Bokin’i Jeremia Mpaminany (Jer. 15, 10. 16-21)
Loza ho ahy, ry neny, ny niterahanao ahy,
mba ho olona filàna ady amam-pifandirana amin’ny tany rehetra aho.
Tsy mba nisambotra na inona na inona aho,
tsy nampisambotra na inona na inona tamiko izy,
nefa manozona ahy avokoa izy rehetra!
Vao tonga teo anatrehako ny teninao, dia nohaniko:
zary hafaliako amam-piravoravoan’ny foko,
satria nantsoina tamiko ny Anaranao, ry Tompo, Andriamanitry ny tafika ô!
Tsy mba nipetraka teo amin’ny fivorian’ny mpihomehy aho,
mba hiaranako amin’ny firavoravoana;
fa nipetraka nanirery teo ambanin’ny tananao aho,
satria nofenoinao hatezerana.
Nahoana no dia tsy misy farany ny fijaliako, ary manaintaina ny feriko,
sady tsy mety sitrana?
Moa ho tahaka ny rano mamitaka ho ahy va Ianao,
ho tahaka ny rano tsy azo itokiana?
Koa izao no lazain’ny Tompo:
“Raha miverina amiko ianao, dia hampodìko indray;
hitsangananao eo anatrehan’ny tavako;
ary raha manavaka izay sarobidy amin’izay tsinontsinona ianao,
dia ho tahaka ny vavako;
ary izy ireo hiverina hanatona anao;
fa tsy ianao no hiverina hanatona azy.
Hataonao manda varahina mafy ho an’ity vahoaka ity ianao;
hiady aminao izy, nefa tsy hahavoa anao akory;
satria momba anao Aho, hamonjy, sy hanafaka anao,
— teny marin’ny Tompo.
Hanafaka anao amin’ny tanan’ny ratsy fanahy Aho,
ary hanavotra anao amin’ny tanan’ny mpanao an-keriny.”
— Izany àry ny tenin’ny Tompo.
Salamo 58, 2-1. 4-5a. 10-11. 17. 18
Afaho amin’ny fahavaloko aho, ry Andriamanitro;
arovy amin’ny mpamely;
afaho amin’ny mpanao ratsy;
vonjeo amin’ny olona lian-dra!
Indreo izy manotrika hanala ny aiko:
olo-matanjaka mivorivory hamely ahy.
Tsy heloko, tsy otako, tsy hadisoako, ry Tompo!
Izy anefa miolomay sy efa vonona!
Ry heriko ô, Ianao no andraiko,
Andriamanitra fiarovana-avo ho ahy,
Andriamanitra tia ahy izay mitsena ahy,
sy mahatonga ahy hahasetra ny rafiko.
Raha izaho, dia hihira ny herinao aho;
hihoby vao maraina ny hatsaram-ponao.
Fa Ianao fiarovana-avo ho ahy,
fialofana amin’ny andro fahoriana.
Ry heriko ô, Ianao no antsaiko:
Andriamanitra fiarovana-avo ho ahy,
Andriamanitra tia ahy izay mitsena ahy,
sy mahatonga ahy hahasetra ny rafiko!
Aleloia. Aleloia.
Alao tampina ny masoko, ry Tompo, hibanjina ny zava-mahagaga amin’ny lalànao.
Aleloia.
Evanjely Masina nosoratan’i Masindahy Matio (Mt. 13, 44-46)
Tamin’izany andro izany, i Jesoa niteny tamin’ny vahoaka nanao hoe:
“Ny fanjakan’ny lanitra dia tahaka ny rakitra nafenina tany an-tsaha,
izay hitan’olona ka nafeniny tao ihany aloha;
dia lasa tamin-karavoana izy nivarotra izay rehetra mety ho fananany,
ary nividy io saha io.
Ny fanjakan’ny lanitra dia tahaka ny mpandranto mitady voahangy tsara.
Ary nony nahita anankiray be vidy izy,
dia lasa nivarotra ny fananany rehetra ka nividy azy.”
— Izany àry ny tenin’ny Tompo.
Bokin’i Jeremia Mpaminany (Jer. 14, 17-22)
Hoy ny Tompo tamiko:
“Lazao azy ireo izao teny izao:
Ny masoko handrotsa-dranomaso andro aman’alina tsy tapaka,
fa ny virjiny zanakavavin’ny vahoaka,
dia efa hiharan-doza lehibe, sy fery mampanaintaina fatratra.
Raha mankany an-tsaha aho, dia indreto olona voagorobaky ny sabatra;
raha miditra ao an-tanàna, dia inty ny fahoriana avy amin’ny mosary.
Ny mpaminany amam-pisorona avy no mirenireny any amin’ny tany tsy fantany.”
Ary hoy izy ireo:
“Tompo ô, dia narianao avokoa va i Jodà?
Efa naharikoriko ny fanahinao va i Siôna?
Nahoana no dia kapohinao tsy manam-pahasitranana izahay?
Niandry fiadanana izahay nefa tsy misy soa kely akory.
Niandry fotoam-pahasitranana, kanjo fampitahorana no mitranga.
Ry Tompo ô, miaiky ny haratsianay izahay, sy ny heloky ny razanay;
fa nanota taminao izahay.
Noho ny Anaranao,
aza dia atao tsinontsinona, aza dia hamavoina ny seza fiandrianan’ny voninahitrao.
Tsarovy fa aza tsoahina ny fanekenao taminay.
Mba misy mahalatsaka orana va ny sampy foanan’ny firenena?
sa ny lanitra no manome ny ranonorana?
Fa tsy Ianao ihany, ry Tompo Andriamanitray?
Koa Ianao no antenainay, satria Ianao no manao izany rehetra izany.”
— Izany àry ny tenin’ny Tompo.
Salamo 78, 8. 9. 11. 13
Aza dia tsarovana hamelezana anay ireo helokay fahiny;
ny indrafonao atsena anay faingana:
fa reraka loatra izahay!
Vonjeo izahay, ry Andriamanitra Mpamonjy;
noho ny Voninahitrao!
Afaho izahay, avelao ny otanay:
noho ny Anaranao!
Aoka ho tody eo anoloanao ny senton’ireo mpigadra!
Araka ny halehiben’ny sandrinao,
afaho ireo voatondro hovonoina!
Ary izahay olonao sy ondry fiandrinao dia hisaotra Anao mandrakizay,
ary hitanisa ny fiderana Anao amin’ny taranaka mifandimby.
Aleloia. Aleloia.
Niteraka antsika an-tsitra-po tamin’ny fahamarinana ny Ray; mba ho santatry ny zava-boaariny isika.
Aleloia.
Evanjely Masina nosoratan’i Masindahy Matio (Mt. 13, 36-43)
Tamin’izany andro izany,
nony efa nampody ny vahoaka i Jesoa dia mba nody,
ary nanatona Azy ny mpianany nanao hoe:
“Lazao anay ny hevitry ny fanoharana ny amin’ny ahi-dratsy.”
Ary i Jesoa namaly ka nilaza taminy hoe:
“Ny mpamafy ny voa tsara dia ny Zanak’Olona;
ny tanimbary dia izao tontolo izao;
ny voa tsara dia ny zanaky ny Fanjakana;
ny ahi-dratsy dia ny zanak’ilay Ratsy;
ny fahavalo izay namafy azy, dia ny demony;
ny taom-pijinjana, dia ny fahataperan’izao tontolo izao;
ary ny mpijinja, dia ny Anjely.
Tahaka ny anangonana ny ahi-dratsy sy andorana azy amin’ny afo
no hatao raha mby amin’ny fahataperan’izao tontolo izao.
Haniraka ny Anjeliny ny Zanak’Olona,
ary ireo dia hanangona sy hamoaka ny mpanafintohina sy ny mpanao ratsy rehetra
hiala amin’ny Fanjakany,
ka hanipy azy ao amin’ny memy mirehitra:
any no hisy fitomaniana sy fikitroha-nify.
Amin’izany kosa ny olo-marina dia hamirapiratra tahaka ny masoandro
any amin’ny Fanjakan’ny Rainy.
Aoka hihaino izay manan-tsofina hihainoana.”
— Izany àry ny tenin’ny Tompo.
Bokin’i Jeremia Mpaminany (Jer. 13, 1-11)
Izao no nolazain’ny Tompo tamiko:
“Mandehàna mividy fehikibo rongony madinika ho anao;
ka ataovy amin’ny andilanao fa aza atao anaty rano.”
Dia nividy ny fehikibo araka ny tenin’ny Tompo aho, ka nataoko tamin’ny andilako.
Tonga tamiko fanindroany indray ny tenin’ny Tompo nanao hoe:
“Ento ilay fehikibo novidinao, izay efa eo amin’ny andilanao;
ka mitsangàna, mandehàna mankany Eofrata,
afeno any, ao an-tsefatsefaky ny vatolampy izy.”
Dia nandeha aho, ka nafeniko tao amoron’ny Eofrata izy, araka ny nandidian’ny Tompo ahy.
Nony afaka andro maro be, dia hoy ny Tompo tamiko:
“Mitsangàna ianao, mandehàna mankany Eofrata,
alao ilay fehikibo nasaiko nafeninao any.”
Dia nandeha nankany Eofrata aho, ka nihady,
dia naka ilay fehikibo teo amin’ny toerana nanafenako azy;
kanjo indro simba tsy azo atao na inona na inona intsony ilay fehikibo.
Ary tonga tamiko ny tenin’ny Tompo nanao hoe:
“Izao no lazain’ny Tompo:
toy izany no hanafoanako ny avonavon’i Jodà, sy ny avonavon-dehiben’i Jerosalema.
Ity vahoaka ratsy ity, izay tsy mety mihaino ny teniko, fa mandeha amin’ny ditran’ny fony,
sy manaraka andriamani-kafa, mba hanompo azy sy hivavaka aminy,
dia ho tahaka ity fehikibo ity tsy azo atao na inona na inona intsony ity.
Satria toy ny firaikitry ny fehikibo amin’ny andilan’ny olona,
no nandraiketako ny taranak’i Israely rehetra sy ny taranak’i Jodà rehetra tamiko
— teny marin’ny Tompo,
mba ho vahoaka ho Ahy izy ireo, mba ho anarana, ho haja, ho voninahitra,
nefa tsy nihaino Ahy izy.”
— Izany àry ny tenin’ny Tompo.
Salamo: Det. 32, 18-19. 20. 21
Nandao ny vatolampy izay niteraka anao ianao
ary nanadino ny Andriamanitra izay nanao anao.
Nahita izany ny Tompo ka tezitra,
nohantsin’ny zanany lahy aman-janany vavy Izy.
Hoy izy: hafeniko azy ny tavako,
dia ho hitako izay hiafarany,
fa taranaka mpivadibadika izy,
zaza tsy manana hitsim-po.
Nampahasaro-piaro Ahy tamin’izay tsy andriamanitra izy
ary nampahatezitra Ahy tamin’ny sampiny tsinontsinona,
ka dia mba hampahasaro-piaro azy amin’izay tsy vahoaka kosa Aho,
sy hampahatezitra azy amin’izay firenena adala.
Aleloia. Aleloia.
Velona sy mahery ny tenin’Andriamanitra, fantany mazava ny fieritreretana amam-pisainan’ny fo.
Aleloia.
Evanjely Masina nosoratan’i Masindahy Matio (Mt. 13, 31-35)
Tamin’izany andro izany,
i Jesoa nanao fanoharana hafa tamin’ny vahoaka nanao hoe:
“Ny fanjakan’ny lanitra dia mitovy amin’ny voatsinapy
izay nalain’ny olona ka nafafiny tany an-tanimboliny.
Kely indrindra amin’ny voan-javatra rehetra izy;
fa rahefa mitombo kosa, dia lehibe noho ny anana rehetra, ka tonga hazo;
dia avy ny voromanidina mipetraka ao amin’ny rantsany.”
Ary nanao fanoharana hafa taminy koa Izy hoe:
“Ny fanjakan’ny lanitra, dia mitovy amin’ny lalivay,
izay nalain’ny vehivavy anankiray ka nataony tao amin’ny koban-dafarina intelon’ny famarana,
mandra-pahazon’ny lalivay azy rehetra.”
Fanoharana no nilazan’i Jesoa izany rehetra izany tamin’ny vahoaka,
ary Izy tsy niteny taminy afa-tsy tamin’ny fanoharana,
mba ho tanteraka ny tenin’ny mpaminany manao hoe:
Hiloa-bava hilaza fanoharana aho,
ary hanambara zavatra izay miafina hatramin’ny nanaovana an’izao tontolo izao.
— Izany àry ny tenin’ny Tompo.
Boky faharoan’ny Mpanjaka (2 Mpanj. 4, 42-44)
Tamin’izany andro izany, nisy lehilahy iray avy any Baala-Salira
nitondra mofo natao tamin’ny santa-bary ho an’i Elisea, olon’Andriamanitra,
dia mofo ôrja roapolo, sy vary vaovao tao an-dasàkany;
ka hoy i Elisea:
“Omeo ny olona hohaniny”.
Fa hoy ny navalin’ny mpanompony:
“Hatao ahoana no fandroso izany eo anatrehan’ny olona zato?”
Fa hoy i Elisea:
“Omeo ireo olona ireo hohaniny; fa izao no lazain’ny Tompo:
‘Hihinana ny olona ary mbola hisy sisa tsy lany’”.
Dia norosoana izy ireo ka nihinana,
nefa mbola nisy sisa tsy lany araka ny teny voalazan’Andriamanitra.
— Izany ary ny tenin’ny Tompo.
Sal. 144, 10-11. 15-16. 17-18
Midera Anao, ry Tompo, ny asanao rehetra,
misaotra Anao ny mpivavaka aminao;
ny voninahitry ny Fanjakanao resahiny,
ny asanao mahery teneniny.
Ny mason’ny voaary rehetra miandry Anao,
Ianao mpamahana azy ara-potoana:
ny tananao sokafanao,
dia voky zava-tsoa ny miaina rehetra.
Marina amin’ny lalany rehetra ny Tompo,
tsara fo amin’ny asany rehetra;
ny Tompo eo anilan’izay miantso Azy,
dia ireo izay miantso Azy marina.
Taratasin’i Masindahy Paoly Apôstôly ho an’ny kristianina tany Efezy (Efez. 4, 1-6)
Ry kristianina havana, mangataka aminareo aho,
dia izaho izay an-tranomaizina noho ny amin’ny Tompo,
mba hanao fitondran-tena mendrika ny fiantsoana niantsoana anareo ianareo,
amin’ny fanetren-tena sy halemem-panahy rehetra,
amin’ny fahari-po, amin’ny fifandeferana, amim-pitiavana;
mikeleza aina hitana ny firaisam-po amam-panahy akamban’ny fihavanana;
fa tsy misy afa-tsy tena iray, sy fanahy iray,
araka ny niantsoana anareo ho amin’ny fanantenana iray:
tsy misy afa-tsy Tompo iray, finoana iray, Batemy iray,
ary Andriamanitra iray, izay Rain’izy rehetra,
ambonin’izy rehetra, manerana azy rehetra, ary ao anatin’izy rehetra.
— Izany àry ny tenin’ny Tompo.
Aleloia. Aleloia.
Hankalazaina anie ny Mpanjaka avy, amin’ny Anaran’ny Tompo! Fiadanana anie any an-danitra ary voninahitra anie any amin’ny Avo indrindra!
Aleloia.
Evanjely Masina nosoratan’i Masindahy Joany (Jo. 6, 1-15)
Tamin’izany andro izany,
i Jesoa lasa nankany an-dafin’ny ranomasin’i Galilea, na ny farihin’i Tiberiady,
ary vahoaka be no nanaraka Azy,
noho izy ireo nahita ny fahagagana nataony tamin’ny marary.
Dia niakatra tany an-tendrombohitra i Jesoa,
ka nipetraka teo Izy mbamin’ny mpianany.
Efa akaiky ny Paka andro lehibe tamin’ny Jody.
Nony nanopy ny masony i Jesoa, ka nahita ireto vahoaka be nanatona Azy,
dia hoy Izy tamin’i Filipo:
“Aiza no hividianantsika mofo hohanin’ireo?”
Fantany rahateo ny hataony, fa ny hitsapany azy no nilazany an’izany.
Dia hoy i Filipo taminy:
“Na dia mofona denie roanjato aza,
tsy ampy hahazoan’izy ireo sombiny kely avy akory”.
Ny anankiray tamin’ny mpianany koa,
dia i Andre rahalahin’i Simôna Piera, nilaza taminy hoe:
“Misy zazalahy anankiray manana mofo ôrja dimy sy hazandrano roa ao:
fa ho ampy inona izany amin’ny olona maro be toy izao?”
Dia hoy i Jesoa:
“Asaovy mipetraka ny olona”.
Ary nisy ahitra be teo, ka dia nipetraka ny olona,
ary tokony ho dimy arivo no isan’ny lehilahy.
Dia nandray ny mofo i Jesoa,
ka nony efa nisaotra dia nizarazara azy tamin’izay nipetraka
ary nomeny toy izany koa ny hazandrano sady nampanaranany fo.
Rehefa voky izy ireo, dia hoy i Jesoa tamin’ny mpianany:
“Angony ny sombintsombiny sisa tsy lany, mba tsy hisy very”.
Dia nangoniny, ka nahafeno sobiky roa ambin’ny folo
ny sombintsombin’ny mofo dimy sisa tsy lanin’izay nihinana.
Nony nahita ny fahagagana nataon’i Jesoa ireo olona ireo, dia nanao hoe:
“Ity tokoa no ilay Mpaminany ho avy amin’izao tontolo izao”.
Dia fantatr’i Jesoa fa ho avy haka Azy an-keriny hatao mpanjaka izy ireo,
ka lasa indray Izy irery nankany an-tendrombohitra.
— Izany àry ny tenin’ny Tompo.
♦ Manatanteraka fitsidihina eto Madagasikara, ny 4 hatramin'ny 9 septambra 2024, i P. Alfred Maravilla, Mpanolotsaina Jeneraly momba ny Misiona, ao amin'ny Fikambanana Salezianin'i Don Bosco... ♦ Manentana ny kristianina hivavaka ho an'ny olona tsirairay, mba hihaino ny fitarainan'ny tany, ny Papa François amin'ity volana septambra ity... ♦ Nanomboka androany ny dingana faharoa amin'ny fitsidihina apôstôlika ivelan'i Roma, andiany faha-45, ataon'ny Papa François, izay tanterahany any Asie sy Océanie...
Tohiny...Noho ny fetin'ny Noely, Fankalazana manetriketrika ny nahaterahan'i Kristy Mpamonjy an'izao tontolo izao, dia manafatra ary miray soa ho antsika i Mompera Bizimana Innocent, Lehiben'ny Salezianin'i Don Bosco eto Madagasikara sy ny Nosy Maorisy.
Tohiny...Ny horonan-tsary "Zatti, notre frère" (Argentina, 2020) dia manoritsoritra ireo vanim-potoana tena sarotra teo amin'ny fiainany. Tao Viedma no nitranga ny tantara tamin'ny taona 1941 : 60 taona i Zatti ary noterena handao ilay toeram-pitsaboana izay nikatrohany amam-polo taonany maro. Fitsapana mivaivay ho an'ny finoany sy ny herim-pony izany.
Tohiny...© 2024 Radio Don Bosco