Vakiteny voalohany

Bokin’i Izaia Mpaminany (Iz. 6, 1-8)

Olona maloto molotra aho, nefa nahita maso ny Tompon’ny tafika.

Tamin’ny taona nahafatesan’i Oziasa, mpanjaka, no nahitako ny Tompo,
nipetraka teo ambonin’ny seza fiandrianana avo sy manerinerina,
ary nahafeno ny tempoly ny rebareban’akanjony.
Nisy Serafima nitoetra teo anatrehany manana elatra enina avy:
ny roa nisaronany tava; ny roa nisaronany tongotra, ny roa nanidinany.
Niantso mafy izy ireo, nifamaly ka nanao hoe:

“Masina, masina ny Tompon’ny tafika!
feno ny voninahiny ny tany rehetra.”

Nihozongozona ny fanambanin’ny vavahady, noho ny feon’izay niantso mafy
ary tonga feno setroka ny trano.
Ka hoy aho tamin’izay:

“Loza ho ahy! maty aho! fa izaho olona maloto molotra;
ary ny firenena itoerako maloto molotra;
nefa aho nahita maso ny Mpanjaka, ny Tompon’ny tafika!”

Kanjo, nanidina nanatona ahy ny iray tamin’ireo Serafima,
nitondra vain’afo teny an-tanany, nalainy tamin’ny tandra, teo ambony ôtely.
Nakasiny tamin’ny vavako izany, dia hoy izy:

“Jereo, efa voakasik’ity ny molotrao;
ka voaesotra ny helokao, ary voaonitra ny fahotanao.”

Dia nandre ny feon’ny Tompo aho, nanao hoe:

“Iza no hirahiko, ary iza no handeha ho any?”

Ka hoy aho:

“Inty aho, iraho aho.”

— Izany àry ny tenin’ny Tompo.

Setriny

Salamo 92, 1ab. 1d-2. 5

Manjaka ny Tompo, mitafy fiandrianana.

Andriana manjaka Ianao, ry Tompo;
mitafy ny hery tsy hay tohaina.
Ny zava-drehetra harin-tananao,
tomombana fatratra tsy mivena.

Mirafitra mafy ny rovanao.
Fa manda miorina tsy mikoro.
Hatrany amboalohany, teo ianao;
ho mandrakizay re tsy hanam-petra.

Ireo Teny rehetra voalazanao.
E! lalina, marina, tsy mivaona.
Ny fahamasinana feno haja
manerana izany fonenanao.

Evanjely

Aleloia. Aleloia.

Sambatra ireo mitana ny tenin’Andriamanitra amin’ny fo tsara sy mahitsy, ka mitandrina azy sy mamoa amin’ny faharetana.

Aleloia.

Evanjey Masina nosoratan’i Masindahy Matio (Mt. 10, 24-33)

Aza matahotra izay mamono ny vatana.

Tamin’izany andro izany i Jesoa niteny tamin’ny Apôstôliny nanao hoe:

“Ny mpianatra tsy ambony noho ny mpampianatra, na ny mpanompo noho ny tompony;
fa ampy ho an’ny mpianatra ny tahaka ny mpampianatra azy,
ary ho an’ny mpanompo ny tahaka ny tompony.
Raha ny lohan’ny fianakaviana aza nantsoiny hoe Belzeboba,
mainka fa ny ankohonany: koa aza matahotra azy ianareo.
Fa tsy misy takona izay tsy haseho, na miafina izay tsy ho fantatra.
Izay lazaiko anareo ao amin’ny maizina, dia ambarao eo amin’ny mazava;
ary izay bitsibitsihina amin’ny sofinareo, torio eny ambony tafon-trano;
ary aza matahotra izay mamono ny vatana fa tsy mahay mamono ny fanahy,
fa aleo matahotra izay mahay mamarina ny vatana sy ny fanahy any amin’ny afobe.
Moa tsy varifitoventy monja va no vidin’ny fody roa.
Kanefa na ireny aza tsy hisy latsaka amin’ny tany iray akory
raha tsy avelan’ny Rainareo.
Na ny volondohanareo aza dia efa voaisa avokoa.
Koa aza matahotra, fa mihoa-bidy lavitra noho ny fody maro ianareo.
Ary amin’izany, izay rehetra hanaiky Ahy eo anatrehan’ny olona,
dia hoekeko kosa izy eo anatrehan’ny Raiko izay any an-danitra;
ary izay handà Ahy eo anatrehan’ny olona,
dia holaviko kosa izy eo anatrehan’ny Raiko izay any an-danitra.”

— Izany àry ny tenin’ny Tompo.

Vakiteny voalohany

Bokin’i Osea Mpaminany (Os. 14, 2-10)

Izahay tsy hiteny intsony amin’ny asan’ny tananay hoe: Ry Andriamanitray ô!

Hoy ny Tompo:
Miverena amin’ny Tompo, ry Israely, fa ny helokao no nahalavo anao.
Mitondrà teny ianareo, miaraka aminareo, ka miverena amin’ny Tompo;
lazao aminy hoe:
Esory ny heloka rehetra ary raiso izay tsara.
Aoka hatolotray Anao ho solon’ny vantotr’ombalahy ny teny avy amin’ny molotray.
I Asora tsy hamonjy anay, izahay tsy hitaingin-tsoavaly; na hiteny hoe:

“Ry Andriamanitray ô”

amin’ny asan’ny tananay.
Ianao, izay ahitan’ny kamboty fiantrana!
Hositraniko ny fiodinany;
ho tiako amin’ny foko tokoa izy, fa efa niala taminy ny fahatezerako.
Ho toy ny ando aho amin’i Israely;
ka haniry toy ny lisy izy, ary handatsaka ny fakany tahaka an’i Libàna.
Izay ho avy hiala sasatra ao ambanin’ny alokalony,
hampahavokatra ny vary indray;
haniry toy ny voaloboka izy;
ary ho tahaka ny divain’i Libàna ny anarany.
Efraima... Inona no mbola hataony any amin’ny sampy?
Izaho no efa mamaly ny fangatahany sy mitsinjo azy;
tahaka ny sipresa maitso Aho;
Izaho no iavian’ny voanao.
Izay hendry no aoka hahafantatra izany zavatra izany,
izay manan-tsaina aoka hiaiky izany ho marina.
Fa mahitsy ny lalan’ny Tompo;
ka ny marina no hizotra eo,
fa ny mpiodina kosa, lavo aminy.

— Izany àry ny tenin’ny Tompo.

Setriny

Salamo 50, 3-4. 8-9. 12-13. 14 sy 17

Hanambara ny fiderana Anao ny vavako.

Iantrao aho, ry Tompo Andriamanitra
fa Ianao manko lalim-pitiavana.
Mba koseho re ny heloka vitako,
dia diovy aho hiala amin’ny otako.

Izay marina anaty no marina,
ka toroanao mangina aho, ry Tompoko.
Ary fafazo ra aho ho sitrana:
hihoatra ny oram-panala ny dioko.

Fo madio vaovao no angatahiko,
sy fanahy mahatoky tanteraka.
Aza alàna aminao aho, ry Tompoko,
ny Fanahy aza esorinao amiko.

Amereno hafaliana aho ho vonjiko,
dia tolory fanahy tena mendrika.
Eny, Tompo ô, sokafy ny molotro,
dia hidera tokoa izany vavako.

Evanjely

Aleloia. Aleloia.

Hamirapiratra tahaka ny fahazavan’izao tontolo izao ianao, raha mitana ny tenin’ny fahamarinana.

Aleloia.

Evanjely Masina nosoratan’i Masindahy Matio (Mt. 10, 16-23)

Tsy ianareo no hiteny fa ny Fanahin’ny Rainareo.

Tamin’izany andro izany,
i Jesoa niteny tamin’ny Apôstôliny nanao hoe:

“Indro Aho maniraka anareo tahaka ny ondry eo afovoan’ny amboadia,
ka mbà malina tahaka ny bibilava ianareo,
ary mbà tsotra tahaka ny voromailala.
Mitandrema, fa hotorìn’ny olona amin’ny fitsarany ianareo;
sy hokapohiny ao amin’ny sinagôgany;
ary hoentiny eo anatrehan’ny mpifehy sy ny mpanjaka ianareo noho ny amiko,
mba ho vavolombeloko eo aminy sy amin’ny jentily.
Fa raha hatolony ianareo, dia aza manahy izay fomba fandaha-teny,
na izay teny holazainareo, fa hatoro anareo eo no ho eo ihany izany;
satria tsy ianareo no hiteny fa ny Fanahin’ny Rainareo no hiteny ao aminareo.
Ary ny rahalahy hanolotra ny rahalahiny hovonoina,
ny ray hanolotra ny zanany, ny zanaka hiodina amin’ny ray aman-dreniny ka hamono azy;
ary ho halan’ny olona rehetra ianareo noho ny Anarako:
fa izay haharitra hatramin’ny farany no ho voavonjy.
Raha enjehina amin’ny tanàna anankiray ianareo, dia mandosira any amin’ny hafa;
fa lazaiko aminareo marina tokoa fa tsy hahatety ny tanànan’i Israely ianareo
mandra-pahatongan’ny Zanak’Olona.”

— Izany àry ny tenin’ny Tompo.

Vakiteny voalohany

Bokin’i Osea Mpaminany (Os. 11, 1. 3-4. 8d-9)

Onena ny foko ato anatiko.

Hoy ny Tompo:
Tia an’i Israely Aho fony mbola zaza izy;
ka hatrany Ejipta nisy fiantsoana nataoko ny zanako.
Ary Izaho nampiana-mandeha an’i Efraima,
sy nitantana azy tamin’ny sandriny,
nefa tsy fantany fa nanolikoly azy Aho.
Nentiko tamin’ny kofehy fitondrana olona izy ireo,
dia tamin’ny fatoran’ny fitiavana;
mova Aho tsy ilay nanainga ny jioga ho azy, eo ambonin’ny valanoranony,
ary niondrika taminy sy nampihinana azy,
nefa tsy misy miandrandra maso akory izy ireo.

Onena ny foko ato anatiko,
ary indray miontana ny fangorahako rehetra.
Tsy hanarana ny firehetan’ny hatezerako Aho,
tsy horavako fanindroany i Efraima.
Fa Andriamanitra Aho, fa tsy olombelona;
eo afovoanao ilay Masina,
ka tsy ho tonga Aho mitondra ny fisafoahako.

— Izany àry ny tenin’ny Tompo.

Setriny

Salamo 79, 2ad sy 3b. 15-16

Ny Tavanao aseho, ry Tompo, dia ho voavonjy izahay.

Ry Mpiandry an’i Israely, mandrenesa
izay mitondra an’i Jôsefa toy ny ondry.
Dia fohazy ny herinao
hamonjy anay.

Miverena, ry Andriamanitry ny tafika;
mitsinjova avy eny an-danitra zahao!
Ilay foto-boaloboka tazano,
mba ahio ny nambolen’ny tananao.

Evanjely

Aleloia. Aleloia.

Andriamanitra no mampihavana an’izao tontolo izao indray tamin’ny alalan’i Kristy sy nametraka indray ny teny fampihavanana tamintsika.

Aleloia.

Evanjely Masina nosoratan’i Masindahy Matio (Mt. 10, 7-15)

Nahazo maimaim-poana ianareo, ka manomeza maimaim-poana.

Tamin’izany andro izany,
i Jesoa niteny tamin’ny Apôstôly nanao hoe:

“Raha mandeha ianareo, dia mitoria hoe:
Efa akaiky ny Fanjakan’ny lanitra.
Sitrano ny marary, atsangano ny maty, diovy ny boka, roahy ny demony:
nahazo maimaim-poana ianareo, ka manomeza maimaim-poana.
Aza mitondra volamena na volafotsy na varahina ao amin’ny fehin-kibonareo,
na kitapom-batsy eny an-dalana, na akanjo roa, na kiraro, na tehina,
fa ny mpiasa dia mendrika homen-kanina.
Ary amin’izay tanàna na vohitra hidiranareo,
dia anontanio izay mendrika, hidiranareo ao,
ka mitoera ao aminy ambara-pialanareo.
Ary raha vao miditra ao amin’ny trano ianareo, dia miarahabà hoe:
‘Ho amin’itý trano ity anie ny fiadanana’;
ka raha mendrika tokoa ny ao an-trano,
dia ho tonga ao aminy ny fiadanana nantsoinareo;
fa raha tsy mendrika kosa izy,
dia hiverina aminareo ny fiadanana nantsoinareo.
Ary raha misy tsy mampiantrano anareo na tsy mihaino ny teninareo,
dia mialà amin’izany trano izany, na amin’izany tanàna izany,
ka ahintsano ny vovoka amin’ny tongotrareo.
Lazaiko marina aminareo fa ho moramora kokoa
ny hatao amin’i Sôdôma sy i Gômôra amin’ny andro fitsarana
noho ny hatao amin’izany tanàna izany.”

— Izany àry ny tenin’ny Tompo.

Vakiteny voalohany

Bokin’i Osea Mpaminany (Os. 10, 1-3. 7-8. 12)

Fotoana hitadiavana ny Tompo izao.

Voaloboka mirobona erý i Israely, efa mavesatry ny voany.
Araka ny habetsahan’ny voany no ampitomboany ny ôteliny;
araka ny hatsaran’ny taniny, no hatsaran’ny tsangam-bato nataony.
Mpihatsaravelatsihy ny fony;
ka efa hivesatra ny valin’izany izy.
Hanjera ny ôteliny izy, handrava ny tsangam-batony.
Tsy ho ela no hilazany hoe:

“Tsy mana-mpanjaka isika noho isika tsy natahotra ny Tompo”;

fa hahavita inona ho antsika moa izay mpanjaka?
Levona i Samaria;
ny mpanjakany dia toy ny tapak’ahitra eo ambonin’ny rano.
Ho rava ny fitoerana avon’i Avena, izay fahotan’i Israely;
handadian’ny tsilo amam-boarointsaka ny ôteliny.
Ny tendrombohitra hilazany hoe:

“Saròny izahay!”

ary ny havoana hataony hoe:

“Mianjerà aminay!”

Afafazo araka ny fahamarinana ny voanareo;
ataovy araka ny famindram-po ny fijinjànareo;
miasà tany vao ho anareo;
fa efa fotoana hitadiavana ny Tompo izao,
mandra-piaviny handatsaka ny fahamarinana ao aminareo.

— Izany àry ny tenin’ny Tompo.

Setriny

Salamo 104, 2-3. 4-5. 6-7

Tadiavo lalandava ny tavan’ny Tompo.

Hirao Izy, antsao!
Vetsoy ny asany mahagaga!
Ireharehao ny Anarany masina!
Miravoa ny fon’ny mpitady ny Tompo!

Katsaho ny Tompo sy ny heriny!
Tadiavo lalandava ny tavany!
Tsarovy ny asa mahagaga nataony,
ny asany mahatalanjona, ny fitsaran’ny vavany.

Ry taranak’i Abrahama mpanompony,
ry zanak’i Jakôba, ianareo voafidiny!
Izy no Tompo Andriamanitra,
manerana ny tany tontolo ny fitsarany.

Evanjely

Aleloia. Aleloia.

Efa nataoko hoe Sakaiza ianareo, hoy ny Tompo; satria efa nambarako taminareo avokoa izay rehetra reko tamin’ny Ray.

Aleloia.

Evanjely Masina nosoratan’i Masindahy Matio (Mt. 10, 1-7)

Mankanesa any amin’ny ondry very amin’ny taranak’i Israely.

Tamin’izany andro izany, i Jesoa niantso ny mpianany roa ambin’ny folo lahy
ka nanome azy fahefana handroaka fanahy maloto,
sy hahasitrana ny aretina mbamin’ny rofy rehetra.
Ary ireto no anaran’ny Apôstôly roa ambin’ny folo lahy:
Ny voalohany dia i Simôna izay atao hoe i Piera,
dia i Andre rahalahiny,
i Jakôba zanak’i Zebede sy i Joany rahalahiny,
i Filipo sy i Bartelemy,
i Tomà sy i Matio ilay poblikanina,
i Jakôba zanak’i Alfe sy i Tade,
i Simôna ilay Kananeanina,
ary i Jodasy Iskariôta ilay namadika Azy.
Ireo ny roa ambin’ny folo lahy izay nirahin’i Jesoa rahefa nohafatrafarany hoe:

“Aza manaraka ny lalana mankany amin’ny Jentily,
ary aza miditra amin’ny tanànan’ny Samaritanina,
fa aleo mankany amin’ny ondry very amin’ny taranak’i Israely.
Ary raha mandeha ianareo, mitoria hoe:
Efa akaiky ny Fanjakan’ny lanitra.”

— Izany àry ny tenin’ny Tompo.

Vakiteny voalohany

Bokin’i Osea Mpaminany (Os. 8, 4-7. 11-13)

Namafy rivotra izy ireo ka hijinja tafio-drivotra.

Izao no nolazain’ny Tompo:

“Izy ireo nanangana mpanjaka nefa tsy avy amiko;
nanendry mpifehy nefa tsy nahalala an’ireo Aho;
nanao sampy tamin’ny volafotsiny amam-bolamenany,
mba hanalana aminy ny volafotsy amam-bolamena.
Naharikoriko Ahy ity zanak’ombinao, ry Samaria;
nirehitra tamin’izy ireo ny fahatezerako.
Mandra-pahoviana no tsy hahazoana mandio azy ireo?
Fa avy amin’i Israely koa izy;
mpanao taozavatra no nanamboatra azy, ka tsy andriamanitra izy io;
fa hotorotoroina ny zanak’ombin’i Samaria!
Namafy rivotra izy ireo, ka hijinja tafio-drivotra.
Tsy hisy salohim-bary ho azy, fa hisy vary tsy vanon-ko lafarinina;
ary raha vanon-ko lafarinina aza, ny hafa firenena no hihinana azy.
Nampitombo ny ôtely i Efraima tamin’ny nanotany,
ary ireo ôtely ireo nahalavo azy tamin’ny ota.
Na hanoratra lohateny arivo ho azy amin’ny lalàko aza Aho,
dia ho zavatra tsy mikasika azy no fijeriny an’izany.
Ny sorona aterin’izy ireo ho Ahy,
dia ny henan’ny zavatra novonoiny sy haniny;
tsy ankasitrahan’ny Tompo izany.
Hahatsiaro ny helok’izy ireo Izy ankehitriny, ka hanasazy ny fahotany:
hiverina any Ejipta izy ireo.

— Izany àry ny tenin’ny Tompo.

Setriny

Salamo 113b, 3-4. 5-6. 7ab-8. 9-10

Ry taranak’i Isaraely, itokio ny Tomponao!

Ny Andriamanitray dia any an-danitra any,
ary vitany izay sitraky ny fony!
Raha ny sampin-dry zareo dia volamena, volafotsy:
asan-tanana ireny.

Manam-bava tsy miteny,
mana-maso tsy mahita,
manan-tsofin-tsy mandreny,
manana oron-tsy mahambolo.

Manan-tanan-tsy mandray,
manan-tongo-tsy mamindra.
Ireo namorona azy ireny, ireo matoky ny hotahìny,
enga anie hanahaka azy!

Ry taranak’i Israely, itokio ny Tomponao,
sady Vonjy no ampinga.
Ry taranak’i Aarôna, itokio ny Tomponao,
sady vonjy no ampinga.

Evanjely

Aleloia. Aleloia.

Velomy araka ny hatsaram-ponao aho; mba hitandremako ny fanambarana avy amin’ny vavanao.

Aleloia.

Evanjely Masina nosoratan’i Masindahy Matio (Mt. 9, 32-38)

Ny vary hojinjaina be, fa ny mpijinja no vitsy.

Tamin’izany andro izany,
indro nentin’ny olona teo amin’i Jesoa ity lehilahy anankiray
sady moana no azon’ny demony.
Ary nony voaroaka ny demony, dia niteny ilay moana
ka gaga ny vahoaka sady nanao hoe:

“Tsy mbola nisy toa izany tamin’i Israely.”

Fa ny Farisianina kosa nanao hoe:

“Ny lehiben’ny demony no androahany ny demony.”

Ary i Jesoa nitety ny tanàna sy ny vohitra rehetra,
nampianatra teo amin’ny sinagôgany sy nitory ny evanjelin’ny fanjakan’Andriamanitra,
ary nahasitrana ny aretina mbamin’ny rofy rehetra.
Onena Izy nahita ireto vahoaka be nijaly
sy nafoy toy ny ondry tsy misy mpiandry.
Dia hoy Izy tamin’ny mpianany:

“Ny vary hojinjaina be, fa ny mpijinja no vitsy;
koa mihantà amin’ny tompom-bary
mba haniraka mpijinja amin’ny variny.”

— Izany àry ny tenin’ny Tompo.

Vakiteny voalohany

Bokin’i Osea Mpaminany (Os. 2, 16. 17b. 18. 21-22)

Hofofoiko mba ho ahy mandrakizay ianao.

Izao no lazain’ny Tompo:
Indro Aho hitarika azy sy hitondra azy any an’efitra,
ary hiteny aminy ao am-pony;
ka any izy hamaly toy ny tamin’ny andro fahatanorany,
sy toy ny tamin’ny andro niakarany avy any amin’ny tany Ejipta.
Amin’izany andro izany — teny marin’ny Tompo —,
ianao hiantso Ahy hoe:

“Vadiko”,

fa tsy hiantso Ahy intsony hoe:

“Baalako.”

Hofofoiko mba ho Ahy mandrakizay ianao;
hofofoiko ho Ahy ianao amin’ny rariny sy ny hitsiny
ary amin’ny fahasoavana sy ny fitiavana;
hofofoiko ho Ahy amin’ny fahamarinana,
ka hahalala ny Tompo.

— Izany àry ny tenin’ny Tompo.

Setriny

Salamo 144, 2-3. 4-5. 6-7. 8-9

Antra sy mangoraka ny Tompo.

Misaotra Anao isan’andro aho,
sy midera ny Anaranao mandrakizay!
Lehibe ny Tompo ary mendri-dera fatratra;
tsy azo takarina ny halehibeny!

Ny taranaka mifampigaga ny zava-bitanao,
sy mankalaza ny asanao mahery,
manambara ny harevaky ny voninahitrao,
mitantara ny asanao mahagaga.

Miteny ny herinao mahatahotra,
mitanisa tokoa ny halehibeazanao,
miventy ny fahatsiarovana ny hatsaranao lehibe,
ary mihoby ny fahamarinanao!

Antra sy mangoraka ny Tompo,
tsy malaky tezitra ary be hatsaram-po!
Tsara amin’ny olon-drehetra ny Tompo;
mambomba ny asany rehetra ny fangorahany!

Evanjely

Aleloia. Aleloia.

Ny teninao, ry Tompo dia fanahy sy fiainana. Ianao no manana ny teny mahavelona mandrakizay.

Aleloia.

Evanjely Masina nosoratan’i Masindahy Matio (Mt. 9, 18-26)

Maty vao izao ny zanako vavy ka tongava Ianao dia ho velona izy.

Tamin’izany andro izany, raha mbola niteny i Jesoa,
dia indro nisy lehiben’ny sinagôga anankiray
niditra nanatona sy nitsaoka Azy, ka nanao hoe:

“Tompoko, maty vao izao ny zanako vavy,
ka andeha re hametraka ny tananao aminy,
dia ho velona izy.”

Dia nitsangana i Jesoa ka nandeha nanaraka azy Izy mbamin’ny mpianany.

Ary indro nisy vehivavy nitsi-drà nandritra ny roa ambin’ny folo taona,
nanatona Azy avy eo ivohony,
ka nanendry ny morontongotr’akanjony;
fa hoy izy anakampony:

“Na dia ny akanjony ihany aza no ho voakasiko,
dia ho sitrana aho.”

Ary nitodika i Jesoa ka nahita azy, dia nanao hoe:

“Matokia, anaka,
ny finoanao no nahasitrana anao.”

Hatramin’izay dia sitrana ravehivavy.

Nony tonga tany an-tranon’ilay lehibe i Jesoa
ka nahita ny mpitsoka sodina, sy ny olona maro nitabataba,
dia nanao hoe:

“Mialà ianareo,
fa tsy maty akory razazavavy, fa matory.”

Dia nihomehezan’ireo Izy.
Ary rahefa navoaka ny olona, dia niditra Izy,
ka nandray ny tanan’ilay zazavavy, dia nitsangana io.
Ary niely tamin’izany tany rehetra izany ny lazan’izany.

— Izany àry ny tenin’ny Tompo.

Vakiteny voalohany

Bokin’i Ezekiela Mpaminany (Ez. 2, 2-5)

Taranaka mpiodina izy, nefa hahalala fa misy Mpaminany eo aminy.

Tamin’izany andro izany,
dia niditra tato anatiko ny Fanahy, sady nampitsangana ahy,
ka nandre ny Tompo niteny tamiko aho.
Hoy Izy tamiko:

“Ry zanak’olona,
indro ianao irahiko, ho any amin’ny zanak’i Israely,
ho any amin’ireo vahoaka mpiodina izay niodina tamiko,
fa efa nanota tamiko, mandrak’androany aza, ireo sy ny razany.
Ireo zanaka manao tarehy tsy mahalala menatra sy mafy fo ireo,
no anirahako anao.
Izao no holazainao aminy:
Izao no tenin’ny Tompo Andriamanitra.
Ka na hihaino izy ireo, na tsy hihaino,
— fa taranaka mpiodina izy —
dia hahalala fa misy Mpaminany eo aminy”.

— Izany àry ny tenin’ny Tompo.

Salamo fandinihana

Sal. 122, 1-2a. 2bde. 3-4

Ny masonay manaraka ny Tompo Andriamanitray mandra-piantrany anay.

Any aminao ny masoko no andraiko,
ry Ilay mitoetra any an-danitra!
Indro toy ny mason’ny ankizy lahy
eny amin’ny tanan’ny tompolahiny,

Toy ny mason’ny ankizy vavy
eny amin’ny tanan’ny tompovaviny:
ny masonay any amin’ny Tompo Andriamanitray
miandry fiantràna avy aminy!

Eny, iantrao izahay, ry Tompo ô,
iantrao fa voky eso loatra,
efa leon’ny tebaky ny tretrika,
efa tofoky ny eson’ny mpiavona!

Vakiteny faharoa

Taratasy faharoan’i Masindahy Paoly Apôstôly ho an’ny kristianina tany Kôrinty (2 Kôr. 12, 7-10)

Ny fahalemeko no ireharehako mba hitoeran’ny herin’i Kristy amiko.

Ry kristianina havana,
fandrao mirehareha noho ny halehiben’ireo fanambaràna aho,
dia nasiana tsilo tao amin’ny nofoko,
dia anjelin’i Satàna hamely tehamaina ahy, mba tsy hireharehako.
Ny amin’io dia intelo aho no nangataka tamin’ny Tompo,
mba hanalany an’io amiko, fa izao no navaliny ahy:

“Ampy ho anao ny fahasoavako,
sady amin’ny fahalemena indrindra no iamparan’ny heriko”.

Koa dia vao mainka sitrako aza ny hirehareha amin’ny fahalemeko,
mba hitoeran’ny herin’i Kristy amiko.
Izany no ifaliako amin’ny fahalemeko,
amin’ny fahafaham-baràka,
amin’ny fahaterena,
amin’ny fanenjehana,
amin’ny fahantrana,
noho ny amin’i Kristy,
satria ny fahalemeko no heriko.

— Izany àry ny tenin’ny Tompo.

Evanjely

Aleloia. Aleloia.

Hampahiratra ny masom-panahintsika anie Andriamanitra Rain’i Jesoa Kristy Tompontsika, mba hahalalantsika ny fanantenana izay niantsoana antsika.

Aleloia.

Evanjely Masina nosoratan’i Masindahy Marka (Mk. 6, 1-6)

Tsy misy mpaminany tsy enin-kaja afa-tsy amin’ny taniny.

Tamin’izany andro izany i Jesoa nankany amin’ny tany nahabe Azy,
ary nanaraka Azy ny mpianany.
Ary rehefa sabata ny andro,
dia nampianatra tao amin’ny sinagôga Izy,
ka be tamin’izay nihaino Azy no gaga tamin’ny fampianarany sy nanao hoe:

“Taiza no nahazoan’Izy io izany rehetra izany?
Fahendrena manao ahoana izao nomena Azy izao,
ary ahoana no ahefan’ny tanany izany asa lehibe izany?
Moa tsy io va ilay mpandrafitra, zanak’i Maria,
rahalahin’i Jakôba sy i Jôsefa ary i Joda sy i Simôna?
Moa tsy aty amintsika va ny anabaviny?”

Dia tafintohina taminy izy ireo.
Fa hoy i Jesoa taminy:

“Tsy misy mpaminany tsy enin-kaja
afa-tsy amin’ny taniny sy amin’ny fianakaviany ary amin’ny havany ihany”.

Ary tsy nahazo nanao fahagagana akory Izy teo,
fa marary vitsivitsy monja no nositraniny tamin’ny fametrahan-tanana,
ary gaga Izy noho ny tsy finoan’ireo.
Dia nitety ny vohitra manodidina Izy sy ny mpianany.

— Izany àry ny tenin’ny Tompo.