Vakiteny voalohany

Boky Fanambarana nosoratan’i Masindahy Joany Apôstôly (Apôk. 7, 2-4. 9-14)

Nahita vahoaka be tsy azon’olona isaina aho, avy amin’ny firenena rehetra sy ny fokom-pirenena ary ny fanjakana mbamin’ny samihafa fiteny rehetra.

Izaho Joany dia nahita Anjely iray hafa,
niakatra avy amin’ny fiposahan’ny masoandro,
nitana ny fitombok’Andriamanitra velona
ary niantso mafy an’ireo Anjely efatra
nasaina hanimba ny tany aman-dranomasina,
nanao hoe:

“Aza manimba ny tany na ny ranomasina na ny hazo,
mandra-panisinay fitomboka
eo amin’ny handrin’ny mpanompon’ny Andriamanitsika”.

Ary reko ny isan’izay voaisy fitomboka tamin’ny fokon’i Israely rehetra,
ka efatra arivo sy efatra alina sy iray hetsy izy.
Nanaraka izany,
dia nahita vahoaka be tsy azon’olona isaina aho,
avy amin’ny firenena rehetra sy ny fokom-pirenena
ary ny fanjakana mbamin’ny samihafa fiteny rehetra,
nitsangana teo anoloan’ny seza fiandrianana sy ny Zanak’ondry,
miakanjo fotsy sy mitana sampan-drofia.
Niantso tamin’ny feo mahery izy ireo nanao hoe:

“An’Andriamanitra izay mipetraka eo amin’ny seza fiandrianana
sy ny Zanak’ondry ny famonjena!”

Dia nitsangana nanodidina ny seza fiandrianana
sy ireo Anti-dahy ary ny Zava-manana aina efatra,
ny Anjely rehetra,
ka niankohoka teo anoloan’ny seza fiandrianana,
nitsaoka an’Andriamanitra nanao hoe:

“Amen!
An’Andriamanitra mandrakizay mandrakizay
ny dera amam-boninahitra,
ny fahendrena amam-pankasitrahana,
ny haja amam-pahefana ary ny hery!”

Tamin’izany ny iray tamin’ireo Anti-dahy
anao tamiko hoe:

“Iza moa ireo miakanjo fotsy,
ary avy aiza no niaviany?”

Dia hoy ny navaliko azy:

“Ianao no mahalala, Tompoko”.

Ary hoy izy tamiko:

“Ireo no avy tamin’ny fampijaliana lehibe,
nanasa sy nanadio ny akanjony tamin’ny Ran’ny Zanak’ondry .

— Izany àry ny tenin’ny Tompo.

Salamo fandinihana

Sal. 23, 1-2. 3-4ab. 5-6

Izany no dimbin’ireo izay nizaha ny Endrik’ilay Andriamanitra Tompo.

An’ny Tompo ny tany sy izay mameno azy,
izao tontolo izao sy ny mponina ao aminy:
Izy nanorina azy teo ambony ranomasina,
nampitoetra azy teo ambonin’ny ony.

Iza no hiakatra ao am-bohitry ny Tompo?
Zovy no honina ao an-toerany masina?
Izay mahitsy fo sy madio tanana,
tsy mba mianiana hahavoa namana.

Izy no tahin’ny Tompo,
vonjen’ilay Andriamanitra Marina,
taranaka mitady ny Tavany,
mitady ny Andriamanitr’i Jakôba.

Vakiteny faharoa

Taratasy Voalohan’i Masindahy Joany Apôstôly (1 Jo. 3, 1-3)

Hahita an’Andriamanitra araka ny tena toetrany isika.

Ry hava-malala,
endrey ity haben’ny fitiavan’Andriamanitra antsika,
amin’ny iantsoana antsika hoe zanak’Andriamanitra
sady tena zanany tokoa isika!
Fa izao tontolo izao no tsy mahalala antsika,
dia noho izy tsy mahalala Azy.
Ry hava-malala,
zanak’Andriamanitra isika ankehitriny,
nefa mbola tsy naseho izay ho tena toetrantsika;
fa amin’ny andro hampisehoana izany,
dia fantatsika fa hanahaka Azy isika,
satria hahita Azy araka ny tena toetrany.
Izay rehetra manana izany fanantenana izany ao aminy
dia manadio ny tenany mba ho madio tahaka Azy.

— Izany àry ny tenin’ny Tompo.

Evanjely

Aleloia. Aleloia.

Mankanesa aty amiko ianareo rehetra izay mitondra fahoriana sy vesaram-pijaliana, fa hanamaivana Anareo Aho, hoy ny Tompo.

Aleloia.

Evanjely Masina nosoratan’i Masindahy Matio (Mt. 5, 1-12a)

Mifalia sy miravoravoa, fa lehibe ny valisoanareo any an-danitra.

Tamin’izany andro izany,
i Jesoa, nony nahita ny vahoaka nanaraka Azy,
dia niakatra teo an-tendrombohitra,
ary rehefa tafapetraka Izy,
dia nanatona Azy ny mpianany,
ka niloa-bava Izy nampianatra azy nanao hoe:

“Sambatra ny mahantra am-panahy,
fa azy ny Fanjakan’ny lanitra.
Sambatra ny malemy fanahy,
fa izy no handova ny tany.
Sambatra izay mitomany,
fa halàna alahelo.
Sambatra izay noana sy mangetaheta ny fahamarinana,
fa ho voky izy.
Sambatra ny mamindra fo,
fa hamindrana fo izy.
Sambatra ny madio fo,
fa hahita an’Andriamanitra izy.
Sambatra ny tia fihavanana,
fa hantsoina hoe zanak’Andriamanitra izy.
Sambatra ny miaritra ny fanenjehana noho ny rariny,
fa azy ireo ny Fanjakan’ny lanitra.
Sambatra ianareo raha tevatevaina sy enjehina
ary ampangaina lainga amin’ny ratsy rehetra noho ny amiko:
mifalia sy miravoravoa ianareo,
fa lehibe ny valisoanareo any an-danitra”.

— Izany àry ny tenin’ny Tompo.

Vakiteny voalohany

Taratasin’i Masindahy Paoly Apôstôly ho an’ny kristianina tany Efezy (Efez. 6, 10-20)

Raiso ny fiadian’Andriamanitra, dia hijoro tsara ianareo.

Ry kristianina havana,
mahereza ao amin’ny Tompo sy amin’ny heriny mahefa ny zavatra rehetra.
Tafio avokoa ny fiadian’Andriamanitra,
dia tsy hiraika amin’izay fanangolen’ny demony akory ianareo.
Fa tsy amin’ny nofo aman-dra no iadiantsika,
fa amin’ny fifehezana, amin’ny fahefana, amin’ny andrian’izao tontolo maizina izao,
amin’ny fanahy ratsy eny ambony eny.
Koa raiso avokoa àry ny fiadian’Andriamanitra,
mba hahazoanareo manohitra amin’ny andro ratsy,
dia hijoro tsara ianareo rahefa niala nenina.
Aza miraika, fa sikino fahamarinana ny andilanareo,
tafio ny rariny ho fiarovan-tratra,
kiraroy fahavononan-kitory ny Evanjelim-pihavanana ny tongotrareo;
fanampin’ireo rehetra ireo,
dia ny finoana no raiso ho ampinga hamonoanareo ny tsipìka afo rehetra alefan’ilay Ratsy.
Raiso koa ny fanantenam-pamonjena ho fiarovan-doha,
ary ny tenin’Andriamanitra ho sabatry ny fanahy.
Ataovy lalandava ao amin’ny Fanahy ny fangatahana amam-pifonana rehetra,
amin’izany dia miambena amin’ny faharetana rehetra,
sy amin’ny fivavahana ho an’ny olona masina rehetra;
dia ho ahy koa, mba homena ahy ny hiloa-bava an-kasahiana,
hampahafantatra ny hevi-miafina ambaran’ny Evanjely,
(izay anaovako ny raharahan’ny ambasadaoro eo am-pigadrana)
dia hitory azy tsy amin-tahotra araka izay mety hataoko aho.

— Izany àry ny tenin’ny Tompo.

Setriny

Salamo 143, 1. 2. 9-10

Isaorana ny Tompo, Vatolampiko!

Isaorana
ny Tompo Vatolampiko,
Ilay mampianatra ny tanako hamely;
ny sandriko hiady.

Ilay Fialofako sy toera-mafy ho ahy,
fiarovana avo ho ahy sy mpanafaka ahy!
Ilay ampinga sy aroko,
mampietry vahoaka maro ho eo ambaniko!

Andriamanitra ô! hira vao no hiraiko aminao!
Valiha tory folo no iantsàko Anao!
Ianao ilay manome fandresena ny mpanjaka,
sy manafaka an’i Davida mpanomponao.

Evanjely

Aleloia. Aleloia.

Niantso antsika tamin’ny alalan’ny Evanjely Andriamanitra, mba hahazoantsika ny voninahitr’i Jesoa Kristy Tompontsika.

Aleloia.

Evanjely Masina nosoratan’i Masindahy Lioka (Lk. 13, 31-35)

Tsy mety raha mpaminany ka dia vonoina any ivelan’i Jerosalema.

Tamin’izany andro izany,
dia nisy Farisianina sasany nanatona an’i Jesoa, ka nanao taminy hoe:

“Mandehana miala eo Ianao, fa tadiavin’i Herôda hovonoina.”

Dia hoy Izy tamin’ireo:

“Mandehana lazao amin’izany amboadia izany hoe:
Indro mandroaka demony sy manasitrana marary Aho anio sy rahampitso,
fa amin’ny andro fahatelo vao ho tanteraka ny amiko.
Kanefa tsy maintsy tohiziko ihany ny diako anio sy rahampitso ary rahafakampitso;
satria tsy mety raha mpaminany ka dia hovonoina ivelan’i Jerosalema.
Ry Jerosalema, ry Jerosalema,
izay mamono ny mpaminany sy mitora-bato izay irahina aminao,
impiry re no nitadiavako hamory ny zanakao
tahaka ny reniakoho mambomba ny zanany eo ambany elany, fa tsy nety ianareo!
Ary indro fa avela aminareo ny tranonareo.
Fa lazaiko aminareo fa tsy hahita Ahy intsony ianareo ambara-pilazanareo hoe:
Hosoavina anie Ilay avy, amin’ny Anaran’ny Tompo.”

— Izany àry ny tenin’ny Tompo.

Vakiteny voalohany

Taratasin’i Masindahy Paoly Apôstôly ho an’ny kristianina tany Efezy (Efez. 6, 1-9)

Aza manompo eo imaso fotsiny fa aoka ho toy ny mpanompon’i Kristy.

Ry zanaka, maneke ao amin’ny Tompo ny ray aman-dreninareo, fa izany no rariny.
Manajà ny ray aman-dreninao,
io no voalohan-didy misy teny fampanantenana dia ny hoe:
mba hahita soa sy ho ela velona ety ambonin’ny tany ianao.
Ianareo ray aman-dreny kosa, aza mampahatezitra ny zanakareo,
fa beazo amin’ny famaizana amam-pananarana ao amin’ny Tompo izy.
Ianareo mpanompo, maneke ny tomponareo araka ny nofo, amim-pahatahorana sy fangovitana,
ary amim-pahatsoram-po, toy ny anekena an’i Kristy;
aza manompo eo imaso fotsiny, toy ny mila sitraka amin’olombelona,
fa toy ny mpanompon’i Kristy, manao ny sitrapon’Andriamanitra amin’ny fo tokoa;
ary manompoa amim-pitiavana, toy ny manompo ny Tompo fa tsy ny olombelona;
satria fantatrareo marina fa isam-batan’olona, na mpanompo na olona afaka,
dia samy hovalian’Andriamanitra soa, amin’izay soa nataony avy.
Ianareo tompo koa, mba manaova toy izany amin’izy ireo, ka ajanony ny fandrahonana,
satria fantatrareo fa tsy mba mizaha tavan’olona ilay Tompon’izy ireo
sy Tomponareo any an-danitra.

— Izany àry ny tenin’ny Tompo.

Setriny

Salamo 144, 10-11. 12-13ab. 13de-14

Mahatoky amin’ny teniny rehetra ny Tompo.

Tompo ô, midera Anao ny asanao rehetra!
Misaotra Anao ny mpivavaka aminao!
Miresaka ny voninahitry ny Fanjakanao izy ireo,
sy miteny ny asanao mahery.

Mba ho fantatry ny olombelona ny asanao mahery,
sy ny voninahitra sy harevaky ny fanjakanao!
Fanjakana mandrakizay tokoa ny Fanjakanao;
amin’ny taona mifandimby ny fahefanao!

Mahatoky amin’ny teniny rehetra ny Tompo,
ary tsara fo amin’ny asany rehetra!
Ny Tompo manohana izay rehetra ho lavo,
sy mampitraka izay mitanondrika.

Evanjely

Aleloia. Aleloia.

Tsy ny mofo ihany no iveloman’ny olona, fa ny teny rehetra aloaky ny vavan’Andriamanitra.

Aleloia.

Evanjely Masina nosoratan’i Masindahy Lioka (Lk. 13, 22-30)

Hisy olona avy any Atsinanana sy Andrefana, hipetraka hihinana eo amin’ny Fanjakan’Andriamanitra.

Tamin’izany andro izany,
i Jesoa nitety tanàna sy vohitra maro ka nampianatra sy nandroso ho any Jerosalema.
Ary nisy olona anankiray nanontany Azy hoe:

“Tompoko, moa dia vitsy ihany no ho voavonjy?”

Ka hoy Izy tamin’ny olona:

“Mikeleza aina hiditra amin’ny varavarana ety;
fa lazaiko aminareo fa maro no hitady hiditra nefa tsy ho afaka.
Satria raha efa hitsangana manidy ny varavarana ny tompon-trano no tavela any alatrano ianareo
ka handondòna ny varavarana hanao hoe:
‘Tompoko, vohay izahay’,
dia hovaliany hoe:
‘Tsy fantatro izay niavianareo.’
Ary amin’izay ianareo dia hanao hoe:
‘Nihinana sy nisotro teo anatrehanao izahay,
ary nampianatra teny amin’ny kianjanay Ianao.’
Fa hovaliany hoe:
‘Lazaiko aminareo fa tsy fantatro izay niavianareo;
mialà amiko ianareo rehetra mpanao ratsy.’
Ary amin’izay vao hisy fitomaniana sy fikitroha-nify
rahefa hitanareo eo amin’ny fanjakan’Andriamanitra
i Abrahama sy i Isaaka ary i Jakôba mbamin’ny mpaminany rehetra,
fa ianareo kosa ho voaroaka any ivelany.
Hisy olona avy any Atsinanana sy Andrefana, ary avy any Avaratra sy Atsimo,
hipetraka hihinana eo amin’ny fanjakan’Andriamanitra.
Ary indro hisy farany izay ho voalohany, ary hisy voalohany ho farany.”

— Izany àry ny tenin’ny Tompo.

Vakiteny voalohany

Taratasin’i Masindahy Paoly Apôstôly ho an’ny kristianina tany Efezy (Efez. 5, 21-33)

Lehibe io zava-miafina io fa mankamin’i Kristy sy ny Eglizy.

Ry kristianina havana, mahaiza mifanoa amim-pahatahorana an’i Kristy.
Ianareo vehivavy, maneke ny vadinareo, toy ny anekena ny Tompo;
fa ny lahy no lohan’ny vavy, tahaka an’i Kristy no lohan’ny Eglizy
izay vatany sy manana Azy ho Mpamonjy.
Koa tahaka ny aneken’ny Eglizy an’i Kristy
no tsy maintsy aneken’ny vehivavy ny vadiny koa amin’ny zavatra rehetra.
Ianareo lehilahy, tiava ny vadinareo,
toy ny nitiavan’i Kristy ny Eglizy, sy hahafoizany tena ho azy,
mba hanamasina azy rahefa nodioviny tamin’ny fanasana amin’ny rano sy ny teny izy,
ka hanolotra azy ho an’ny tenany ho Eglizy be voninahitra, tsy misy panda,
na ketrona, na zavatra toy izany, fa masina tsy manan-tsiny amam-pondro.
Toy izany koa no tsy maintsy hitiavan’ny lehilahy ny vadiny, izay tenany ihany;
koa izay tia ny vadiny dia tia ny tenany.

Ny olona tsy misy mankahala ny nofony, fa mamelona sy miahy azy,
toy ny ataon’i Kristy amin’ny Eglizy,
satria rantsam-batany, avy amin’ny nofo aman-taolany isika.
Noho izany, handao ny ray aman-dreniny ny lehilahy ka hikambana amin’ny vadiny,
dia ho nofo iray ihany izy roroa.
Misy zava-miafina lehibe amin’io, dia mankamin’izy Kristy sy ny Eglizy no lazaiko.
Fa izao: samia ianareo lehilahy tia ny vadiny tahaka ny tenany;
ary aoka ny vehivavy hanaja ny vadiny.

— Izany àry ny tenin’ny Tompo.

Setriny

Salamo 127, 1-2. 3. 4-5

Sambatra izay rehetra matahotra ny Tompo.

Sambatra izay rehetra matahotra ny Tompo,
sy mizotra amin’ny Lalany!
Mahazo voka-tsoa amin’ny asanao ianao:
ka sambatra sy tretrika!

Ny vadinao:
foto-boaloboka mahavokatra ao anivon-tranonao!
Ny zanakao
solofon’ôliva manodidina ny latabatrao!

Izany tokoa no fitahiana
ny lehilahy matahotra ny Tompo!
Eny, hitahy anao avy ao Siôna anie ny Tompo
hahitanao ny hasambaran’i Jerosalema amin’ny andro rehetra hiainanao.

Evanjely

Aleloia. Aleloia.

Raiso amim-pahalemem-panahy ny teny voafafy aminareo, izay mahavonjy ny fanahinareo.

Aleloia.

Evanjely Masina nosoratan’i Masindahy Lioka (Lk. 13, 18-21)

Ny voan-tsinapy nambolena tonga hazo.

Tamin’izany andro izany, i Jesoa niteny hoe:

“Ny inona no tahaka ny fanjakan’Andriamanitra, ary ny inona no hanoharako azy?
Tahaka ny voan-tsinapy izy izay nalain’ny olona ka namboleny tamin’ny tanimboliny,
dia nitombo ka tonga hazo, ary nitoeran’ny voromanidina ny rantsany.”

Dia hoy indray Izy:

“Inona no hanoharako ny fanjakan’Andriamanitra?
Tahaka ny lalivay izay nalain’ny vehivavy anankiray izy,
ka nampifangaroiny tamin’ny lafarinina intelon’ny famarana
mba hampibohaka ny koban-dafarinina rehetra.”

— Izany àry ny tenin’ny Tompo.

Vakiteny voalohany

Taratasin’i Masindahy Paoly Apôstôly ho an’ny kristianina tany Efezy (Efez. 2, 19-22)

Ny Apôstôly no fanorenana nandrafetana anareo.

Ry kristianina havana,
tsy olon-ko azy na vahiny intsony ianareo,
fa mpiray fanjakana amin’ny olo-masina
sy isam-pianakavian’Andriamanitra;
ny Apôstôly sy ny Mpaminany no fanorenana nandrafetana anareo
ary i Kristy Jesoa indrindra no vato fehizoro.
Fa ao aminy no isondrotan’ny rafitra rehetra mirindra tsara,
mba hiforona ho tempoly masina ao amin’ny Tompo;
ao aminy no andrafetan’ny Fanahy Masina anareo
ho trano onenan’Andriamanitra.

— Izany àry ny tenin’ny Tompo.

Salamo fandinihana

Sal. 18, 2-3. 4-5

Manerana ny tany rehetra ny feony.

Ny lazan’ny Tompo ambaran’ny lanitra,
ny asany kosa torìn’ny habakabaka,
ny andro milaza amin’ny andro manaraka,
ny alina indray mitantara amin’ny alina.

Tsy teny lazainy, tsy volana ambarany,
tsy feo mba manako ho renesin’ny sofina:
kanefa dia tsinjo eran-tany ny baikony:
miely tsy tana ny hafatra entiny.

Evanjely

Aleloia. Aleioia.

Midera Anao izahay, ry Andriamanitra, ary manaiky fa Ianao no Tompo; ny antokon’ny Apôstôly be voninahitra dia midera Anao, ry Tompo.

Aleloia.

Evanjely Masina nosoratan’i Masindahy Lioka (Lk. 6, 12-16)

Nifidy roa ambin’ny folo lahy tamin’izy ireo i Jesoa, ka nomeny anarana hoe Apôstôly.

Tamin’izany andro izany,
dia lasa tany an-tendrombohitra i Jesoa mba hivavaka,
ka nivavaka tamin’Andriamanitra nandritra ny alina.
Nony maraina ny andro dia niantso ny mpianany Izy
ka nifidy roa ambin’ny folo lahy tamin’izy ireo,
izay nomeny anarana hoe Apôstôly:
dia i Simôna izay nataony hoe i Piera,
sy i André rahalahiny
i Jakôba sy i Joany,
i Filipo sy i Bartelemy,
i Matio sy i Tômà,
i Jakôba zanak’i Alfe,
sy i Simôna izay atao hoe Zelôty,
ary i Joda rahalahin’i Jakôba,
sy i Jodasy Iskariôta ilay namadika.

— Izany àry ny tenin’ny Tompo.

Vakiteny voalohany

Bokin’i Jeremia Mpaminany (Jer. 31, 7-9)

Haveriko eo amin’ny vahoaka ny jamba sy ny mandringa.

Izao no lazain’ny Tompo:
Mihobia an-kafaliana ny amin’i Jakôba,
manaova firavoravoana, noho ny amin’ilay lohan’ny firenena;
ataovy re ny feonareo, mihirà hira fiderana, ka lazao hoe:
Ry Tompo, vonjeo ny olonao, dia ny sisa amin’i Israely!
Indro Aho mamerina azy, avy any amin’ny tany avaratra;
manangona azy, avy any amin’ny faran’ny tany.
Ho eo amin’izy ireo ny jamba sy ny mandringa,
ny manana anaka sy ny efa mihetsi-jaza;
hanao dia be izy ireo no hiverina aty.
Hiverina amin-dranomaso izy;
ary eo amin’ny fifonany no hitondrako azy miverina;
eny amin’ny rano velona, no hitarihako azy,
amin’ny lalana marin-tampona tsy hahatafintohina azy;
satria efa ray ho an’i Israely Aho, ary lahimatoako i Efraîma.

— Izany àry ny tenin’ny Tompo.

Salamo fandinihana

Sal. 125, 1-2ab. 2d-3. 4-5. 6

Lalina tokoa ny nataon’ny Tompo taminay ka faly moa izahay.

Raha ny Tompo nampody an’i Siôna izay babo,
dia toa nofinofy ny anay;
vakin’ny hehy izahay,
nanakoako ny hiranay!

Ireo firenena kosa nitakoritsika:
“Lalina ity nataon’ny Tompo taminy!”
Lalina tokoa ny nataony taminay:
koa akory izany hafalianay!

Ampodio, ry Tompo, ny babo taminay;
avereno faingana toy ny ranotrambo.
Izay mamafy amin-dranomaso
no mijinja amin-kira.

Eny, tokoa, raha mandroso no tomany
am-panipazana ny voa;
fa nony miverina, manakora sy mihoby
no milanja ny vokatra!

Vakiteny faharoa

Taratasy ho an’ny kristianina Hebrio (Heb. 5, 1-6)

Ianao no Mpisorona mandrakizay araka ny fomban’i Melkisedeka.

Ry kristianina havana,
rehefa mety ho Mpisorombe ka alaina amin’ny olona,
dia tendrena ho solon’ny olona amin’ny fifampiraharahany amin’Andriamanitra,
mba hanolotra fanatitra sy sorona noho ny ota;
sady mahay miantra ny tsy mahalala sy ny mania izy,
satria na ny tenany aza mba voan’ny fahalemena ihany koa,
ka noho izany fahalemeny izany, tsy maintsy manao sorona ho an’ny tenany,
toy ny ataony ho an’ny vahoaka ihany koa izy.
Ary tsy misy mahazo maka izany voninahitra izany ho an’ny tenany,
afa-tsy izay antsoin’Andriamanitra tahaka an-dry i Aarôna ihany.
Dia toy izany koa i Kristy,
fa tsy Izy no nanandra-Tena ho Mpisorombe, fa Ilay nanao taminy hoe:

“Zanako Ianao, Izaho no niteraka Anao androany”;

sy nilaza amin’ny teny hafa koa hoe:

“Ianao no Mpisorona mandrakizay araka ny fomban’i Melkisedeka”.

— Izany àry ny tenin’ny Tompo.

Evanjely

Aleloia. Aleloia.

Izaho no fahazavan’izao tontolo izao, hoy ny Tompo: izay manaraka Ahy no hanana ny fahazavan’ny fiainana.

Aleloia.

Evanjely Masina nosoratan’i Masindahy Marka (Mk. 10, 46-52)

Rabony ô, aoka mba hahiratra aho.

Tamin’izany andro izany,
i Jesoa sy ny mpianany, dia tonga tao Jerikô,
ary nipetraka nangataka teo amoron-dalana kosa i Bartime jamba zanak’i Time.
Nony reny fa hoe i Jesoa Nazareanina izany, dia rafitra niantso izy nanao hoe:

“Ry Jesoa Zanak’i Davida ô, mamindrà fo amiko”.

Ary maro no nandrahona azy mafy mba hampangina azy,
fa vao mainka niantso mafimafy kokoa izy nanao hoe:

“Ry zanak’i Davida ô, mamindrà fo amiko”.

Dia nijanona i Jesoa, ka nampiantso azy.
Ary nantsoin’ny olona izy sy nilazany hoe:

“Matokia! mitsangàna, fa antsoiny ianao”.

Dia nariany ny lambany, ka niezaka nanatona an’i Jesoa izy.
Ary hoy i Jesoa taminy:

“Inona no tianao hataoko aminao?”

Dia hoy ilay jamba:

“Rabony ô, aoka mba hahiratra aho”.

Ary hoy i Jesoa:

“Mandehana, fa ny finoanao no nahavonjy anao”.

Dia nahiratra niaraka tamin’izay izy, ka nanaraka Azy teny an-dalana.

— Izany àry ny tenin’ny Tompo.