Vakiteny voalohany
Boky voalohan’ny Mpanjaka (1 Mpanj. 19, 19-21)
Nitsangana i Elisea, dia nandeha ary nanaraka an’i Elia.
Tamin’izany andro izany,
nony niala teo an-tendrombohitra i Elia dia nahita an’i Elisea, zanak’i Safàta niasa tany.
Omby efatra amby roapolo tsiroaroa no teo alohany,
ka teo amin’ny faharoa ambin’ny folo laharana izy.
Nanatona azy i Elia sady natsipiny taminy ny kapaotiny.
Nilaozan’i Elisea ny ombiny,
dia nihazakazaka nanaraka an’i Elia izy, nanao hoe:
“Aoka handeha hanoroka an’i dada sy i neny aho, dia hanaraka anao.”
Ary hoy i Elia taminy:
“Mandehana miverina, fa naninona anao moa aho?”
Dia niala teo aminy i Elisea,
ka nalainy ny omby roa mikambana sy novonoiny,
ary ny jiogan’ny omby no nandrahoany ny henany,
ary nomeny hohanin’ny olona izany,
ao niainga izy nanaraka an’i Elia sy nanompo azy.
— Izany àry ny tenin’ny Tompo.
Setriny
Salamo 15, 1-2a sy 5. 7-8. 9-10
Ianao, ry Tompo, no anjara lovako.
Andriamanitra Tompo ô, ambeno.
F’Ianao re no hany ifefeko,
Ianao re, ry Tompo, no lova,
hany zarako mandrakizay!
Ka isaorako Tompo Ianao.
Fa nanolotra saina, fanahy.
Sy nanoro ny foko hatrany.
Eo alohako foana ny Tompo;
tsy hiala ankavanako Izy.
Ka hisaorako mandrakizay.
Ts’omby tratra tokoa ny hafaliana,
’Zay mameno ny foko tontolo
sy manenika ’zato fanahy.
Ka ny nofoko mandry amin-toky;
fa tsy foinao ho levona ny aiko.
Ny olon-tianao tsy foinao ho faty.
Evanjely
Aleloia. Aleloia.
Araikao amin’ny fanambaranao ny foko, ry Tompo, ary ny lalànao no aoka hanenika ahy.
Aleloia.
Evanjely Masina nosoratan’i Masindahy Matio (Mt. 5, 33-37)
Izaho kosa milaza aminareo tsy hianiana akory.
Tamin’izany andro izany,
i Jesoa nilaza tamin’ny mpianany nanao hoe:
“Efa renareo koa fa voalaza tamin’ny Ntaolo hoe:
‘Aza mianiana tsy tò, fa efao amin’ny Tompo ny fianiananao.’
Fa Izaho kosa milaza aminareo tsy hianiana akory,
na amin’ny lanitra, fa seza fiandrianan’Andriamanitra izy;
na amin’ny tany, fa fandiavan’ny tongony izy;
na amin’i Jerosalema, fa tanànan’ny mpanjaka lehibe izy;
na amin’ny lohanao, fa tsy mahay mahafotsy na mahamainty na dia singam-bolo iray akory aza ianao.
Fa aoka ny teninareo ho eny, dia eny; tsia, dia tsia;
fa izay mihoatra noho izany dia avy amin’ilay Ratsy.”
— Izany àry ny tenin’ny Tompo.
