Vakiteny voalohany

Bokin'i Izaia Mpaminany 7, 10-14

Indro hanana anaka ny Virjiny.

Tamin’izany andro izany,
niteny tamin’i Akaza ny Tompo nanao hoe:

“Mangataha famantarana amin’ny Tompo Andriamanitrao;
mangataha izany, na any amin’ny faravodin’ny Seoly,
na any amin’ny havoan’ny lanitra”.

Ka hoy i Akaza:

“Tsy hangataka aho; tsy haka fanahy ny Tompo aho”.

Ka hoy i Izaia:

“Mihainoa, ry taranak’i Davida:
Mbola tsy ampy anareo va ny mahasasatra ny olombelona,
no dia mbola mahasasatra an’Andriamanitra koa ianareo?
Noho izany dia Tenan’ny Tompo no hanome famantarana anareo;
Indro hanana anaka ny virjiny, ka hiteraka Zazalahy,
ary ny Anarany hataony hoe “Emanoela” izany hoe:
Andriamanitra eo anivontsika.”

— Izany àry ny tenin’ny Tompo.

Salamo fandinihana

Salamo 3, 1-2. 34ab. 5-6

Aoka hiditra ny Tompo, fa Izy no mpanjakan’ny voninahitra.

An’ny Tompo ny tany sy izay mameno azy,
izao tontolo izao sy ny mponina ao aminy:
Izy nanorina azy tambony ranomasina,
nampitoetra azy tambonin’ny ony.

Iza no hiakatra am-bohitry ny Tompo?
Zovy no honina amin’ny toerany masina?
Dia izay mahitsy fo sy madio tanana,
tsy mba mianiana hahavoa namana.

Izy no tahin’ny Tompo,
vonjen’ilay Andriamanitra Marina,
taranaka mitady ny Tavany,
mitady ny Andriamanitr’i Jakôba.

Vakiteny faharoa

Taratasin’i Masindahy Paoly Apôstôly ho an’ny kristianina tany Rôma 1, 1-7

I Jesoa Kristy, avy amin’ny taranak’i Davida, no Zanak’Andriamanitra.

Izaho Paoly mpanompon’i Kristy Jesoa,
voaantso ho Apôstôly,
sy voatokana hitory ny Evanjelin’Andriamanitra,
— izay nampanantenainy rahateo tamin’ny alalan’ny mpaminany ao amin’ny Soratra Masina —
dia mamangy anareo rehetra malalan’Andriamanitra any Rôma.
Io Evanjely io
no misy ny fanambaran’Andriamanitra momba ny Zanany
(izay naterak’i Davida,
ho Zanak’Andriamanitra tamin’ny fitsanganany ho velona,
araka ny fanahin’ny fahamasinana),
dia i Jesoa Kristy Tompontsika,
izay nandraisanay ny fahasoavana sy ny maha-Apôstôly anay
mba hampanaiky ny Jentily rehetra ny finoana,
amin’ny Anarany, ary anisan’ireny koa ianareo;
noho ny fiantsoan’i Jesoa Kristy.
Ry olo-masina voaantson’Andriamanitra:
ho aminareo anie ny fahasoavana amam-piadanana
avy amin’Andriamanitra Raintsika,
sy i Jesoa Kristy Tompo.

— Izany àry ny tenin’ny Tompo.

Evanjely

Aleloia. Aleloia.

Indro ny virjiny hitoe-jaza ka hiteraka Zazalahy,
ary ny Anarany hatao hoe: Emanoela,
izany hoe Andriamanitra eo anivontsika. Aleloia.

Aleloia.

Evanjely Masina nosoratan’i Masindahy Matio 1, 18-24

I Jesoa naterak’i Maria, fofombadin’i Jôsefa, zanak’i Davida.

Toy izao no nahaterahan’i Kristy:
i Maria Reniny dia efa fofombadin’i Jôsefa;
fa raha mbola tsy niray trano izy ireo,
dia hita fa nanana anaka avy tamin’ny Fanahy Masina izy.
Ary i Jôsefa vadiny, noho izy lehilahy marina
sady tsy te hanala baràka azy,
dia nikasa hametraka azy mangingina.
Nefa raha mbola nieritreritra izany izy,
dia indro nisy Anjelin’ny Tompo niseho taminy,
tamin’ny nofy ka nanao hoe:

“Ry Jôsefa, zanak’i Davida,
aza matahotra hampakatra an’i Maria vadinao,
fa ny Zaza ao an-kibony dia avy amin’ny Fanahy Masina,
ary hiteraka Zazalahy izy,
ka ny Anarany hataonao hoe Jesoa,
fa Izy no hamonjy ny olony ho afaka amin’ny fahotany”.

Ary izany rehetra izany no tonga,
dia mba hahatanteraka
izay nampilazain’ny Tompo ny mpaminany hoe:

“Indro ny Virjiny hitoe-jaza ka hiteraka Zazalahy,
ary ny Anarany hatao hoe Emanoela,
izany hoe: amintsika Andriamanitra”.

Ary rehefa nahatsiaro tamin’ny torimaso i Jôsefa,
dia nanao araka izay nandidian’ny Anjely azy,
ka nampakatra ny vadiny.

— Izany àry ny tenin’ny Tompo.

Vakiteny voalohany

Boky Jenezy 49, 2. 8-10

Tsy hiala amin’i Jodà ny tehim-panjakana.

Tamin’izany andro izany,
namory ny zanany lahy i Jakôba ary nilaza taminy hoe :

“Mivoria, ry zanakalahin’i Jakôba, ka mihainoa.
Mihainoa an’i Israely rainareo.
Ry Jodà, ianao hoderain’ny rahalahinao ;
ny tananao ho eo amin’ny vozon’ny fahavalonao,
ny zanaky ny rainao hiankohoka eo anatrehanao.
Liona tanora i Jodà: Niakatra avy nandripaka ianao, anaka.
Nanongalika izy, dia nanao fandrin-diona, fandrin-diombavy,
zovy no hanaitra azy?
Tsy hiala amin’i Jodà ny tehim-panjakana,
tsy hiala eo anelanelan’ny tongony ny tehim-pahefana,
mandra-piavin’i Silao: Izy no hotoavin’ny firenena.”

— Izany àry ny tenin’ny Tompo.

Setriny

Salamo 71, 2. 3-4ab. 7-8. 17

Ny rariny hamony amin’ny andron’ny Tompo, ary ny Fiadanana hitombo mandrakizay.

Andriamanitry ny fahamarinana ô,
mba tolory ny andriana mpanapaka
sy ny zanak’andriana ho dimbiny
ny fahaiza-mitsara ara-drariny!

Ka ny vohitra hitrotro fiadanana.
Ny havoana hivimbina ny hitsiny.
Ny mahantra sy ny ory hotsimbininy.
Ny mpamoritra kosa hofongorana.

Amin’ny androny hamony ny rariny,
ary mandra-pahafatin’ny volana.
Dia hisy fandriam-pahalemana,
lavorary sy feno tanteraka!

Ranomasina no ho sisin-taniny,
ary ny ony no ho valam-parihiny;
ka ny rafiny ombam-pahavalony
handohalika sy hilavo lefona

Ny Anarany hankalazaina
sy haharitra toy ny masoandro.
Ary indro hatao fitahiana,
ireo foko manerana an-tany.

Evanjely

Aleloia. Aleloia.

Ianao Filohan’i Davida izay mamoha ny varavaran’ny fanjakana tsy manam-pahataperana,
avia ary tsoahy amin’ny fatorany ny voagadra tazonin’ny haizina.

Aleloia.

Evanjely Masina nosoratan’i Masindahy Matio 1, 1-17

Filazana ny Razan’i Jesoa Kristy, zanak’i Davida.

Filazana ny Razan’i Jesoa Kristy,
Zanak’i Davida, Zanak’i Abrahama.

I Abrahama niteraka an’i Isaaka,
i Isaaka niteraka an’i Jakôba;
i Jakôba niteraka an’i Jodà mirahalahy avy;
i Jodà niteraka an’i Faresa sy i Zarà tamin’i Tamara;
i Faresa niteraka an’i Esrôna,
i Esrôna niteraka an’i Arama;
i Arama niteraka an’i Aminadaba;
i Aminadaba niteraka an’i Naasôna;
i Naasôna niteraka an’i Salmôna;
i Salmôna niteraka an’i Boôza tamin’i Rahaba;
i Boôza niteraka an’i Obeda tamin’i Rôta;
i Obeda niteraka an’i Jese,
i Jese niteraka an’i Davida mpanjaka.

I Davida mpanjaka niteraka an’i Salômôna tamin’ilay vadin’i Oria;
i Salômôna niteraka an’i Rôbôama;
i Rôbôama niteraka an’i Abiasa;
i Abiasa niteraka an’i Asà,
i Asà niteraka an’i Jôsafata;
i Jôsafata niteraka an’i Jôrama,
i Jôrama niteraka an’i Oziasa;
i Oziasa niteraka an’i Jôatama;
i Jôatama niteraka an’i Akaza;
i Akaza niteraka an’i Ezekiasa;
i Ezekiasa niteraka an’i Manase,
i Manase niteraka an’i Amôna;
i Amôna niteraka an’i Jôsiasa;
i Jôsiasa niteraka an’i Jekôniasa mirahalahy avy,
tamin’ny andro nifindrana tany Babilôna.

Ary rahefa nifindra tany Babilôna,
i Jekôniasa niteraka an’i Salatiela;
i Salatiela niteraka an’i Zôrôbabela;
i Zôrôbabela niteraka an’i Abioda,
i Abioda niteraka an’i Eliakima;
i Eliakima niteraka an’i Azôra,
i Azôra niteraka an’i Sadôka;
i Sadôka niteraka an’i Akima;
i Akima niteraka an’i Elioda;
i Elioda niteraka an’i Eleazara;
i Eleazara niteraka an’i Matana,
i Matana niteraka an’i Jakôba;
ary i Jakôba niteraka an’i Jôsefa vadin’i Maria
izay niteraka an’i Jesoa ilay atao hoe Kristy.

Koa ny taranaka rehetra
hatramin’i Abrahama ka hatramin’i Davida,
dia taranaka efatra ambin’ny folo;
ary hatramin’i Davida ka hatramin’ny nifindrana tany Babilôna,
dia taranaka efatra ambin’ny folo;
ary hatramin’ny nifindrana tany Babilôna ka hatramin’i Kristy,
dia taranaka efatra ambin’ny folo.

— Izany àry ny tenin’ny Tompo.

Vakiteny voalohany

Bokin’i Izaia Mpaminany 56, 1-3a. 6-8

Ny tranoko hatao hoe: Trano fivavahana ho an’ny firenena rehetra.

Izao no lazain’ny Tompo:
Tandremo ny hitsiny ary araho ny rariny,
fa efa akaiky ny famonjeko, ary efa hiseho ny fahamarinako.
Sambatra ny olona hanao izany,
sy ny zanak’olombelona hifikitra mafy amin’izany,
ka hitandrina ny sabata, tsy mandika azy,
sy hifehy ny tanany tsy hanao ratsy akory!
Aoka ny hafa firenena efa nifikitra tamin’ny Tompo tsy hanao hoe:

“Hoesorin’ny Tompo marina aho,
tsy ho isam-bahoakany.”

Ary ny hafa firenena izay mifikitra amin’ny Tompo
mba hanompo Azy sy ho tia ny Anarany ary ho mpanompony;
izay rehetra mitandrina ny sabata fa tsy mandika azy,
sy miraikitra mafy amin’ny fanekeko,
dia hoentiko ho ao an-tendrombohitra masina,
sy hampifaliako ao an-tranoko fivavahana,
hankasitrahina eo ambony ôtely ny sorony dorana aman-tsorony:
fa ny tranoko hatao hoe:

“Trano fivavahana ho an’ny firenena rehetra”

— teny marin’ny Tompo — izay mamory ny lasan-ko babo amin’i Israely!
Mbola hamory ny sasany koa Aho ho eo aminy,
hanampy ireo efa voavory sahady.

— Izany àry ny tenin’ny Tompo.

Setriny

Salamo 66, 2-3. 5. 7-8

Hidera Anao ny vahoaka, ry Andriamanitra, hidera Anao ny vahoaka rehetra.

Hiantran’Andriamanitra anie isika hotsimbininy;
ka hataony mamiratra eo amintsika ny tavany.
Dia ho fantatry ny olona eran-tany ny herinao,
ka hanerana ireo firenen-drehetra ny vonjinao.

Aoka hifaly sy hiantsa ny firenena isan-tokony,
fa Ianao dia mitsara azy rehetra ireny ara-drariny.
Fa Ianao dia mitsara vahoaka araka ny hitsiny
sy manjaka amin’ireo firenen-drehetra isan-tokony.

Fa ny tany volena tsy misy izay tsy mamokatra.
Andriamanitra mantsy Andriamanitsika: mitsimbina.
Enga anie ka hitsimbina antsika hatrany Andriamanitra,
ka ho masina eran’ny vazan-tany ny Anarany.

Evanjely

Aleloia. Aleloia.

Ampodio izahay, ry Tompo Andriamanitray ô,
ny tavanao aseho dia ho voavonjy izahay.

Aleloia.

Evanjely Masina nosoratan’i Masindahy Joany 5, 33-36

I Joany dia jiro nirehitra sy nazava.

Tamin’izany andro izany,
i Jesoa niteny tamin’ny Jody nanao hoe:

“Naniraka tany amin’i Joany ianareo, ary nanambara ny marina izy.
Tsy dia ny fanambarana avy amin’ny olona anefa no iankinako,
fa ny mba hahavoavonjy anareo no hilazako izany.
I Joany dia jiro nirehitra sy nazava,
ka nahafinaritra anareo sy nifalianareo vetivety ny fahazavany.
Fa manana fanambarana manoatra ny an’i Joany Aho,
satria ny asa nomen’ny Ray hovitaiko sady ataoko tokoa
no manambara fa iraky ny Ray Aho.”

— Izany àry ny tenin’ny Tompo.

Vakiteny voalohany

Bokin’i Izaia Mpaminany 54, 1-10

Hoatra ny vady nafoy sy tra-pahoriana no ampodian’ny Tompo anao.

Mihobia an-kafaliana, ry momba, izay tsy niteraka;
mampisehoa hafaliana sy firavoravoana lehibe, ry tsy mba nihetsi-jaza;
fa ny zanak’ilay nariana no maro,
noho ny zanak’izay manam-bady, hoy ny Tompo.
Halalaho ny itoeran’ny lay, velaro ny ambaim-ponenanao,
aza hazonina fa alefaso ho lava ny tadinao,
ary aoreno mafy ny tsima-day!
Fa hitatra miankavanana sy miankavia ianao;
ary haka fonenana amin’ny firenena ny taranakao;
ary hanisy mponina amin’ny tanàna lao Izy.
Aza matahotra, fa tsy ho menatra ianao;
aza mangaihay, fa tsy hisy hahamenatra anao;
fa hanadino ny henatry ny fahatanoranao ianao;
ary tsy hahatsiaro intsony ny tondromaso, fony mpitondratena.
Fa ny vadinao dia ny Mpahary anao; Tompon’ny tafika no Anarany,
ary ny Mpanavotra anao dia Ilay Masin’i Israely.
Andriamanitry ny tany aman-danitra no iantsoana Azy.
Hoatra ny vady nafoy sy tra-pahoriana no ampodian’ny Tompo anao,
hoatra ny vadin’ny fahatanorana efa nisaorana, hoy ny Andriamanitrao.
Vetivety foana, kelikely foana no nahafoizako anao,
fa amin’indrafo lehibe kosa no amoriako anao.
Tamin’ny firehetan’ny hatezerako
no nanafenako vetivety ny tavako taminao,
fa amim-pitiavana mandrakizay kosa no angorahako anao,
hoy ny Tompo Mpanavotra anao.
Dia ho toy ilay ranon’i Nôe izany amiko,
nony nianiana Aho fa ilay ranon’i Nôe
tsy hiely intsony amin’ny tany:
toy izany koa no nianianako
fa tsy ho tezitra aminao na handrahona anao intsony Aho.
Na dia hihataka aza ny tendrombohitra ka hihozongozona ny havoana,
ny fitiavako tsy mba hiala aminao,
ary ny fanekem-pihavanako tsy mba hikorontana,
hoy ny Tompo ilay mangoraka anao.

— Izany àry ny tenin’ny Tompo.

Setriny

Salamo 29, 2 sy 4. 5-6. 11-12a sy 13b

Izaho midera ny Tompo izay nanafaka ahy.

Izaho midera ny Tompo izay nanafaka ahy:
tsy navelanao hifalian’ny fahavaloko aho!
Ny fanahiko, ry Tompo ô, nakarinao avy any an-tSeoly;
novelominao aho izay efa nitsìtra tany an-davaka.

Antsao ny Tompo, ianareo mpivavaka! Isaory ny Anarany masina!
Indray mihelina Izy vinitra; tontolo fiainana manambina.
Hariva, mialin-tomany; maraina, velon-kalo.

Mandrenesa, ry Tompo, iantrao aho! Tompo ô, tahio aho!
Navadikao ho dihy ny toreoko.
Ry Tompo Andriamanitro ô, mandrakizay no isaorako Anao.

Evanjely

Aleloia. Aleloia.

Amboary ny lalan’ny Tompo, ahitsio ny halehany,
dia hahita ny famonjen’Andriamanitra ny nofo rehetra.

Aleloia.

Evanjely Masina nosoratan’i Masindahy Lioka 7, 24-30

I Joany no anjely manomana ny lalan’ny Tompo.

Nony lasa ny irak’i Joany,
dia nambaran’i Jesoa tamin’ny vahoaka ny aminy ka hoy Izy:

“Hizaha inona no nalehanareo tany an’efitra?
Volotara hozongozonin’ny rivotra va?
Sa hizaha inona no nalehanareo tany?
Lehilahy tsara fitafiana va?
Raha izay tsara fitafiana sy manao fiainana,
dia any an-tranon’ny mpanjaka no itoerany.
Sa hizaha inona no nalehanareo tany?
Mpaminany va?
Eny, hoy Aho aminareo, ary ambony noho ny mpaminany aza.
Fa Izy no ilay voasoratra hoe:
Indro Aho maniraka ny anjeliko eo anoloanao
mba hamboatra lalana eo alohanao.
Koa lazaiko aminareo fa amin’izay natera-behivavy
tsy misy mpaminany lehibe noho i Joany Batista,
nefa izay kely indrindra amin’ny Fanjakan’Andriamanitra, no lehibe noho izy.
Ary ny vahoaka rehetra izay nandre azy mbamin’ny poblikanina
na dia nanamarina an’Andriamanitra, tamin’ny nandraisany ny batemin’i Joany;
fa ny Farisianina sy ny mpampiana-dalàna kosa
nanatsinontsinona ny fikasan’Andriamanitra ny aminy
tamin’ny nandavany ny batemin’i Joany.”

— Izany àry ny tenin’ny Tompo.

Vakiteny voalohany

Bokin’i Izaia Mpaminany 45, 6b-8. 18. 21b-25

Ampidino, ry lanitra, ny andonao avy any ambony.

“Izaho no Tompo, ary tsy misy hafa.
Izaho no mamorona ny mazava, sy mahary ny maizina;
manao ny fiadanana sy mahary ny loza;
Izaho Tompo no manao izany rehetra izany.
Ampidino, ry lanitra, ny andonao avy any ambony;
ary aoka ny rahona
handatsaka ny fahamarinana toy ny ranon’orana!
Aoka ny tany hisokatra, hahavokatra ny famonjena,
ka hampitsimoka ny fahamarinana miaraka amin’izany!
Izaho Tompo no mahary ireo zavatra rehetra ireo.”

Izao no lazain’ny Tompo, izay nahary ny lanitra,
Izy dia ilay Andriamanitra namorona ny tany
sy nahavita ary nampiorina azy,
ka tsy nataony ho zava-mifanjevo foana,
fa nataony ho fonenana:

“Izaho no Tompo, ary tsy misy hafa!
Ary tsy misy Andriamanitra afa-tsy Izaho.
Izaho no Andriamanitra marina,
ary tsy misy mpamonjy afa-tsy Izaho.
Mitodiha aty amiko dia hovonjena ianareo,
ianareo rehetra mponina amin’ny tany,
fa Izaho no Andriamanitra ary tsy misy hafa.
Efa nianiana tamin’ny Tenako Aho;
ny marina no aloaky ny vavako, dia ny teny iray,
izay tsy hofoanana.
Ny lohalika rehetra handohalika amiko,
ary ny lela rehetra hianiana amiko.
Izao no hilazan’ny olona Ahy:
Amin’ny Tompo irery no mitoetra
ny fahamarinana sy ny hery!”

Hanatona Azy ny olona,
fa ho menatra kosa izay rehetra tezitra taminy.
Hohamarinina sy homem-boninahitra
ao amin’ny Tompo avokoa ny taranak’i Israely rehetra.

— Izany àry ny tenin’ny Tompo.

Setriny

Salamo 84, 9ab-10. 11-12. 13-14

Ampidino, ry lanitra, ny andonao avy any ambony ary aoka ny rahona handatsaka ny fahamarinana.

Mba tiako tokoa ny handre Azy Tompo,
mirary fiadanana ho an’ireo tiany,
mirary fiadanana ho an’ireo olo-miandrandra ny tavany.

Akaiky izay mino Azy Tompo ny vonjy.
Honenan’ny lazany ety amintsika
koa indro mihaona tokoa ny indrafo sy ny fahamarinana.

Ny rariny ombam-piadanana hatrany,
ny hitsiny hita mitsiry amin’ny tany,
mitsinjo avy eny amin’ny rahon’ny lanitra koa ny rariny.

Handrotsaka orana anie Izy Tompo,
izay hampamokatra tsara ny tany
fa lalan-kizoran’ny Tompo ny rariny ombam-piadanana.

Evanjely

Aleloia. Aleloia.

Tongava, ry Tompo, ary aza ela:
vahao ny fatoran’ny vahoakanao.

Aleloia.

Evanjely Masina nosoratan’i Masindahy Lioka 7, 19-23

Ambarao an’i Joany izay rehetra renareo sy hitanareo.

Tamin’izany andro izany
niantso roa lahy tamin’ny mpianany i Joany
nalefany ho any amin’i Jesoa hanao aminy hoe:

“Ianao va no Ilay ho avy,
sa mbola hafa no handrasantsika?”

Nony tonga tany aminy ireo dia nanao hoe:

“Nirahin’i Joany Batista hankatý aminao izahay
hanontany raha Ianao no Ilay ho avy,
na mbola hafa no andrasantsika.”

Tamin’izay indrindra i Jesoa
dia nanasitrana olona maro
niferinaina tamin’ny aretina sy ny rofy ary ny fanahy ratsy,
sady nampahiratra jamba maro koa,
koa izao no navaliny an’ireto iraka:

“Mandehana lazao amin’i Joany izay zavatra renareo sy hitanareo:
mahiratra ny jamba, mandeha ny mandringa,
madio ny boka, malady ny marenina, mitsangan-ko velona ny maty,
torîna amin’ny mahantra ny Evanjely,
ary sambatra izay rehetra tsy ho tafintohina noho ny amiko.”

— Izany àry ny tenin’ny Tompo.