Vakiteny voalohany

Bokin’i Osea Mpaminany (Os 6, 1-6)

Ny famindram-po no sitrako fa tsy ny sorona.

Tamin’izany andro izany,
nifampilaza ny vahoaka Israelita nanao hoe:

“Andeha isika hiverina amin’ny Tompo;
fa Izy no namiravira.
Izy no hahasitrana antsika;
mikapoka Izy,
nefa hamehy ny ferintsika koa.
Rahefa afaka indroa andro
dia hataony velona indray isika;
amin’ny andro fahatelo
dia hatsangany isika
ka ho velona eo anatrehany.
Mahalalà isika,
mikeleza aina hahalala ny Tompo isika.
Mahatoky, toy ny an’ny maraina, ny fiposahany;
ary ho avy amintsika
toy ny tandrifin-drahona,
toy ny fara orana manamando ny tany.”

Ary Andriamanitra namaly hoe:

“Inona no hataoko aminao, ry Efraima?
Inona no hataoko aminao, ry Jodà?
Fa ny fitiavam-bavakareo
dia tahaka ny rahona maraina,
tahaka ny ando amin’ny maraina
ka levona vetivety.
Noho izany,
nataoko potika, tamin’ny tenin’ny mpaminany,
novonoiko tamin’ny tenin’ny vavako izy ireo;
toy ny mazava miposaka no ho fitsarana anao.
Fa ny famindram-po no sitrako
fa tsy ny sorona;
ary ny fahalalana an’Andriamanitra
mihoatra noho ny sorona dorana.”

— Izany àry ny tenin’ny Tompo.

Setriny

Salamo (Sal. 50, 3-4. 18-19. 20-21ab)

Ny famindram-po no sitraky ny Tompo.

Iantrao aho, ry Tompo Andriamanitra,
fa Ianao manko lalim-pitiavana.
Mba koseho re ny heloka vitako,
dia diovy aho hiala amin’ny otako.

Lavinao tsotra izao ny fanatitra,
toy izany ireo sorona dorana;
ny fanahy torotoro, ry Tompoko,
io no sorona tianao hatolotro.

I Siôna omeo fitsimbinana,
mba areno ilay Jerosalemako.
Dia ho manitra indray ny fanatitra
sy ny sorona isan-karazany.

Evanjely

Voninahitra ho Anao, ry Kristy, Tenin’Andriamanitra.

Hitsangana aho ho any amin’ny raiko, ka hanao aminy hoe: “Dada ô, nanota tamin’ny lanitra sy teo anatrehanao aho.”

Voninahitra ho Anao, ry Kristy, Tenin’Andriamanitra.

Evanjely Masina nosoratan’i Masindahy Lioka (Lk. 18, 9-14)

Nidina ilay poblikanina nohamarinina tany an-tranony fa tsy ilay farisianina.

Tamin’izany andro izany,
i Jesoa nanao ity fanoharana ity
tamin’ireo sasany natoky tena ho marina sy nanebaka ny namany:

“Nisy roa lahy niakatra nivavaka tany an-tempoly.
Farisianina ny iray, ary poblikanina ny anankiray.
Nitsangana ilay farisianina ka nivavaka tao am-pony hoe:

‘Andriamanitra ô! misaotra Anao aho
fa tsy mba tahaka ny olona hafa izay mpangalatra,
tsy marina, mpijangajanga, na tahaka itsy poblikanina itsy akory aza;
mifady hanina indroa isan-kerinandro aho,
ary mandoa ny ampahafolon’ny fananako rehetra.’

Fa ilay poblikanina kosa nijanona eny lavidavitra eny
sady tsy sahy niandrandra ny lanitra akory,
fa nandona ny tratrany nanao hoe:

‘Andriamanitra ô! mamindrà fo amiko, fa mpanota aho.’

Lazaiko aminareo
fa ity no nidina efa nohamarinina tany an-tranony,
fa tsy ilay anankiray;
fa izay rehetra manandra-tena no haetry,
ary izay manetry tena no hasandratra.”

— Izany àry ny tenin’ny Tompo.

Vakiteny voalohany

Bokin’i Osea Mpaminany (Os. 14, 2-10)

Aoka isika tsy hilaza hoe: Avy amin’ny asan-tananay ny Andriamanitray.

Izao no lazain’ny Tompo:

“Miverena amin’ny Tompo ry Israely,
fa ny helokao no nahalavo anao.
Mitondrà teny ianareo, miaraka aminareo,
ka miverena amin’ny Tompo;
lazao aminy hoe:

‘Esory ny heloka rehetra ary raiso izay tsara.
Aoka hatolotray Anao ho solon’ny vantotr’ombalahy
ny teny avy amin’ny molotray.
I Asora tsy hamonjy anay,
izahay tsy hitaingin-tsoavaly’,

na hiteny hoe:

‘Ry Andriamanitray ô!
amin’ny asan’ny tananay.
Ianao izay ahitan’ny kamboty fiantrana!’

Hositraniko ny fiodinany;
ho tiako amin’ny foko tokoa izy,
fa efa niala taminy ny fahatezerako.
Ho toy ny ando Aho amin’i Israely;
ka haniry toy ny lisy izy,
ary handatsaka ny fakany tahaka an’i Libàna.
Ny rantsany hisandrahaka:
ny voninahiny, ho toy ny fototr’ôliva,
ary ny fofony manitra ho tahaka ny an’i Libàna.
Izy ho avy hiala sasatra ao ambanin’ny alokalony,
hampahavokatra ny vary indray;
haniry toy ny voaloboka izy;
ary ho tahaka ny divain’i Libàna ny anarany.
I Efraima, inona no mbola mba hataony any amin’ny sampy?
Izaho no efa mamaly ny fangatahany
sy mitsinjo azy tahaka ny sipresa maitso Aho;
Izaho no iavian’ny voanao.
Izay hendry no aoka hahafantatra izany zavatra izany,
izay manan-tsaina aoka hiaiky izany ho marina.
Fa mahitsy ny lalan’ny Tompo;
ka ny marina no hizotra eo,
fa ny mpiodina kosa, lavo aminy.

— Izany àry ny tenin’ny Tompo.

Setriny

Salamo (Sal. 80, 6d-8a. 8bd-9. 10-11ab. 14 sy 17)

Izaho no Tompo Andriamanitrao, mandrenesa re, ry Israely.

Fa inona moa izany teny reko,
toa teny tsy fantatro, teny hafa:
nalàko eo an-tsorony re ny bao
sy ny enta-mavesatra nolanjainy.

Niantso raha ory ka novonjeko,
tanaty oram-baratra novaliako.
Ianao, ry vahoakako mihainoa.
Ry Israeliko, mandrenesa.

Tandremo mitsaoka andriamani-kafa,
mandray ny andriamanitr’ireo vahiny.
Fa Izaho re no Tompo Andriamanitrao,
nampakatra anao avy tany Ejipta!

Indrisy raha nihaino Ahy ireo olon-tiako,
ka i Israely nanaraka Ahy:
Ny oloko ho nomeko vary kanto,
niampy tantely tam-batolampy!

Evanjely

Voninahitra sy dera anie ho Anao, ry Kristy!

Tsy ny mofo ihany no iveloman’ny olona, fa ny teny rehetra aloaky ny vavan’Andriamanitra.

Voninahitra sy dera anie ho Anao, ry Kristy!.

Evanjely Masina nosoratan’i Masindahy Marka (Mk. 12, 28b-34)

Ny Tompo Andriamanitsika no hany Tompo tokana, ary tiavo Izy.

Tamin’izany andro izany,
nisy mpanora-dalàna anankiray nanatona an’i Jesoa
sy nanontany Azy hoe:

“Inona no voalohany amin’ny didy rehetra?”

Ary i Jesoa namaly azy hoe:

“Ny voalohany indrindra amin’izy rehetra dia ity:

Mihainoa, ry Israely:
Ny Tompo Andriamanitsika no hany Tompo tokana
koa tiavo ny Tompo Andriamanitrao
amin’ny fonao rehetra sy amin’ny fanahinao rehetra,
sy amin’ny sainao rehetra ary amin’ny herinao rehetra.

Izany no didy voalohany.
Ary ity no faharoa mitovy aminy koa:

Tiavo ny namanao, tahaka ny tenanao.
Tsy misy didy lehibe mihoatra noho ireo.”

Dia hoy ilay mpanora-dalàna taminy:

“Tsara izany, ry Mpampianatra.
Marina indrindra ny nilazanao fa tokana Andriamanitra,
ary tsy misy hafa afa-tsy Izy,
ka ny tia Azy amin’ny fo rehetra,
sy amin’ny fanahy rehetra,
ary amin’ny hery rehetra,
ary ny tia namana tahaka ny tena,
dia lehibe lavitra noho ny sorona dorana rehetra
sy ny fanatitra hafa rehetra.”

Nony hitan’i Jesoa fa namaly tamim-pahendrena izy,
dia hoy Izy taminy:

“Tsy lavitra ny fanjakan’Andriamanitra ianao.”

Ary hatramin’izay,
dia tsy nisy olona sahy nanontany Azy intsony.

— Izany àry ny tenin’ny Tompo.

Vakiteny voalohany

Bokin’i Jeremia Mpaminany (Jer. 7, 23-28)

Ity no firenena tsy nihaino ny feon’Andriamanitra Tompony.

Izao no nolazain’ny Tompo:

“Ny amin’ny didy nomeko ny vahoakako,
dia izao no nolazaiko taminy.
Mihainoa ny feoko;
ary Izaho ho Andriamanitrareo,
ary ianareo ho vahoakako;
mizora amin’ny lalana rehetra handidiako anareo,
mba ho sambatra ianareo.
Kanefa izy ireo tsy nihaino na nanongilan-tsofina,
fa nandeha araka ny saim-pantany,
nanaraka ny hamafin’ny fo ratsiny;
nihemotra izy fa tsy nandroso.
Hatramin’ny andro nivoahan’ny razanareo tany Ejipta,
ka mandraka androany,
dia naniraka ny mpaminany mpanompoko rehetra ho any aminareo Aho,
naniraka azy vao maraina isan’andro Aho;
kanefa izy ireo tsy nihaino Ahy,
tsy nanongilan-tsofina:
fa nanamafy ny hatony,
nanao ratsy mihoatra ny razany aza.
Holazainao aminy izany rehetra izany,
nefa tsy hihaino anao izy;
hiantsoantso azy ireo ianao,
nefa tsy hamaly anao izy.
Ka dia izao no holazainao azy ireo:

‘Ity no firenena tsy nihaino ny feon’Andriamanitra Tompony,
sady tsy nety nino anatra;
very ny fahamarinana,
fa tsy eo am-bavany intsony.’”

— Izany àry ny tenin’ny Tompo.

Setriny

Salamo (Sal. 94, 1-2. 6-7. 8-9)

Enga anie ianareo anio hahaheno ny feon’ny Tompo, ary tsy hanamafy ny fonareo.

Avia! mifalia ka hobio ny Tompo,
Ilay vatolampy sy vonjintsika.
Andeha mankeo anoloany hisaotra,
hihira sy hiantsa ary hankalaza Azy.

Avia miondreha ary miankohofa.
Hitsaoka Ilay Tompo nanao antsika.
Fa Izy no tena Andriamanitsika:
isika vahoaka sy ondry fiandriny.

Aza dia mafy fo toy ny tany an’efitra,
toy ny tany Masà sy tany Meribà.
Ny razanareo dia nitsapa Ahy,
kanefa nahita ny asa vitako!

Evanjely

Dera ho Anao, ry Kristy, Mpanjakan’ny voninahitra mandrakizay.

Ario lavitra anareo ny fahadisoana rehetra nataonareo, hoy ny Tompo; ary manaova fo vaovao sy saina vaovao.

Dera ho Anao, ry Kristy, Mpanjakan’ny voninahitra mandrakizay.

Evanjely Masina nosoratan’i Masindahy Lioka (Lk. 11, 14-23)

Izay tsy momba Ahy dia manohitra Ahy.

Tamin’izany andro izany, i Jesoa,
nandroaka demony ary moana izany demony izany.
Nony voaroaka ny demony dia niteny ilay moana,
ka gaga ny vahoaka;
fa ny sasany tamin’izay teo nanao hoe:

“I Belzeboba lehiben’ny demony no androahany ny demony.”

Ary ny sasany kosa naka fanahy Azy
ka nangataka famantarana avy any an-danitra taminy.
Fa i Jesoa nahalala ny heviny ka nanao taminy hoe:

“Rava izay fanjakana miady an-trano;
mianjera mifanongoa ny trano;
ka raha miady an-trano àry i Satana,
ahoana no haharetan’ny fanjakany?
satria lazainareo fa i Belzeboba no androahako ny demony.
Ary raha amin’ny herin’i Belzeboba àry no androahako ny demony,
amin’ny herin’iza kosa no androahan’ny zanakareo azy?
Koa izy ireo ihany no ho mpitsara anareo.
Fa raha ny rantsan-tanan’Andriamanitra no androahako ny demony,
dia efa tonga aminareo tokoa ny fanjakan’Andriamanitra.
Raha lehilahy matanjaka sy ary fiadiana tsara
no miambina ny tranony,
dia voaaro ny fananany rehetra;
fa raha tonga kosa ny mahery noho izy
ka mandresy azy,
dia sady hahalasa ny fiadiany rehetra izay nitokiany
no hizara izay nobaboiny.
Izay tsy momba Ahy, dia manohitra Ahy,
ary izay tsy miara-mamory amiko dia manahaka.”

— Izany àry ny tenin’ny Tompo.

Vakiteny voalohany

Boky Deterônômy (Det. 4, 1. 5-9)

Hitandrina ny didy amam-pitsipiko ianareo, ary hanatanteraka izany amin’ny asa.

Tamin’izany andro izany,
niteny tamin’ny vahoaka i Môizy nanao hoe:

“Ankehitriny, ry Israely,
henoy ny didy amam-pitsipika atoroko,
hitandremanareo azy mba ho velona ianareo,
ka hiditra sy hanana ny tany
nomen’ny Tompo Andriamanitry ny razanareo anareo.
Efa notoroako didy amam-pitsipika ianareo
araka ny nandidian’ny Tompo ahy
hitandremanareo izany any amin’ny tany idiranareo hanananareo azy.
Koa tandremo sy tanteraho izany,
fa izany no saina amam-pahendrena ho anareo
eo imason’ny firenena izay handre izany lalàna rehetra izany,
ka ho vaky hoe:

‘Vahoaka hendry sy manan-tsaina tokoa io firenena lehibe io!’

Fa iza tokoa moa no firenen-dehibe hanana andriamanitra akaiky azy,
tahaka ny maha-akaikintsika ny Tompo Andriamanitsika
isaky ny iantsoantsika Azy?
Ary zovy no firenen-dehibe manana didy amam-pitsipika marina,
toy izao lalàna ataoko eo anoloanareo anio izao?
Kanefa mitandrema tena ianao, ary tandremo tsara ny fanahinao,
fandrao manadino ny zavatra hitan’ny masonao,
na mamela azy hiala amin’ny fonao,
na dia indray andro amin’ny fiainanao aza,
fa ampianaro ny zanakao aman-jafinao izany.”

— Izany àry ny tenin’ny Tompo.

Salamo fandinihana

Salamo (Sal. 147, 12-13. 15-16. 19-20)

Ry mpanompon’ny Tompo, ankalazao ny Andriamanitrareo.

Ry Jerosalema, aoka ianao hiantsa,
derao Andriamanitra, ry Siôna!
Ilay manamafy ny vavahady
miahy ireo ankizy ao anatinao.

Mandefa ny didiny ho ety an-tany,
dia teny miriotra tsy hay tohaina;
mandatsaka oran-toa volon’ondry,
mamafy fanala mangasohaso.

Nametraka ny hafany ho an’i Jakôba,
ny didy aman-tsatany ho an’i Israely.
Tsy misy olon-kafa nomeny izany:
ny satany manko nafeniny azy.

Evanjely

Dera sy haja ho Anao, ry Jesoa Tompo.

Sambatra izay mitandrina ny tenin’Andriamanitra, amin’ny fo marina sy tsara, sy mamoa amin’ny faharetana.

Dera sy haja ho Anao, ry Jesoa Tompo.

Evanjely Masina nosoratan’i Masindahy Matio (Mt. 5, 17-19)

Izay hanatanteraka sy hampianatra ny didy dia ho lehibe amin’ny Fanjakan’ny lanitra.

Tamin’izany andro izany,
i Jesoa niteny tamin’ny mpianany nanao hoe:

“Aza ataonareo fa tonga Aho handrava ny Lalàna na ny Mpaminany,
tsy tonga handrava Aho, fa hanatanteraka.
Fa lazaiko aminareo marina tokoa,
fa mandra-pahalevon’ny lanitra sy ny tany,
dia tsy hisy ho foana akory amin’ny Lalàna na dia “i” iray
na tendron-tsoratra iray akory aza,
mandra-pahatanterak’izy rehetra.
Koa amin’izany,
izay handika ny anankiray amin’ireo didy madinika indrindra ireo,
ka hampianatra ny olona toy izany,
dia ho kely indrindra amin’ny Fanjakan’ny lanitra;
fa izay hanatanteraka sy hampianatra ireo kosa
dia ho lehibe amin’ny Fanjakan’ny lanitra.”

— Izany àry ny tenin’ny Tompo.

Vakiteny voalohany

Bokin’i Daniely Mpaminany (Dan. 3, 25. 34-43)

Aoka ho voaray amin’ny fonay torotoro sy fanahy manetry tena izahay.

Tamin’izany andro izany,
nitsangana i Azariasa, nanao ity fivavahana ity,
ka niloa-bava tao afovoan’ny lelafo nanao hoe:

“Aza dia afoinao mandrakizay anie izahay noho ny amin’ny Anaranao,
ry Tompo Andriamanitry ny razanay,
ary aza dia esorinao aminay ny famindram-ponao,
noho ny amin’i Abrahama sakaizanao, sy i Isaaka mpanomponao ary i Israely masinao,
izay nampanantenainao hampitomboin-taranaka ho toy ny kintana eny an-danitra,
sy ny fasika eny amoron-dranomasina.
Fa efa nahena teo imason’ny firenena rehetra izahay, Tompo ô,
sady voaetry ankehitriny amin’ny tany rehetra, noho ny fahotana nataonay.
Amin’izao fotoana izao izahay tsy manana mpitondra na mpifehy,
na mpaminany, na sorona dorana, na sorona fanatitra, na emboka manitra,
na fitoerana hanateranay ny voaloham-bokatray eo anatrehanao ka hahitanay famindram-po.
Nefa, Tompo ô, aoka ho voaray ihany anie izahay
amin’izao fonay torotoro sy fanahy manetry tena,
toy ny andraisanao ireo sorona ondralahy aman’ombalahy na zanak’ondry matavy arivo;
aoka ho toy izany ny soronay ankehitriny eo anatrehanao, mbamin’ny fanekenay Anao,
fa tsy hahazo henatra izay mametraka ny fitokiany aminao.
Ankehitriny izahay manaraka Anao amin’ny fonay rehetra,
matahotra Anao sy mitady ny tavanao.
Aza atao fola-tana-manondro izahay,
fa ento araka ny hamoram-ponao, sy araka ny haben’ny famindram-ponao!
Vonjeo amin’ny fahagagana ataonao izahay,
ary omeo voninahitra ny Anaranao, Tompo ô!”

— Izany àry ny tenin’ny Tompo.

Setriny

Salamo (Sal. 24, 4bd-5ab. 6-7bd. 8-9)

Tsarovy ny indrafonao, ry Tompo.

Ny lalanao, ry Tompo, ampahafantaro ahy,
ny soritrao ampianaro ahy!
Tariho amin’ny fahamarinanao aho, ry Tompo;
fa Ianao no Andriamanitra Mpamonjy ahy.

Tsarovy ny indrafo sy hatsaram-ponao,
izay efa hatramin’ny fahagola.
Ny otako fahazaza, ry Tompo,
hadinoy noho ny hatsaram-ponao!

Tsara sy mahitsy ny Tompo:
ka ny mpanota toroany lalana;
ny ory tarihiny amin’ny hitsiny,
ny ory ampianariny ny lalany.

Evanjely

Voninahitra sy dera anie ho Anao, ry Kristy!

Tsy ny hahafatesan’ny ratsy fanahy no sitrako, fa ny hialan’ny ratsy fanahy amin’ny lalany ka ho velona izy.

Voninahitra sy dera anie ho Anao, ry Kristy!

Evanjely Masina nosoratan’i Masindahy Matio (Mt. 18, 21-35)

Raha tsy samy mamela ny rahalahinareo inareo, dia tsy havelan’ny Rainareo koa.

Tamin’izany andro izany,
nanatona an’i Jesoa i Piera, ka nanao hoe:

“Tompoko, raha diso impiry amiko moa ny rahalahiko
no tokony hamela azy aho?
Hatramin’ny impito va?”

Dia hoy i Jesoa taminy :

“Izaho tsy milaza aminao hoe hatramin’ny impito,
fa hatramin’ny impitopolo fito.
Koa amin’izany ny fanjakan’ny lanitra
dia tahaka ny mpanjaka anankiray
izay te-hamotopototra ny toe-pananany amin’ny mpanompony;
ary raha vao nanomboka nanao izany izy,
dia nentiny teo aminy ny anankiray izay ananany talenta iray alina.
Ary noho izy tsy nanan-kaloa,
dia nasain’ny tompony hamidy izy sy ny vadiny aman-janany,
mbamin’ny fananany rehetra, mba hanefana ny trosa.
Dia niankohoka ilay mpanompo,
ka nifona taminy nanao hoe:

‘Mba omeo andro aho, dia haloako daholo ny anao rehetra.’

Nangoraka ny fon’ilay tompon’izany mpanompo izany,
ka sady nandefa azy handeha no namoy ny trosa taminy.
Fa raha vao nivoaka ilay mpanompo,
dia tojo ity mpanompo namany anankiray izay ananany denie zato;
noraisiny tamin’ny tendany ilay io ka nokendainy nataony hoe:

‘Aloavy ny trosako any aminao.’

Niankohoka ilay namany, dia nifona taminy nanao hoe:

‘Mba omeo andro aho, dia haloako ny anao rehetra.’

Nefa tsy nety izy, fa lasa nampanao azy an-tranomaizina,
ambara-pandoany ny trosa.
Nalahelo loatra ny mpanompo sasany nony nahita izany,
ka lasa nilaza izany rehetra izany tamin’ny tompony.
Dia nampanalain’ny tompony izy, ka nilazany hoe:

‘Ry mpanompo ratsy fanahy,
efa nafoiko avokoa ny trosako rehetra taminao,
noho ianao nifona tamiko;
ka moa tsy tokony mba hamindra fo amin’ny namanao va ianao
tahaka ny namindrako fo taminao?’

Dia tezitra ny tompony, ka natolony ny mpampijaly izy,
ambara-pandoany ny trosa rehetra.
Dia ho tahaka izany koa no hataon’ny Raiko izay any an-danitra aminareo,
raha tsy samy mamela ny rahalahinareo amin’ny fonareo avy ianareo.”

— Izany àry ny tenin’ny Tompo.