Vakiteny voalohany

Bokin’i Ezekiela Mpaminany (Ezek. 37, 1-14)

Ry taola-maina, henoy ny tenin’ny Tompo: Hampiakatra anareo avy ao am-pasanareo Aho, ry vahoakako.

Tamin’izany andro izany,
tonga tamiko ny tenin’ny Tompo ka nentin’ny Tompo nivoaka am-panahy aho,
dia napetrany teo amin’ny lemaka feno taolana.
Nentiny nandeha teo akaikin’ireo manodidina azy aho.
Be dia be izy ireo teo an-tampon’ity tany lemaka, sady maina dia maina.
Ary hoy Izy tamiko:

“Ry zanak’olona, mbola ho velona va ireo taolana ireo?”

Ka hoy ny navaliko Azy:

“Ry Tompo Andriamanitra ô, Ianao no mahalala!”

Dia hoy Izy tamiko:

“Aminanio ireo taolana ireo, ka ataovy aminy hoe:
Ry taola-maina, mihainoa ny tenin’ny Tompo!
Izao no lazain’ny Tompo Andriamanitra amin’ireto taolana ireto:
Indro hampiditra fanahy ao aminareo Aho, dia ho velona ianareo.
Hasiako hozatra eo aminareo,
hampaniriako nofo eo aminareo,
hovelarako hoditra eo amboninareo,
ary hasiako fanahy ao aminareo, dia ho velona ianareo,
ka ho fantatrareo fa Tompo Aho.”

Dia naminany araka ny teny azoko aho;
ka nony naminany, dia nisy feo re, dia injany zavatra mitatatata;
dia nifanatona ireo taolana.
Nojereko ka indro fa nisy hozatra ama-nofo naniry teo ambonin’ireo
ary nisy hoditra nivelatra teo ambonin’ireo;
saingy tsy mbola nisy fanahy tao aminy.

Ary hoy Izy tamiko:

“Maminania amin’ny fanahy;
maminania, ry zanak’olona, ka lazao amin’ny fanahy hoe:
Izao no lazain’ny Tompo Andriamanitra:
Avia, ry fanahy avy any amin’ny vazan-tany efatra;
ka tsotsofy ireto olona voavono ireto, ary aoka ho velona izy.”

Dia naminany araka ny nandidiany ahy aho,
ka niditra tamin’ireo ny fanahy, dia velona izy,
sady nitsangana tamin’ny tongony:
tafika lehibe, tena lehibe indrindra.

Hoy ny Tompo tamiko:

“Ry zanak’olona, ireo taolana ireo, dia ny taranak’i Israely rehetra.
Indreo izy ireo manao hoe:
Maina ny taolanay; levona ny fanantenanay, very izahay!
Koa maminania, ary lazao aminy hoe:
Izao no lazain’ny Tompo Andriamanitra:
Indro Aho hanokatra ny fasanareo,
hampiakatra anareo avy ao am-pasanareo, ry vahoakako ô,
ary hitondra anareo ho eo amin’ny tanin’i Israely.
Ary dia ho fantatrareo fa Tompo Aho,
rahefa voasokatro ny fasanareo, ary tafakatra avy ao am-pasanareo ianareo, ry vahoakako.
Hataoko ao anatinareo ny fanahiko, dia ho velona ianareo,
sady homeko fitsaharana eo amin’ny taninareo
ka dia ho fantatrareo fa Izaho Tompo dia milaza sy manatanteraka koa.”

— Izany àry ny tenin’ny Tompo.

Setriny

Salamo 106, 2-3. 4-5. 6-7. 8-9

Derao ny Tompo fa tsara. Eny, mandrakizay ny hatsaram-pony.

Mandredòna izany ianareo navotan’ny Tompo,
izay teo an-tanan’ny mpampahory
nangoniny avy amin’ny vazan-tany:
atsimo sy avaratra, atsinanana sy andrefana!

Tafasia tany an’efitra aman-tany foana izy ireo,
tsy nahita lalana mihazo tanàna hiatoana;
tratry ny hanoanana sy hetaheta,
nandre harerahana tao anatiny.

Dia nitaraina tamin’ny Tompo fa nijaly:
ka nafahany tamin’ny fahoriany,
nampizoriny tamin’ny lala-mahitsy,
hahatongavana an-tanàna hiatoana.

Aoka izy hisaotra ny Tompo noho ny hatsaram-pony,
sy ny zava-mahagaga vitany ho an’ny olombelona;
fa ny fanahy mangetaheta hetsahiny,
ny fanahy mosarena vokisany soa!

Evanjely

Aleloia. Aleloia.

Izay mitandrina ny didin’i Kristy no manana ny fitiavana an’Andriamanitra Lavorary ao aminy tokoa.

Aleloia.

Evanjely Masina nosoratan’i Masindahy Matio (Mt. 22, 34-40)

Tiavo ny Tompo Andriamanitrao; tiavo ny namanao tahaka ny tenanao.

Tamin’izany andro izany,
ren’ny Farisianina fa nataon’i Jesoa tsy nanan-kalahatra ny Sadoseanina,
dia nivory izy rehetra;
ary ny anankiray izay mpahay lalàna tamin’izy ireo nanontany Azy
mba haka fanahy Azy hoe:

“Ry Mpampianatra ô,
inona no didy lehibe indrindra amin’ny lalàna?”

Ary hoy i Jesoa taminy:

“Tiava ny Tompo Andriamanitrao amin’ny fonao rehetra,
sy amin’ny fanahinao rehetra, ary amin’ny sainao rehetra.
Izany no didy sady zokiny indrindra no voalohany;
ary ny faharoa izay tahaka ny voalohany ihany dia izao:
Tiava ny namanao tahaka ny tenanao.
Ao amin’izany didy roa izany ny lalàna rehetra sy ny mpaminany.”

— Izany àry ny tenin’ny Tompo.

Vakiteny voalohany

Bokin’i Ezekiela Mpaminany (Ezek. 36, 23-28)

Nomeko fo vaovao ianareo ary hasiako fanahy vaovao ao anatinareo.

Izao no lazain’ny Tompo:

“Hamasiniko ny Anarako lehibe izay voaala baràka,
eny amin’ny firenena nanalanareo baràka azy,
dia ho fantatry ny firenena fa Tompo Andriamanitra Aho
— Teny marin’ny Tompo Andriamanitra —,
rahefa manamasin-tena ao aminareo, eo imasony Aho.
Halaiko avy any amin’ny firenena ianareo,
hangoniko avy any amin’ny tany rehetra ka hampodìko eo amin’ny taninareo.
Hofafazako rano madio ianareo, dia hadio;
ny fahalotoanareo rehetra mbamin’ny fahavetavetanareo rehetra,
hataoko afaka aminareo.
Homeko fo vaovao ianareo, ary hasiako fanahy vaovao ao anatinareo;
hesoriko amin’ny nofonareo ny fo vato,
ary hataoko manaraka ny fitsipiko ianareo,
ka hitandrina ny didiko, sy hanaraka izany.
Honina eo amin’ny tany nomeko ny razanareo ianareo,
dia ho vahoakako ianareo, ary Izaho ho Andriamanitrareo.”

— Izany àry ny tenin’ny Tompo.

Setriny

Salamo 50, 12-13. 14-15. 18-19

Hofafazako rano madio ianareo, ka hadio; hafahako amin’ny fahalotoanareo; hodioviko amin’ny sampinareo.

Fo madio vaovao no angatahiko
sy fanahy mahatoky tanteraka.
Aza alàna aminao aho, ry Tompoko,
ny Fanahy aza esorinao amiko.

Amereno hafaliana aho ho vonjiko,
dia tolory fanahy tena mendrika.
Ny mpanota hotoroako lalana,
aminao no tsy maintsy hiverenany.

Ny fanahy torotoro, ry Tompoko,
io no sorona tianao hatolotro.
Tsy hodianao tsy hita, Andriamanitro,
ny fanahy torotoro sy trotraka.

Evanjely

Aleloia. Aleloia.

Mahatoky ny lahatrao, ry Tompo, ary mafy orina mandrakizay alaovalo.

Aleloia.

Evanjely Masina nosoratan’i Masindahy Matio (Mt. 22, 1-14)

Antsoy ho aty amin’ny fampakaram-bady avokoa izay hitanareo.

Tamin’izany andro izany,
i Jesoa niteny tamin’ny lehiben’ny mpanora-dalàna sy ny loholona indray nanao ity fanoharana ity hoe:

“Ny fanjakan’ny lanitra dia tahaka ny andriamanjaka anankiray
izay nanao fanasana tamin’ny fampakaram-badin’ny zanany lahy,
ka naniraka ny ankiziny hanainga izay efa nasaina, ho any amin’ny fampakaram-bady,
fa tsy nety nankany ireo.
Dia naniraka ankizy hafa indray izy nanao hoe:
Lazao amin’ny nasaina hoe:
Indro efa voavoatra ny nahandro ka efa voavono ny ombiko sy ny zavatra nafahy,
ary efa vonona avokoa ny zavatra rehetra,
koa tongava aty amin’ny fampakaram-bady ianareo.
Nefa tsy nahoany akory izany, fa samy lasa nandeha izy,
ny iray nankany amin’ny sahany, ny iray nankany amin’ny varony;
ary ny sasany nisambotra ny ankiziny,
ka nony efa notevatevainy dia novonoiny.

Tezitra ny mpanjaka nony nandre izany,
ka naniraka miaramila nandringana izany mpamono olona izany,
sy nandoro ny tanànany.
Dia hoy izy tamin’ny ankiziny:
Efa voaomana ny fanasana amin’ny fampakaram-bady,
fa ny nasaina no tsy mendrika.
Koa mandehana ianareo any amin’ny fihaonan-dalana,
ary asao ho aty amin’ny fampakaram-bady avokoa izay hitanareo.
Dia niely eran’ny arabe ny ankiziny, nanangona izay rehetra hitany na tsara na ratsy,
ka hipoka ny mpihinana ny trano fampakarana.
Ary niditra ny mpanjaka nizaha ny mpihinana,
ka nahita lehilahy anankiray tsy niakanjo ny akanjo fitondra amin’ny fampakaram-bady,
dia hoy izy taminy:
Ry sakaiza, nahoana ianao no niditra eto,
nefa tsy miakanjo ny akanjo fitondra amin’ny fampakaram-bady?
Fa sina ilay olona;
ka hoy ny mpanjaka tamin’ny mpanompony:
Afatory ny tongotra aman-tanany,
ka ario any amin’ny maizina any ivelany io,
any no hisy fitomaniana sy fikitroha-nify.
Fa maro no nantsoina, nefa vitsy no fidìna.”

— Izany àry ny tenin’ny Tompo.

Vakiteny voalohany

Bokin’i Ezekiela Mpaminany (Ezek. 34, 1-11)

Indro hotadiaviko ao amin’ny tanany ny ondriko, ka tsy ho remby ho azony hanina intsony.

Tonga tamiko ny Tenin’ny Tompo nanao hoe:

“Ry zanak’olona, maminania ny amin’ny mpiandry an’i Israely.
Maminania ka lazao aminy, dia amin’ireo mpiandry ireo hoe:
Izao no lazain’ny Tompo Andriamanitra:
Loza ho an’ny mpiandry an’i Israely,
fa ny tenany ihany no nofahanan’izy ireo!
Moa tsy ny ondry va no tokony hofahanan’ny mpiandry?
Nohaninareo ny taviny, notafianareo ny volony, novonoinareo ny matavy;
tsy namahana ny ondry ianareo:
tsy nanatanjaka ny malemy, tsy nitsabo ny marary, tsy namehy ny naratra,
tsy namerina ny nania, tsy nitady ny very,
fa nitondra azy an-kalozàna sy an-kasiahana!
Ka niely izy fa tsy nisy mpiandry;
zary rembin’izao biby an-tsaha rehetra izao, dia tafaely.
Mirenireny eny an-tendrombohitra rehetra eny ny ondriko,
sy eny an-kavoana milangalanga rehetra eny;
tafaely any amin’ny tany rehetra ny ondriko,
nefa tsy ahìn’ny olona akory, na mba nisy lasa nitady azy.”

Koa mihainoa ny tenin’ny Tompo ianareo, ry mpiandry ondry:

“Velona Aho”

— Teny marin’ny Tompo Andriamanitra: —

“Noho ny ondriko navela hobaboina,
noho ny ondriko zary remby ho an’ny bibidia rehetra fa tsy nisy mpiandry,
sy noho ny mpiandriko tsy niahy ny ondriko,
fa ny tenany ihany no fahanan’ireo mpiandry ireo,
ary ny ondriko tsy mba nofahanany;
noho izany dia mihainoa ny tenin’ny Tompo ianareo ry mpiandry ondry.”

Izao no lazain’ny Tompo Andriamanitra:

“Indro ho avy any amin’ny mpiandry ondry Aho;
hotadiaviko ao amin’ny tanany ny ondriko,
ary tsy hisy ondry havelako handrasany intsony;
ary ny mpiandry tsy hamahana ny tenany intsony;
hotsoahako eny am-bavany ny ondriko,
ka tsy ho remby ho azony hanina intsony.
Fa izao no lazain’ny Tompo Andriamanitra;
Indro Izaho dia Izaho ihany no hiahy ny ondriko sy handinidinika azy.”

— Izany àry ny tenin’ny Tompo.

Setriny

Salamo 22, 1-3a. 3b-4. 5. 6

Ny Tompo miandry ahy, tsy orin’inona aho.

Ny Tompo miandry ahy tsy orin’inona aho:
izaho ampiraotiny amin’ny vilona maitso,
entiny amin’ny rano manala sasatra, velombelominy fanahy,
tarihiny amin’ny lala-marina noho ny Anarany!

Na mamaky lohasaha maizina aza aho,
tsy matahotra izay loza.
Satria Ianao miaraka amiko:
ny kibay aman-tehinao mampatoky ahy.

Rosoanao sakafo
eo imason’ny rafiko aho:
ka ny loha miravona ilo,
ny kapoaka safomorona!

Eny, hatsaram-po sy hasambarana
no manjohy amin’ny fiainana tontolo;
ny tranon’ny Tompo no fonenana
taona maro mifandimby!

Evanjely

Aleloia. Aleloia.

Asehoy ny mpanomponao ny tavanao, ary ampianaro ahy ny fitsarànao.

Aleloia.

Evanjely Masina nosoratan’i Masindahy Matio (Mt. 20, 1-16a)

Sa ratsy ny masonao satria tsara Aho?

Tamin’izany andro izany,
i Jesoa nanao itý fanoharana itý tamin’ny mpianany:

“Ny fanjakan’ny lanitra dia tahaka ny lehilahy tompon-trano,
izay nivoaka marainakoa hanakarama mpiasa ho any an-tanim-boalobony.
Ary rahefa nifanaiky tamin’ny mpiasa izy
fa denie iray avy isan’andro ny karamany,
dia nasainy hankany an-tanim-boalobony izy ireo.

Ary nivoaka izy tamin’ny ora fahatelo,
dia nahita mpiasa hafa nidonana-poana teny an-kianja;
ka andeha koa ianareo, hoy izy taminy, mankany amin’ny tanim-boaloboko,
fa homeko anareo izay antonony. Dia nankany ireo.
Ary nivoaka indray izy tamin’ny ora fahenina sy fahasivy,
ka nanao toraka izany koa.
Ary dia nivoaka koa izy tamin’ny ora faharaika ambin’ny folo,
ka nahita mpiasa hafa nijanom-poana, dia hoy izy taminy:
Nahoana ianareo no midonana-poana eto mandritra ny andro?
Fa hoy ireo taminy:
Satria tsy nisy nanakarama anay.
Dia hoy izy taminy:
Andeha koa ianareo mankany amin’ny tanim-boaloko.

Ary nony hariva ny andro,
dia hoy ilay tompon’ny tanim-boaloboka tamin’ny mpitandrina ny fananany:
Antsoy ny mpiasa, ary omeo ny karamany,
aseseo avy atý amin’ny farany, ka hatrany amin’ny voalohany.
Dia nanatona izay nilatsaka tamin’ny ora faharaika ambin’ny folo,
ka samy nahazo denie iray misesy avy.
Fa nony nanatona kosa ny voalohany, dia nanantena hahazo bebe kokoa,
kanjo denie iray misesy avy ihany koa no azony.
Teo am-pandraisana izany izy dia nimonomonona tamin’ilay tompon-trano nanao hoe:
Tsy niasa afa-tsy adim-pamantaranandro iray monja ireto farany ireto,
kanefa nampitovianao aminay izay niaritra ny hasasarana sy ny hainandro nandritra ny andro.
Dia izao no navalin’ny tompo ny anankiray tamin’izy ireo:
Ry sakaiza, tsy manao zavatra tsy marina aminao aho;
moa tsy denie iray va no nifanekenao tamiko?
Alao ny anao, dia mandehana,
fa tiako ny manome an’ilay farany toraka ny anao koa.
Tsy mahazo manao izay tiako amin’izay fananako va aho,
sa ratsy ny masonao satria tsara aho?
Dia toy izany, ny farany ho voalohany, ary ny voalohany ho farany.”

— Izany àry ny tenin’ny Tompo.