Vakiteny voalohany

Taratasy voalohan’i Masindahy Paoly Apôstôly ho an’ny kristianina tany Kôrinto (1 Kôr. 6, 1-11)

Fa rahalahy ka hanana ady amin-drahalahy, sady eo anatrehan’ny mpitsara tsy mpino indray.

Ry kristianina havana, hay aminareo dia misy manana ady amin’ny namany,
ka sahy mangataka fitsarana amin’ny olona tsy marina,
fa tsy amin’ny olona masina!
Tsy fantatrareo va fa ny olo-masina dia hitsara izao tontolo izao?
Ka raha izao tontolo izao aza hotsarainareo,
dia izay zava-madinika indray ve no tsy mendrika hotsarainareo?
Tsy fantatrareo va fa hitsara ny Anjely aza isika?
Ka mainka fa izay zavatra momba izao fiainana izao.
Koa raha ady momba ny zavatr’izao fiainana izao no ilanareo fitsarana,
na izay farany ambany amin’ny Eglizy aza ve
tsy ho azonareo tendrena ho mpitsara amin’izany?
Hampahamenatra anareo no ilazako izany.
Hay dia tsy misy olon-kendry aminareo, na dia iray aza,
mba afa-mamboatra ny adin’ny rahalahiny?
Fa rahalahy ka hanana ady amin-drahalahy,
sady eo anatrehan’ny mpitsara tsy mpino indray!
Efa hadisoana ho anareo sahady ny anananareo ady amin’ny namanareo,
satria tsy aleo ve miaritra ny tsy an-drariny?
Tsy aleo ve mandefitra ny ambakaina aza?
Kanjo inona, ianareo indray no manao ny tsy rariny, ianareo indray no manambaka,
nefa tsy iza ireny fa rahalahinareo ihany!
Moa tsy fantatrareo va fa tsy mba handova ny fanjakan’Andriamanitra ny olona tsy marina?
Aza diso hevitra ianareo,
fa na mpijangajanga, na mpanompo sampy, na mpaka vadin’olona,
na mpanao asam-pijangajangana amin’ny tenany samy irery,
na mpiray samy lehilahy, na mpangalatra na kahihitra,
na mpimamo, na mpifosa, na mpanao an-keriny,
dia tsy handova ny fanjakan’Andriamanitra.
Ary efa mba toy izany ihany koa ianareo, na ny sasany aminareo
saingy efa nosasana, efa nohamasinina, efa nohamarinina
tamin’ny Anaran’i Jesoa Kristy Tompo sy tamin’ny Fanahin’Andriamanitsika ianareo.

— Izany àry ny tenin’ny Tompo.

Setriny

Salamo 149, 1-2. 3-4. 5-6a sy 9b

Fa sitraky ny Tompo ny vahoakany.

Ihirao hira vao ny Tompo!
Derao ao am-piangonan’ny mpivavaka Izy!
I Israely aoka hifaly amin’Ilay nanao azy;
ny zanak’i Siôna hiravo amin’ilay Mpanjakany.

Hidera ny Anarany amin-dihy,
hiantsa Azy amin’amponga sy lokanga!
Fa sitraky ny Tompo ny vahoakany;
ravahany fandresena ny ory!

Ny mpivavaka aoka hientana amin’ny Voninahiny,
sy hanao hobin-kafaliana ara-pomba:
am-bava, fankalazana an’Andriamanitra,
no voninahitry ny mpivavaka aminy rehetra!

Evanjely

Aleloia. Aleloia.

Efa nataoko hoe sakaiza ianareo, hoy ny Tompo; satria efa nambarako taminareo avokoa izay rehetra reko tamin’ny Ray.

Aleloia.

Evanjely Masina nosoratan’i Masindahy Lioka (Lk. 6, 12-19)

Nivavaka nandritra ny alina Izy. Ary nifidy roa ambin’ny folo lahy nantsoiny hoe Apôstôly.

Tamin’izany andro izany, i Jesoa lasa tany an-tendrombohitra mba hivavaka,
ka nivavaka tamin’Andriamanitra nandritra ny alina.
Nony maraina ny andro dia niantso ny mpianany Izy
ka nifidy roa ambin’ny folo lahy tamin’izy ireo,
izay nomeny anarana hoe Apôstôly:
dia i Simôna izay nataony hoe i Piera, sy i Andre rahalahiny,
i Jakôba sy i Joany,
i Filipo sy i Bartelemy,
i Matio sy i Tômà,
i Jakôba zanak’i Alfe, sy i Simôna izay atao hoe Zelôty,
ary i Jodà rahalahin’i Jakôba, sy i Jodasy Iskariôta ilay namadika.
Dia niara-nidina tamin’izy ireo Izy
ka nankeo amin’ny tany lemaka izay nijanonan’ny mpianany maro
sy ny vahoaka betsaka avy tany Jodea rehetra sy Jerosalema,
ary ny tanin’i Tira sy i Sidôna amoron-tsiraka,
izay tonga teo mba hihaino Azy, sy mba hositraniny amin’ny aretiny:
dia nositraniny izay nampijalian’ny fanahy maloto,
ary nitady hanendry Azy ny vahoaka rehetra,
satria nisy hery niala taminy ka nahasitrana azy rehetra.

— Izany àry ny tenin’ny Tompo.

Vakiteny voalohany

Taratasy voalohan’i Masindahy Paoly Apôstôly ho an’ny kristianina tany Kôrinto (1 Kôr. 5, 1-8)

Esory re ny lalivay ela, satria efa voavono i Kristy izay Paka ho antsika.

Ry Kristianina havana, re laza tsy leo dina fa misy fahalotoana atý aminareo,
sady fahalotoana tsy fahita na dia any amin’ny jentily aza,
dia olona anankiray manambady ny vadin-drainy!
Izany ve ka ianareo indray no miavonavona e!
ny tenanareo tsy malahelo amin’izany akory;
ilay nanao izany tsy nesorinareo tsy ho eo aminareo koa!
Izaho, na dia tsy teo aminareo ara-batana aza, dia teo am-panahy,
sy efa nitsara sahady an’ilay nanao izany zavatra izany,
toy ny teo aminareo ihany.
Koa amin’ny Anaran’i Jesoa Kristy Tompontsika
eo am-pivorianareo rehetra sy ny fanahiko eo afovoanareo,
omban’ny herin’i Jesoa Tompontsika:
dia aoka izany olona izany hatolotra an’i Satana, mba ho simba ny vatany,
fa ho voavonjy kosa ny fanahiny amin’ny andron’ny Tompo.
Tsy mety lahy ny nireharehanareo lozan-tany erý!
Tsy fantatrareo angaha fa lalivay kely foana
dia mampibonaka ny vongan-dafarinina manontolo?
Esory re ny lalivay ela, mba ho vongana vaovao ianareo,
sady efa mofo tsy misy lalivay rahateo ianareo,
satria efa voavono i Kristy, izay Paka ho antsika.
Koa aoka àry isika hankalaza ny fety,
tsy amin’ny lalivay ela, na amin’ny lalivaim-paharatsiana aman-dolom-po,
fa amin’ny mofo tsy misy lalivay,
dia ny fahadiovam-po amam-pahamarinana izany.

— Izany àry ny tenin’ny Tompo.

Setriny

Salamo 5, 5-6. 7. 12

Tompo ô, tariho araka ny fahamarinanao aho.

Tsia, tsy mba Andriamanitra tia ratsy Ianao;
ny olon-dratsy tsy monina ao aminao;
ny adala tsy mijoro eo anoloan’ny masonao;
ny mpanao ratsy rehetra tsy tohanao.

Ny mpiteny lainga
levoninao;
ny tia ra, ny mpamitaka,
halan’ny Tompo!

Izay rehetra mifefy aminao kosa, hifaly;
izay arovanao, hihoby mandrakizay.
Eny, hiravo aminao
izay tia ny Anaranao!

Evanjely

Aleloia. Aleloia.

Alao tampina ny masoko, ry Tompo, hibanjina ny zava-mahagaga amin’ny lalànao.

Aleloia.

Evanjely Masina nosoratan’i Masindahy Lioka (Lk. 6, 6-11)

Nitsikilo Azy izy ireo na hanasitrana andro Sabata Izy na tsia.

Indray sabata hafa koa i Jesoa,
dia niditra tao amin’ny sinagôga, ka nampianatra,
ary nisy lehilahy anankiray maty tanana ankavanana teo.
Tamin’izay dia nitsikilo Azy ny mpanora-dalàna sy ny Farisianina
na hanasitrana amin’ny andro sabata Izy na tsia,
mba hahitany antony hiampangana Azy.
Fa fantatr’i Jesoa kosa ny hevitr’izy ireo,
ka hoy Izy tamin’ilay maty tanana:

“Mitsangàna ka mijoroa etsy afovoany.”

Dia nitsangana ilay io ka nijoro,
ary hoy i Jesoa tamin’izy ireo:

“Manontany anareo Aho,
inona no mety hatao amin’ny sabata, ny manao soa sa ny manao ratsy;
ny mamonjy aina sa ny manala aina?”

Dia noherikerehiny nojerena daholo izy rehetra teo
ka hoy Izy tamin-dralehilahy:

“Ahinjiro ny tananao.”

Dia nahinjiny ka sitrana terý ny tanany.
Fa iretsy kosa safotry ny hatezerana,
ka nioko amin’izay hanaovany an’i Jesoa.

— Izany àry ny tenin’ny Tompo.

Vakiteny voalohany

Bokin’i Izaia Mpaminany (Iz. 35, 4-7a)

Halady ny sofin’ny marenina, hinantsanantsan-kafaliana ny lelan’ny moana.

Ilazao ny mitebiteby fo ataovy hoe:
Makà hery fa aza matahotra.
Inty ny Andriamanitrareo, tamy ny famaliana, famalian’Andriamanitra,
Tenany no avy, dia hamonjy anareo.
Amin’izay dia hahiratra ny mason’ny jamba, halady ny sofin’ny marenina.
Hitsambikina hoatra ny serfa ny mandringa, hinantsanantsan-kafaliana ny lelan’ny moana.
Fa hisy rano miboiboika any an’efitra;
ary sakeli-drano eny amin’ny tany lemaka lava volo.
Ny tany hay hanjary farihy, ary ny tany mangetana ho loharano.

— Izany àry ny tenin’ny Tompo.

Salamo fandinihana

Sal. 145, 7. 8-9a. 9bd-10

Izaho midera ny Tompo raha mbola velona aina.

Ny Tompo mitandrina mandrakizay ny fahamarinana
sy manome rariny ireo ampahoriana.
Ilay manome sakafo ny noana,
Tompo mamaha ny mpifatotra.

Tompo mampahiratra ny jamba,
Tompo mampitràka ny miondrika.
Tompo mpiaro ny vahiny,
tohan’ny kamboty sy ny tokan-tena.

Tompo tia ny olo-marina,
fa ny olon-dratsy aviliviliny.
Manjaka ny Tompo amin’ny taona mifandimby,
ilay Andriamanitrao, ry Siôna, mandrakizay!

Vakiteny faharoa

Taratasin’i Masindahy Jakôba Apôstôly (Jak. 2, 1-5)

Moa tsy ny mahantra va no nofidin’Andriamanitra ho mpandova ny fanjakany?

Ry kristianina havana,
aza asiana fizahantavan’olona ny finoana an’i Jesoa Kristy Tompontsika be voninahitra.
Raha, ohatra, ka misy olona miditra amin’ny fivorianareo:
ny iray miperatra volamena sy mitafy saro-bidy,
ary ny iray kosa mahantra ratsy fitafiana,
ka ilay mitafy saro-bidy no jerenareo sy ataonareo hoe:

“Mipetraha ianao eto amin’ny toerana aloha”;

fa ilay mahantra kosa ilazanareo hoe:

“Mitsangàna ery”, na “mipetraha eto amin’ny fitoeran-tongotro”;

moa tsy miangatra va ianareo amin’izany, sy tonga mpitsara ratsy hevitra loatra?
Henoy ange, ry kristianina havako malala:
Moa tsy ny mahantra eo imason’izao tontolo izao va
no nofidin’Andriamanitra ho mpanan-karena amin’ny finoana,
sy ho mpandova ny fanjakana nampanantenainy an’izay tia Azy?

— Izany àry ny tenin’ny Tompo.

Evanjely

Aleloia. Aleloia.

Sokafy ny fonay, ry Tompo, mba hitandremanay ny tenin’ny Zanakao.

Aleloia.

Evanjely Masina nosoratan’i Masindahy Marka (Mk. 7, 31-37)

Nampalady ny marenina Izy, ary nampiteny ny moana.

Tamin’izany andro izany, i Jesoa niala tany amin’ny faritanin’i Tira,
ary namaky ny faritanin’i Sidôna
ka tonga tany amoron’ny ranomasin’i Galilea, amin’ny faritanin’i Dekapôly.
Tao dia nisy lehilahy anankiray sady marenina no moana nentin’izy ireo teo aminy
sy nangatahiny mba hametrahany tanana.
Dia nitondra azy niavaka tamin’ny vahoaka Izy,
ka nangarona ny sofiny tamin’ny rantsan-tanany sy nanisy rora ny lelany.
Raha efa izany dia niandrandra ny lanitra Izy,
sady nisento ary nanao taminy hoe:

“Efetà!”, izany hoe, “misokafa!”

Niaraka tamin’izay dia nisokatra ny sofiny
ary voavaha ny fatoran’ny lelany, ka niteny tsara izy.
Ary noraràny ny olona tsy hilazalaza izany na amin’iza na amin’iza;
fa araka ny nandraràny azy ireo no vao mainka nampielezany izany kokoa aza;
sady talanjona loatra izy ireo ka nanao hoe:

“Tsara avokoa ny zavatra rehetra nataony,
fa nampalady ny marenina Izy sy nampiteny ny moana”.

— Izany àry ny tenin’ny Tompo.