Lohahevitra : Vaovao

♦ Voasambotra androany teny Mahamasina, ny filoha mpitarika ny Antenimieran'ny Ray aman-dreny Foko Malagasy. Tsy fantatra mazava ny antony, fa mety misy ifandraisany amin'ny hetsika kasaina hotanterahana amin'ny sabotsy izao... ♦ Nomarihana androany 22 febroary, izay daty nahaterahan'ny mpanorina azy, ny Andro maneran-tany ho an'ny Skotisma... ♦ Niampy telo indray ireo faritra miroso mankany amin'ny tany hay na voakasiky ny fiangazanana, eto Madagasikara. Milaza ho tsy mipetra-potsiny ny Minisiteran'ny Tontolo Iainana, manoloana izany...

Lohahevitra : Hirika
Voadika amin'ny fiteny :  Français (France)   English (United Kingdom) 

Mivelona amin'ny fambolena sy ny fiompiana ao anatin'ny Distrikan'i Faratsiho Faritr'i Vakinankaratra i Nantenaina Casimir. Niofana manokana momba ny fitsaboana izy saingy nisafidy ny ivelona amin'ny fambolena sy ny fiompiana. Tanora nanovo fahalalana tao amin'i Papa Bio na Ranaivoarison Basil i Nantenaina Casimir. Kankana 2 tanana teo ho eo tao amin'i Papa Bio no niatombohany, roa taona lasa izay.

Lohahevitra : Vaovao

♦ Velom-panahiana momba ny ho avin'ny fananan-tany eto Madagasikara ny firaisamonim-pirenena misehatra amin'izany manoloana ny fampihatoana ny fanomezana tanim-panjakàna ny mponina... ♦ Mbola maro ny tokantrano Malagasy misy Ray sy Reny. Iharan'ny fanavahana sy fanilikilihana ireo renim-pianakaviana miteraka nefa tsy manambady araka ny fanadihadiana natoan'ny UCM niarahany nanatontosa tamin'ireo mpikaroka aty Afrika sy any Frantsa... ♦ Tanterahana eny anivon'ny hopitalim-panjakàna manerana ny nosy nanomboka androany hatramin'ny sabotsy izao ny varavarana misokatra karakarain'ny ministeran'ny fahasalamam-bahoaka... ♦ Nihotsaka ny toeram-pitrandrahana haritany iray tsy ara-dalàna any Venezuela ny talata teo...

Lohahevitra : Miaina sy mitia
Voadika amin'ny fiteny :  Français (France)   English (United Kingdom) 

Ny fandraisana andraikitra sy fanomezan-danja ny tsirairay eo amin'ny fianakaviana sy ny mpiara-monina dia anisan'ny fanoitra iray entina hampivoarana ny fiainana andavan'andro. Ny fahasamihafana dia isan'ny mikolokolo ny fifankatiavan'ny mpivady : izay tsy mahay sobika mahay fatam-bary" ary ny firaisan-kina no hery. Fandaharana "miaina sy mitia" iarahana amin'ny Ivon-toerana Arrupe Madagasikara sy ny vaomieran'ny Eveka misahana ny Fianakaviana.

Lohahevitra : Vaovao

♦ Marihana androany ny andro eran-tany ho an'ny skotisma. Hanao hetsika eny amin'ny ANS Ampefiloha ny Antilin'i Madagasikara tafiditra amin'ny fankalazana ny faha 100 taona nijoroany... ♦ Nomarihana omaly koa ny andro iraisam-pirenena ho an'ny Tenin-dreny. Nisy ny atrik'asa natokana ho an'ny mpanoratra, ny mpikabary ary ny mpikirakira ny teny Malagasy nanamarihana izany... ♦ Niakatra 28% ny tahan'ny fahaiza-mamaky teny tany amin'ireo EPP maherin'ny 10.000 nisitraka ny tetik'asa TAFITA, ary niakatra 25% izany ho an'ny fahaizana kajy... ♦ Niloa-bava momba ny toe-java-misy any Gaza ny tale jeneralin'ny OMS fa tsy misy fanajàna ny zon'olombelona intsony any amin'ity faritra palestiniana ity...

Lohahevitra : Raki-tsarobidy
Voadika amin'ny fiteny :  Français (France)   English (United Kingdom) 

Maro ny olona miteny fa ny fisotroana toaka dia fialana hetaheta sy fialan-tsasatra miaraka amin'ny tapaka sy ny namana. Ny toaka dia anisan'ny zava-mahadomelina be mpanjifa indrindra maneran-tany nefa tena loza mitatao ho an'ny fahasalamam-bahoaka sy ny fifamoivoizana ny vokatra aterak'izy io. Maro ny misotro toaka noho ny olana mba tsy ahatsiarovany izay manjo azy... Katesizy momba ny fandraisana zava-mahadomelina, iarahana amin'i P. Avellin Ravelonanosy. 

Lohahevitra : Vaovao

♦ Niakatra 28%, ny tahan'ny fahaiza-mamaky teny tany amin'ireo EPP maherin'ny 10.000 nisitraka ny tetikasa TAFITA, ary niakatra 25% izany ho an'ny fahaizana kajy, tany amin'ireo EPP ireo ihany... ♦ Hiara-hientana amin'ny fahatsiarovana an'i Baden-Powell indray ny Antilin'i Madagasikara, rahampitso 22 febroary, eny amin'ny ANS Ampefiloha... ♦ Mitaky ny fampitsaharana ny fametrahana ny Sekreteram-panjakana ho eo ambany fiahian'ny Fiadidiana ny Repoblika, ireo vondron'ny fiarahamonim-pirenena maromaro...

Lohahevitra : Tenin'ny Tompo
Voadika amin'ny fiteny :  Français (France)   English (United Kingdom) 

2 marsa 2024 — Sabotsy, Herinandro Faharoa amin'ny Karemy — Hitsangana aho ho any amin’ny raiko, ka hanao aminy hoe: “Dada ô, nanota tamin’ny lanitra sy teo anatrehanao aho.” — Evanjely Masina nosoratan’i Masindahy Lioka (Lk. 15, 1-3. 11-32)

Lohahevitra : Tenin'ny Tompo
Voadika amin'ny fiteny :  Français (France)   English (United Kingdom) 

1 marsa 2024 — Zoma, Herinandro Faharoa amin'ny Karemy — Toy izao no nitiavan’Andriamanitra an’izao tontolo izao: nomeny ny Zanany Tokana; ka hanana ny fiainana mandrakizay izay rehetra mino Azy — Evanjely Masina nosoratan’i Masindahy Matio (Mt. 21, 33-43. 45-46)

Lohahevitra : Tenin'ny Tompo
Voadika amin'ny fiteny :  Français (France)   English (United Kingdom) 

29 febroary 2024 — Alakamisy, Herinandro Faharoa amin'ny Karemy — Indro ankehitriny ny fotoana tsara, indro ankehitriny ny androm-pamonjena — Evanjely Masina nosoratan’i Masindahy Lioka (Lk. 16, 19-31)

Lohahevitra : Tenin'ny Tompo
Voadika amin'ny fiteny :  Français (France)   English (United Kingdom) 

28 febroary 2024 — Alarobia, Herinandro Faharoa amin'ny Karemy — Ny Teninao, ry Tompo, dia fanahy sy fiainana; Ianao no manana ny teny mahavelona mandrakizay — Evanjely Masina nosoratan’i Masindahy Matio (Mt. 20, 17-28)

Lohahevitra : Karemy
Voadika amin'ny fiteny :  Français (France)   English (United Kingdom) 

Vakiteny voalohany

Bokin’i Jeremia Mpaminany (Jer. 18, 18-20)

Andeha hamely azy isika.

Hoy ireo olon-dratsy:

“Andeha, hiray tetika hamely an’i Jeremia isika,
fa tsy ho faty ny lalàna ao amin’ny mpisorona,
na ny hevitra ao amin’ny hendry,
na ny tenin’Andriamanitra, ao amin’ny mpaminany!
Andeha hasiantsika amin’ny vavantsika izy,
ary aza manongilan-tsofina amin’ny teniny isika.”

Atongilano amiko ny sofinao, ry Tompo,
ary henoy ny feon’ireo mandrafy ahy!
Dia ratsy va no havaly ny soa,
no dia mihady lavaka ho an’ny fanahiko izy ireo?
Tsarovy ny nitsanganako teo anatrehanao,
hiteny aminao mba ho azy ireo,
hampiala ny hatezeranao amin’izy ireo!

— Izany àry ny tenin’ny Tompo.

Salamo fandinihana

Salamo (Sal. 30, 5-6. 14. 15-16)

Vonjeo izahay, ry Tompo, noho ny hatsaram-ponao.

Tsoahy amin’ny harato nafenina aho,
fa Ianao no heriko!
Apetrako eo an-tananao ny aiko,
avoty aho, ry Tompo Andriamanitra.

Henoko ny vavan’ny maro,
ka horohoro hatraiza hatraiza!
Miara-mioko izy hahavoa,
mifofo hanala ny aiko.

Fa izaho, ry Tompo, mifefy aminao!
Hoy aho hoe: “Andriamanitro Ianao”,
eo an-tananao ny androko,
afaho amin’ny fahavalo sy mpanenjika aho!

Evanjely

Voninahitra sy dera anie ho anao, ry Kristy!

Ny Teninao, ry Tompo, dia fanahy sy fiainana; Ianao no manana ny teny mahavelona mandrakizay.

Voninahitra sy dera anie ho anao, ry Kristy!.

Evanjely Masina nosoratan’i Masindahy Matio (Mt. 20, 17-28)

Ary ireo hanameloka Azy ho faty.

Tamin’izany andro izany,
raha niakatra ho any Jerosalema i Jesoa,
dia nalainy mangingina ny mpianatra roa ambin’ny folo lahy
ka nilazany hoe:

“Indro miakatra ho any Jerosalema isika,
ary ny Zanak’Olona dia hatolotra amin’ny lohandohan’ny mpisorona
mbamin’ny mpanora-dalàna,
ary ireo hanameloka Azy ho faty,
ka hanolotra Azy amin’ny jentily mba hoesoiny sy hokapohiny
ary hofantsihana amin’ny Hazofijaliana;
fa hitsangana indray Izy amin’ny andro fahatelo.”

Ary tamin’izany nanatona Azy
ny renin’ny zanak’i Zebede mbamin’ny zanany lahy,
ka nitsaoka Azy ary nangataka zavatra taminy.
Ka hoy i Jesoa taminy:

“Inona no irìnao?”

Dia hoy izy:

“Aoka ireto zanako roa lahy ireto
mba hipetraka eo ankavananao ny anankiray
ary eo ankavianao ny anankiray,
ao amin’ny Fanjakanao.”

Dia hoy ny famalin’i Jesoa:

“Tsy fantatrareo izay angatahinareo.
Moa mahasotro izay kapoaka hosotroiko va ianareo?”

Hoy ireo taminy:

“Efanay ihany.”

Ary hoy Izy taminy:

“Raha ny amin’ny kapoakako, dia hosotroinareo tokoa;
fa raha ny amin’ny hipetraka eo ankavanako sy eo ankaviako kosa,
dia tsy Ahy ny hanome anareo izany,
fa homena izay nanamboaran’ny Raiko azy.”

Ary nony nandre izany izy folo lahy
dia tezitra tamin’izy mirahalahy.
Fa nasain’i Jesoa hanatona Azy izy ireo,
ka nilazany hoe:

“Fantatrareo fa ny mpanjakan’ny jentily mandidy azy mafy,
ary ny lehibeny mifehy azy fatratra.
Fa tsy mba ho tahaka izany aminareo;
fa izay te-ho lehibe aminareo kosa,
no aoka ho mpanompo anareo izy,
ary izay te-ho lohany aminareo,
no aoka ho mpanomponareo:
dia tahaka ny Zanak’Olona izany:
fa Izy tsy tonga mba hotompoina
fa mba hanompo ary hahafoy ny ainy
ho fanavotana ny maro.”

— Izany àry ny tenin’ny Tompo.

 

Sous-catégories

Vaovao

Arofanina

[Miara-dàlana] Alatsinainy 23 jona 2025

• Hankalaza ny faha-150 taona nanirahana ireo misionera voalohany ny fikambanan-dry Masera Filles de Marie Auxiliatrice... • Hotanterahana, any amin'ny Distrikan'i Mahitsy, ny 31 jolay hatramin'ny 3 aogositra 2025, ny JMJ an'ny Diosezin'Antananarivo... • Niantso ny mpino ny Papa Léon XIV, nandritra ny vavaka Angelus, mba hiombona amin'Andriamanitra amin'ny alalan'ny fizarana an-kafaliana lalandava ny fanomezan'ny fitiavana...

Tohiny...

Tsy misy afaka manavotra antsika afa-tsy Andriamanitra

I Jesoa Kristy, Ilay Zanak'Andriamanitra tonga olombelona, no fanantenana famindrampo sy fanavotana ho antsika olombelona.

Tohiny...

Zatti, rahalahinay

Ny horonan-tsary "Zatti, notre frère" (Argentina, 2020) dia manoritsoritra ireo vanim-potoana tena sarotra teo amin'ny fiainany. Tao Viedma no nitranga ny tantara tamin'ny taona 1941 : 60 taona i Zatti ary noterena handao ilay toeram-pitsaboana izay nikatrohany amam-polo taonany maro. Fitsapana mivaivay ho an'ny finoany sy ny herim-pony izany.

Tohiny...