10 marsa — I Masimbavy Anastasie dia mpitoka-monina mpanirery tao Egypte. Virjiny izy io, vehivavy tsara tarehy ary raha sendra tany an-dapan'ny Amperora Justinien izy ka nandray azy tao ny Amperora dia tsy niala teny amin'i Anastasie mihitsy ny masony ary naniry azy ho vadiny.
Lasa saro-piaro noho izany fihetsiky ny Amperora izany i Théodora vadiny. Mba hialan'i Anastasie amin'ity fihetsiky ny Amperora ity dia nanova fitafy izy, nanao fiakanjon-dehilahy ka lasa nanalavitra ny tanana sy nadeha nitoka-monina. Nandritra ny enin-taona izy dia niaina tao anatin'izany saron-tava izany tany Alexandrie. Tao aorian'izay dia tratran'ireo iraky ny Amperora Justinien indray izy. Nandositra anefa izy ka nandeha nitoka-monina nanirery tany amin'ny efitr'i Scété ary nitondra ny anarana hoe Anastasia l'Eunuque.
Nandritra ny 20 taona teo ho eo izy no niaina tao ary nodimandry ny taona 567. Tsy mba nilaza ny momba azy ny lehiben'ny trano fitokana-monina raha tsy efa 15 taona tao aorian'ny nahafatesany.
