Sabotsy 13 febroary 2021 — Herinandro fahadimy mandavantaona — Tsy ny mofo ihany no iveloman’ny olona, fa ny teny rehetra aloaky ny vavan’Andriamanitra — Evanjely Masina nosoratan'i Masindahy Marka 8, 1-10

Ry havana, tsy nanafina ny alahelony an’ireto vahoaka nanaraka Azy i Jesoa satria tsy nanan-kohanina izy ireo. Mangotika ny fon’i Jesoa rehefa tandindomin-doza ny aintsika. Andro maromaro izay no nahitantsika, nahenontsika Azy nanasitrana aretina maro satria aina no vonjena. Eto indray, telo andro tsy nihinan-kanina ka noana. Ny sakafo mantsy : aina. Azo ambara arak’izany fa na inona na inona mandrahona ny aintsika : tsy fandriam-pahalemana, kere, valan’aretina, hain-tany dia mangotika ny fon’Andriamanitra. Tsy Izy mihitsy no hanao be marenina amintsika manoloana izany.

Tsy hoe miandry ho toloram-potsiny anefa isika amin’izany na hifanilika sy hiala andraikitra ka hanao hoe : aiza no ahitana mofo hahavoky an’ireo aty an’efitra ? Asain’Andriamanitra hifanome tanana aloha isika samy isika, hanolotra ireo mofo fito. Mampahatsiahy antsika ny diakra fito lahy hizara ny mofo an’ireo mpitondratena. Tsy fotoanan’ny fitiavan-tena sy ny misalobon-komana intsony arak’izany izao andro diavintsika izao fa fotoanan’ny fifanomezan-tanana ary rehefa manao izay manandrify antsika isika dia Andriamanitra avy eo no misahana ny sisa.

Ry havana, atolory àry izay azonao hifampizarana : fotoana, hevitra, fanantenana, hafaliana, vola aman-karena sy ny maro hafa, fa izay manome sy mizarazara tokoa no mihary lovasoa izay tsy mety simba, hoy ny hirantsika.