Vakiteny voalohany
Bokin’i Amôsy Mpaminany Amôsy (Amôsy 3, 1-8 ; 4, 11-12)
Efa niteny ny Tompo ka iza no tsy haminany?
Ry zanak’i Israely,
henoy izao teny notononin’ny Tompo ny aminareo izao,
sy ny amin’ny fianakaviana rehetra nentiko niakatra avy any amin’ny tany Ejipta,
— dia ny teniny manao hoe:
Ianareo irery no fantatro tamin’ny firenena rehetra ambonin’ny tany;
ka izany no hamaizako anareo noho ny helokareo rehetra.
Miara-mandeha va ny olona roa, raha tsy efa nifanaiky izy?
Mierona any an’ala va ny liona, raha tsy efa nahazo remby?
Maneno any an-davany va ny feon’ny liona tanora, raha mbola tsy nahazo na inona na inona akory?
Latsaka eo amin’ny fandrika eo amin’ny tany va ny fody, raha tsy misy hanim-pandrika ho azy ao?
Moa miainga avy eo amin’ny tany va ny fandrika, raha tsy efa nahazo zavatra izy?
Trômpetra va no haneno ao an-tanàna, ka tsy hivadi-po ny vahoaka?
Misy loza tonga amin’ny tanàna va, raha tsy ny Tompo no nahatonga izany?
Fa tsy manao na inona na inona ny Tompo Andriamanitra,
raha tsy efa nanambara ny heviny miafina tamin’ny mpaminany, mpanompony.
Efa nierona ny liona, ka zovy no tsy hatahotra?
Efa niteny ny Tompo Andriamanitra, ka iza no tsy haminany?
Nahatonga fanakorokoroana ao anatinareo aho
toy ny nanakorokoroan’Andriamanitra an’i Sôdôma sy Gômôra,
ary ianareo izany, dia toy ny forohana voatsoaka tamin’ny hain-trano;
nefa tsy niverina tamiko ihany ianareo,
— teny marin’ny Tompo —
Ka noho izany, izao no hataoko aminao, ry Israely.
Koa rahefa izany no hataoko aminao,
dia miomàna amin’izany fihaonana amin’Andriamanitrao izany ianao, ry Israely.
— Izany àry ny tenin’ny Tompo.
Setriny
Salamo 5, 5-6. 7. 8
Tompo ô, tariho araka ny fahamarinanao aho.
Tsia, tsy mba Andriamanitra tia ratsy Ianao;
ny olon-dratsy tsy monina ao aminao;
ny adala tsy mijoro eo anoloan’ny masonao;
ny mpanao ratsy rehetra tsy tohanao.
Ny mpiteny lainga levoninao;
ny tia ra, ny mpamitaka, halan’ny Tompo!
Fa izaho, noho ny hatsaram-ponao lehibe,
dia hiditra ny Tranonao,
hiankohoka ao an-Tempolinao masina,
miaraka amin’ireo mpanoa Anao.
Evanjely
Aleloia. Aleloia.
Fanahy sy fiainana ny teninao, ry Tompo; Ianao no manana ny teny mahavelona mandrakizay.
Aleloia.
Evanjely Masina nosoratan’i Masindahy Matio (Mt. 8, 23-27)
Niarina Izy nandidy ny rivotra sy ny ranomasina, ka tonga tony dia tony ny andro.
Tamin’izany andro izany,
i Jesoa niondrana tamin’ny sambo kely ka narahin’ny mpianany.
Dia indro nisy tafio-drivotra mafy tamin’ny ranomasina,
ka efa safotry ny onjan-drano ny sambo kely, ary Izy anefa natory.
Dia nanatona Azy ny mpianany, ka namoha Azy nanao hoe:
“Tompoko, vonjeo izahay, fa maty.”
Ary hoy i Jesoa taminy:
“Nahoana no saro-tahotra ianareo, ry kely finoana?”
Dia niarina Izy, nandidy ny rivotra sy ny ranomasina,
ka tonga tony dia tony ny andro.
Ary gaga ny olona, ka nanao hoe:
“Iza io Lehilahy io no manaiky Azy ny rivotra sy ny ranomasina?”
— Izany àry ny tenin’ny Tompo.
