
i Maria nisaotra ny Tompo nanao hoe:

“Mankalaza ny Tompo ny fanahiko;
ary faly sy ravo amin’Andriamanitra Mpamonjy ahy ny foko,
fa notsinjoviny ny fiambanian’ny ankizivaviny.
Fa indro, hatramin’izao,
dia hataon’ny taranaka rehetra hoe: sambatra aho,
satria efa nanao zavatra lehibe tamiko ilay Mahefa.
Ary masina ny Anarany,
sady amin’izay matahotra Azy
hatramin’ny taranaka fara mandimby ny famindram-pony.
Nahefa asa mahery tamin’ny sandriny Izy;
dia nampihahafiny izay niavonavona tamin’ny fisainan’ny fony;
naongany hiala tamin’ny fiketrahany ny mpifehy,
fa ny ambany kosa nasandrany;
ary ny noana novokisany soa,
fa ny mpanankarena kosa, dia nampodîny nitondra tanam-polo.
Niahy an’i Israely mpanompony Izy,
fa tsy hadinony ny famindram-pony
tamin’i Abrahama sy ny taranany mandrakizay,
araka ny efa voalazany tamin’ny razantsika.”

Nitoetra tokony ho telo volana
tao amin’i Elizabeta i Maria
vao nody tany an-tranony.

— Izany àry ny tenin’ny Tompo.

Vakiteny voalohany

Boky Tononkira dia Tononkira 2, 8-14

Indro tamy ny malalako miantsambotsambotra eny an-tendrombohitra.

Injay ny feon’ny malalako,
indry tamy izy miantsambotsambotra eny an-tendrombohitra;
mitsambikina amin’ny havoana.
Manahaka ny gazela ny malalako,
sy ny zanaky ny serfa vavy.
Indro izy eo ivohon’ny rindrin’ny tranonay,
mijery eo am-baravarankely,
mijery eo amin’ny makarakara.
Niteny ny malalako, ka nanao tamiko hoe:

“Mitsangàna, ry malalako, ry tsara tarehiko, ka avia!
Fa indro ny ririnina efa lasa,
ny ranonorana efa nitsahatra tsy misy intsony.
Ny voninkazo efa miposaka amin’ny tany,
ny fotoana fihirana efa tonga.
Ny feon-domohina efa re eny an-tsahantsika;
efa mipoitra ny voan’aviavy vao mitsimoka,
ny voaloboka mamony efa mamerovero;
mifohaza, ry malalako, ry tsara tarehiko, ka avia!
Ry voromailalako izay mipetraka eo an-tsefatsefa-bato mideza,
asehoy ahy ny endrikao, ampandreneso ahy ny feonao,
fa mamy ny feonao, ary mahafinaritra ny endrikao.”

— Izany àry ny tenin’ny Tompo.

Setriny

Salamo 32, 2-3. 11-12. 20-21

Hobio ny Tompo, ry olo-marina; ihirao hira vao Izy.

Derao amin-dokanga ny Tompo;
antsao amim-baliha tory folo.
Ihirao hira vao Izy;
andredony horaka aman-java-maneno!

Ny fanampoizan’ny Tompo maharitra mandrakizay;
ny fikasan’ny fony, amin’ny taranaka mifandimby.
Sambatra ny firenena tahin’Andriamanitra Tompony,
sy ny vahoaka nofidiny ho lovany.

Ny fanahinay manantena ny Tompo;
Mpitahy anay Izy sy ampinganay!
Izy no ifalian’ny fonay;
ny Anarany masina no ifefenay!

Evanjely

Aleloia. Aleloia.

Ianao Filohan’ny fokon’i Israely izay niseho tamin’i Môizy sy nanome azy ny lalàna teny an-tampon’i Sinaia, avia mba anavoty anay ny herin-tsandrinao.

Aleloia.

Evanjely Masina nosoratan’i Masindahy Lioka (Lk 1, 39-45)

Avy aiza amiko izao no mba vangian’ny renin’ny Tompoko aho?

Tamin’izany andro izany, niainga i Maria,
ka nandeha haingana ho any amin’ny tany be tendrombohitra
ho any an-tanàna anankiray any Jodà,
ary niditra tao an-tranon’i Zakaria ka niarahaba an’i Elizabeta.
Nony vao ren’i Elizabeta ny fiarahaban’i Maria azy,
dia nientana ny zaza tao an-kibony,
ary feno ny Fanahy Masina i Elizabeta,
ka nanandra-peo, niantso mafy hoe:

“Nosoavina noho ny vehivavy rehetra ianao,
ary nosoavina ny hateraky ny kibonao.
Ary avy aiza amiko izao
no mba vangian’ny renin’ny Tompoko aho?
Fa indro raha vao ren’ny sofiko ny feonao niarahaba ahy,
dia nientan-kafaliana ny zaza tato an-kiboko.
Ary sambatra ilay nino
fa ho tanteraka izay nampilazain’ny Tompo taminy.”

— Izany àry ny tenin’ny Tompo.

Vakiteny voalohany

Bokin’i Izaia Mpaminany (Iz 7, 10-14)

Indro hanana anaka ny Virjiny.

Tamin’izany andro izany,
dia niteny tamin’i Akaza ny Tompo nanao hoe:

“Mangataha famantarana amin’ny Tompo Andriamanitrao;
mangataha izany, na any amin’ny fara lavaky ny Seoly,
na any amin’ny havoan’ny lanitra.”

Fa hoy i Akaza:

“Tsy hangataka aho;
tsy haka fanahy ny Tompo aho.”

Ka hoy i Izaia:

“Mihainoa, ry taranak’i Davida;
mbola tsy ampy anareo va ny mahasasatra ny olombelona,
no dia mbola mahasasatra an’Andriamanitra koa ianareo?
Noho izany dia ny tenan’ny Tompo
no hanome famantarana anareo:
Indro hanana anaka ny Virjiny, ka hiteraka zazalahy,
ary ny anarany hataony hoe Emanoela”,

izany hoe amintsika Andriamanitra.

— Izany àry ny tenin’ny Tompo.

Setriny

Salamo 23, 1-2. 3-4ab. 5-6

Hiditra ny Tompo, Ilay Mpanjakan’ny voninahitra.

Ny tany, ny hareny: Azy Tompo avokoa,
dia izao rehetra izao ary izay monina ao.
Naoriny ambonin’ny rano izy ireny,
napetrany tsara eo ambonin’ny ony.

Koa zovy no hiakatra hihaona amy Tompo;
hanorim-ponenana an-toerany masina?
Ny olon-tsy meloka, ny olo-mahitsy,
sy izay tsy mianiana tsy tò amin’ny hafa.

Dia izy no hany hotsofina rano,
ny Tompo Mpamonjy hanome rariny azy.
Fa izy no dimbin’ireo izay nizaha
ny endrik’ilay Andriamanitra Tompo.

Evanjely

Aleloia. Aleloia.

Ianao ilay Emanoela Mpanjaka sy Mpanalalana anay, avia hamonjy anay, ry Tompo Andriamanitray.

Aleloia.

Evanjely Masina nosoratan’i Masindahy Lioka (Lk 1, 26-38)

Indro hitoe-jaza ianao, ka hiteraka zazalahy.

Tamin’izany andro izany,
dia nirahin’Andriamanitra ny Anjely Gabriely
ho any amin’ny tanàna anankiray any Galilea
atao hoe Nazareta,
ho any amin’ny Virjiny anankiray
fofombadin’ilay lehilahy atao hoe Jôsefa, taranak’i Davida,
ary ny anaran’ilay Virjiny dia Maria.
Ary nony niditra tao aminy ilay Anjely dia nanao hoe:

“Arahaba, ry ilay feno hasoavana:
ny Tompo ao aminao;
nosoavina noho ny vehivavy ianao.”

Taitra izy nahare izany,
ka nieritreritra izay tokony ho hevitr’izany fiarahabana izany.
Fa hoy ny Anjely taminy:

“Aza matahotra, ry Maria,
fa sitrak’Andriamanitra ianao,
ary indro, hitoe-jaza ianao, ka hiteraka zazalahy,
ary Jesoa no hataonao anarany.
Ho lehibe Izy ka hatao hoe Zanaky ny Avo indrindra;
dia homen’Andriamanitra ny fiketrahan’i Davida rainy Izy,
ka hanjaka mandrakizay amin’ny taranak’i Jakôba,
ary tsy hanam-pahataperana ny fanjakany.”

Fa hoy i Maria tamin’ilay Anjely:

“Ahoana no hahatongavan’izany,
fa tsy mahalala lahy aho?”

Fa hoy ny Anjely namaly azy:

“Ny Fanahy Masina no ho tonga ao aminao,
ary ny herin’ny Avo indrindra hanaloka anao;
noho izany dia hatao hoe Zanak’Andriamanitra ny Masina haterakao.
Ary indro i Elizabeta rahavavinao
dia efa mitoe-jaza koa na dia efa antitra aza,
ary efa mandray enina izy izao ilay natao hoe momba,
fa tsy hisy tsy ho hain’Andriamanitra atao.”

Dia hoy i Maria:

“Inty aho ankizivavin’ny Tompo,
aoka anie ho tanteraka amiko araka ny teninao.”

Dia niala teo aminy ny Anjely.

— Izany àry ny tenin’ny Tompo.

Vakiteny voalohany

Bokin’ny Mpitsara (13, 2-7. 24-25a)

Nambaran’ny Anjely ny hahaterahan’i Samsôna.

Tamin’izany andro izany,
nisy lehilahy anankiray, atao hoe Manôe,
fianakavian’i Danita, avy amin’i Saraà;
momba ny vadiny, ka tsy niteraka.
Niseho tamin-dravehivavy ny Anjelin’ny Tompo
ka nanao taminy hoe:

“Momba ianao izao, ka tsy manan-janaka,
nefa hanana anaka kosa ianao, ka hitera-dahy.
Ary ankehitriny mitandrema tsara,
fa aza misotro divay na lalikera mahery,
na mihinan-java-maloto,
fa hanana anaka ianao, ka hitera-dahy.
Tsy hokasihin-kareza ny lohany,
fa io zaza io no nazareanin’Andriamanitra hatrany am-bohoka;
ary izy no hanomboka hanafaka an’i Israely
amin’ny tanan’ny Filistinina.”

Dia nandeha nilaza tamin’ny lahy ravehivavy nanao hoe:

“Nisy olon’Andriamanitra tonga taty amiko;
tahaka ny Anjelin’Andriamanitra no fijery ny endriny,
endrika mahatahotra.
Tsy nanontany izay niaviany aho
ary izy tsy nampahalala ahy izay anarany;
fa izao no nolazainy tamiko:
Efa hanana anaka ianao, ka hitera-dahy,
koa ankehitriny aza misotro divay na lalikera mahery
na mihinan-java-maloto
fa ho nazareanin’Andriamanitra io zaza io
hatrany am-bohoka ka mandra-pahafatiny.”

Ary tera-dahy ravehivavy,
ka nataony hoe Samsôna no anarany.
Dia nitombo ny zaza, sady notahìn’ny Tompo.
Dia nanomboka nitaona azy ny fanahin’ny Tompo.

— Izany àry ny tenin’ny Tompo.

Setriny

Salamo 70, 3-4a. 5-6ab. 16-17

Ny vavako feno fiderana Anao tontolo andro.

Aoka Ianao ho vatolampy fialofako,
ho trano mafy mahavonjy!
Eny, Ianao no haram-bato
sy toera-mafy ho ahy, ry Andriamanitra ô!

Ianao no tokiko, ry Tompo Andriamanitra,
fanantenako hatry ny fahakeliko!
Hatrany am-bohoka, Ianao no heriko;
hatrany an-kibon’i neny, Ianao no mpiaro ahy.

Ny vavako mitanisa tontolo andro
ny fahamarinanao sy ny vonjinao.
Andriamanitra ô, mbola kely aho no nampianarinao,
ka hatrizao dia manambara ny asanao mahagaga.

Evanjely

Aleloia. Aleloia.

Ry ilay Atsinanana fibaliakan’ny hazavana mandrakizay sy masoandron’ny fahamarinana, avia ary omeo an’ireo izay mandry ao amin’ny haizina sy ny aloky ny fahafatesana ny hazavana.

Aleloia.

Evanjely Masina nosoratan’i Masindahy Lioka (Lk 1, 5-25)

Ambaran’ny Anjely Gabriely ny hahaterahan’i Joany Batista.

Tamin’ny andron’i Herôda, mpanjakan’i Jodea,
nisy mpisorona anankiray atao hoe Zakaria,
isan’ny fianakavian’i Abià,
ary ny vadiny dia taranak’i Aarôna sy natao hoe Elizabeta.
Samy marina teo imason’Andriamanitra izy mivady,
sady nitondra tena tsy nanan-tsiny
tamin’ny didy sy ny tenin’ny Tompo rehetra.
Tsy nanan-janaka izy, fa momba i Elizabeta,
ary efa samy zokiolona ihany izy mivady.

Indray andro,
nony nanao ny raharahan’ny mpisorona teo anatrehan’Andriamanitra i Zakaria
araka ny anjaran’ny antokony,
dia voatendrin’ny loka araka ny fanaon’ny mpisorona
hiditra ao amin’ny tempolin’ny Tompo,
hanolotra ny emboka,
ary ny vahoaka rehetra dia tao alatrano no nivavaka,
tamin’ny ora fanolorana ny emboka.
Fa nisy Anjelin’ny Tompo niseho taminy,
nitsangana teo ankavanan’ny ôtely fanolorana ny emboka.
Taitra i Zakaria nony nahita azy ka raiki-tahotra.
Fa hoy ny Anjely taminy :

“Aza matahotra, ry Zakaria
fa efa nohenoina ny fangatahanao,
ka i Elizabeta vadinao dia hiteraka zazalahy aminao,
ary i Joany no hataonao anarany,
dia ho faly sy ho ravo ianao,
ary maro koa no ho faly amin’ny fahaterahany.
Fa ho lehibe eo imason’ny Tompo izy;
tsy hisotro divay na zava-mahamamo izy,
sady ho feno ny Fanahy Masina hatrany an-kibon-dreniny,
maro amin’ny zanak’i Israely no hampodìny amin’ny Tompo Andriamanitra,
dia hialoha azy amin’ny fanahy,
sy ny herin’i Elia izy hampody ny fon’ny ray ho amin’ny zanaka
ary ny tsy manoa ho amin’ny fahendren’ny olo-marina,
hamboatra firenena voavonona ho an’ny Tompo.”

Dia hoy i Zakaria tamin’ny Anjely:

“Inona no hahafantarako izany?
fa izaho efa antitra, ary koa efa zokiolona ny vadiko.”

Namaly ny Anjely nanao taminy hoe:

“Izaho no Gabriely,
ilay mitsangana eo anatrehan’Andriamanitra,
ary nirahina aho hiteny aminao hampandre anao
izany teny mahafaly izany,
fa indro ho moana ianao,
ka tsy hahay miteny ambara-pahatongan’izany,
noho ianao tsy nino ny teniko,
izay ho tanteraka amin’ny fotoan’androny.”

Niandry an’i Zakaria anefa ny olona
ka gaga noho izy naharitra ela tao anatin’ny tempoly;
kanjo nony nivoaka izy,
dia tsy nahay niteny taminy,
ka fantatry ny olona fa nahita fahitana tao anatin’ny tempoly izy,
dia baikon’ny moana no nitenenany taminy,
fa moana tokoa izy.
Ary nony tapitra ny androny amin’ny raharahany,
dia nody tany an-tranony izy.
Ary taorian’izany andro izany
dia nitoe-jaza i Elizabeta vadiny
ary niery dimy volana ka nanao hoe:

“Izao no nataon’ny Tompo tamiko,
tamin’ny andro nitsinjovany ahy
hahafa-tondromaso ahy amin’ny olona.”

— Izany àry ny tenin’ny Tompo.

Vakiteny voalohany

Bokin'i Jeremia Mpaminany 23, 5-8

Hanangana Solofo marina ho an’i Davida Aho.

Indro avy ny andro, — teny marin’ny Tompo, —
hananganako ho an’i Davida Solofo marina;
hitondra tahaka ny mpanjaka, ho hendry,
hanao ny hitsiny sy ny rariny amin’ny tany.
Amin’ny androny, i Jodà hovonjena;
i Israely handry fehizay;
ary izao no anarana hanononana Azy:

“Tompo - fahamarinantsika.”

Noho izany, indro avy ny andro, — teny marin’ny Tompo, —
izay tsy hanaovana intsony hoe:

“Velona ny Tompo,
izay nitondra ny zanak’i Israely
niakatra avy any amin’ny tany Ejipta”;

fa hoe:

“Velona ny Tompo, izay nitondra sy nampody
ny firenena taranak’i Israely,
avy any amin’ny tany Avaratra
sy ny tany rehetra nandroahako azy
Dia honina eo amin’ny taniny izy ireo.”

— Izany àry ny tenin’ny Tompo.

Setriny

Salamo 71, 2. 12-13. 18-19

Ny Rariny hamony amin’ny andron’ny Tompo.

Andriamanitry ny fahamarinana ô,
mba tolory ny andriana mpanapaka
sy ny zanak’andriana ho dimbiny
ny fahaiza-mitsara ara-drariny.

Izy hanafaka ny malahelo
mitoloko tsy manan-kanampy.
Ny mahantra sy ny ory hovonjeny
hotsimbininy hatrany ny osa.

Eny, hisaorana anie Andriamanitra!
Mahagaga ny asa nataony
ka hisaorana mandrakizay
izany Anarany tsy lefy laza.

Evanjely

Aleloia. Aleloia.

Ry ilay Solofon’i Jese, fisehoan’ny fivondronan’ny vahoaka, avia hamonjy anay, aza maharitra ela intsony..

Aleloia.

Evanjely Masina nosoratan’i Masindahy Matio 1, 18-24

I Jesoa dia naterak’i Maria, vadin’i Jôsefa zanak’i Davida.

Toy izao no nahaterahan’i Kristy:
i Maria reniny dia efa fofombadin’i Jôsefa;
fa raha mbola tsy niray trano izy ireo,
dia hita fa nanana anaka avy tamin’ny Fanahy Masina izy.
Ary i Jôsefa vadiny,
noho izy lehilahy marina sady tsy te-hanala baràka azy
dia nikasa hametraka azy mangingina.
Nefa raha mbola nieritreritra izany izy,
indro nisy Anjelin’ny Tompo niseho taminy, tamin’ny nofy,
ka nanao hoe:

“Ry Jôsefa, zanak’i Davida,
aza matahotra hampakatra an’i Maria vadinao,
fa ny Zaza ao an-kibony dia avy amin’ny Fanahy Masina,
ary hiteraka Zazalahy izy,
ka ny anarany hataonao hoe: Jesoa,
fa Izy no hamonjy ny olony ho afaka amin’ny fahotany.”

Ary izany rehetra izany no tonga,
dia mba hahatanteraka
izay nampilazain’ny Tompo ny mpaminany hoe:

“Indro ny Virjiny hitoe-jaza ka hiteraka Zazalahy,
ary ny anarany hatao hoe: Emanoela,
izany hoe: amintsika Andriamanitra.”

Ary rahefa nahatsiaro tamin’ny torimaso i Jôsefa,
dia nanao araka izay nandidian’ny Anjely azy
ka nampakatra ny vadiny.

— Izany àry ny tenin’ny Tompo.

Vakiteny voalohany

Bokin’i Izaia Mpaminany (Iz. 61, 1-2a. 10-11)

Ho revon-kafaliana ao amin’ny Tompo aho.

Ato amiko ny Fanahin’ny Tompo,
satria voahosotry ny Tompo aho;
nirahiny hitondra teny soa mahafaly amin’ny mahantra,
hamehy ny ferin’ireo torotoro fo;
hampandre amin’ny babo fa afaka, sy ny ao an-tranomaizina
fa alefa hitory taom-pahasoavana anankiray ho an’ny Tompo.
Ho revon-kafaliana eo amin’ny Tompo aho,
ary hiravoravo amin’ny Andriamanitro ny foko,
satria notafiany fitafiam-pamonjena aho
ary nakanjoiny akanjom-pahamarinana,
toy ny mpampakatra miravaka diadema eo an-dohany;
toy ny ampakarina miraratra ny firavany sarobidy.
Fa toy ny ampanirian’ny tany ny tsimoka eo aminy,
sy toy ny ampitsimohan’ny zaridaina ny voa nafafy eo aminy,
no ampanirian’ny Tompo Andriamanitra ny fahamarinana sy ny fiderana,
eo anatrehan’ny firenena rehetra.

— Izany àry ny tenin’ny Tompo.

Salamo fandinihana

Lk. 1, 46-48. 49-50. 53-54

Hiravoravo ao amin’Andriamanitra ny foko.

Mankalaza ny Tompo ny fanahiko,
ravo amin’Andriamanitra Mpamonjy ahy ny aiko:
fa nojereny ity ankizivaviny tsinontsinona,
ka hataon’ny taranaka rehetra hoe sambatra aho.

Nanao zava-dehibe tamiko ilay Mahefa,
ilay antsoina hoe “Ny Masina”,
ilay tia an’izay matahotra azy
amin’ny taona mifandimby.

Ireo noana vokisany soa,
ny manana ataony mody maina.
Nanarina an’i Israely mpanompony Izy,
fa tsaroany ny teniny tamin’ny razantsika.

Vakiteny faharoa

Taratasy voalohan’i Masindahy Paoly Apôstôly ho an’ny kristianina tany Tesalônika (1 Tes. 5, 16-24)

Hotahiriziny tsy hanan-tsiny ho amin’ny fahatongavan’ny Tompo ny fanahinareo sy ny ainareo ary ny vatanareo.

Ry kristianina havana,
mifalia mandrakariva;
mivavaha lalandava;
ary misaora amin’ny zavatra rehetra,
fa izany no sitra-pon’Andriamanitra,
ao amin’i Kristy Jesoa ho anareo rehetra.
Aza mamono ny Fanahy;
aza manamavo ny faminaniana,
fa zahao toetra ny zavatra rehetra, ka tano izay tsara;
fa fadio kosa na dia izay mitarehin-javatra ratsy fotsiny aza.
Ary Andriamanitry ny fiadanana anie
hanamasina ny tenanareo manontolo,
ka hotahiriziny tsy hanan-tsiny
ho amin’ny fahatongavan’i Jesoa Kristy Tompontsika avokoa ny fanahinareo
sy ny ainareo ary ny vatanareo.
Tsy mivadika Ilay niantso anareo,
ka Izy ihany koa no hanefa izany.

— Izany àry ny tenin’ny Tompo.

Evanjely

Aleloia. Aleloia.

Ato amiko ny Fanahin’ny Tompo: nirahiny hitondra teny soa mahafaly amin’ny malahelo Aho.

Aleloia.

Evanjely Masina nosoratan’i Masindahy Joany (Jo. 1, 6-8. 19-28)

Eo afovoanareo misy Olona anankiray izay tsy fantatrareo.

Nisy lehilahy anankiray nirahin’Andriamanitra,
Joany no anarany;
tonga ho vavolombelona hanambara ny Fahazavana izy,
mba hinoan’ny olona rehetra noho ny teniny.
Tsy izy anefa no Fahazavana
fa tonga ho vavolombelona manambara ny fahazavana fotsiny izy.
Ary izao no nambaran’i Joany
raha naniraka mpisorona sy Levita, avy tany Jerosalema,
hankany aminy ny Jody mba hanontany azy hoe:

“Iza moa Ianao?”

Nilaza marina izy ka tsy nandà, fa nanao hoe:

“Tsy i Kristy aho”.

Dia nanontany azy izy ireo nanao hoe:

“Iza àry?
i Elia va ianao?”

Fa hoy izy:

“Tsy izy aho”.

Ary hoy ihany izy ireo:

“Ilay mpaminany va ianao?”

Fa hoy ny navaliny:

“Tsia”.

Ka hoy izy ireo taminy:

“Iza àry ianao,
mba hitondranay valy amin’izay naniraka anay?
Ataonao ho iza ny tenanao?”

Dia hoy izy:

“Izaho no feo miantso any an’efitra hoe:
Ahitsio ny lalan’ny Tompo,
araka izay voalazan’i Izaia mpaminany”.

Ary Farisianina ireo iraka ireo.
Dia nanontany azy indray ireo ka nanao taminy hoe:

“Nahoana àry ianao no manao batemy
raha tsy i Kristy, na i Elia, na ilay Mpaminany?”

Ka novalian’i Joany hoe:

“Izaho manao batemy amin’ny rano;
fa eo aminareo misy anankiray tsy fantatrareo,
dia Ilay avy ao aoriako,
ary tsy mendrika hamaha ny kofehikapany aza aho”.

Tany Betania andafin’i Jordany,
izay nanaovan’i Joany batemy,
no natao izany zavatra izany.

— Izany àry ny tenin’ny Tompo.