Sabotsy 6 novambra 2021 — Herinandro faha iraika amby telopolo mandavantaona — Ny teninao, ry Tompo, dia fanahy sy fiainana; Ianao no manana ny teny mahavelona mandrakizay — Evanjely Masina nosoratan'i Masindahy Lioka 16, 9-15

Mampandinika antsika eto i Jesoa Kristy hoe : " Iza no tompon’ny fiainantsika ; Andriamanitra sa ny vola aman-karena". Miankina amin’ny tsirairay sy ny zava-misy tokoa mantsy ny mahatsara na maharatsy ny vola aman-karena. Kristy eto dia nahita an’ireo farisianina sasany tamin’izany fa tena manao ny vola ho Andriamanitra mihitsy. Hany ka manadino mihitsy ny fanompoana an’Andriamanitra satria jamban’ny vola eo amin’ny fiainana. Mety aretina hahazo antsika koa izany ankehitriny : atao izay hitadiavam-bola betsaka mba hampitomboana ireo harena, hany ka tsy misy intsony ny fotoana ho an’ny fianakaviana sy ho an’Andriamanitra. Ala-olana matetika ny hoe : sarotra ny fiainana ka lany amin’ny fitadiavana ny harena ety an-tany ny fotoana. Ekena ary tsy azo lavina fa ilaina ny vola eo amin’ny fiainana fa tsy tokony ho entina kosa anefa hanadinoana an’Izy Andriamanitra izay nanome antsika ny fiainana.

I Jesoa Kristy, Zanak’Andriamanitra dia tsy mba nanana na inona na inona teto amin’ity fiainana ity, ary na dia Tompo aza izy dia nanetri-tena ho mpanompo. Nisafidy ny ho mahantra Izy mba hampianatra antsika toy izany eo am-panompoana an’Andriamanitra. Hoy i Masindahy Paoly izay mantsy hoe : "satria fantatrareo ihany ny fahasoavan’i Jesoa Kristy tompontsika ; fa na dia mpanankarena aza Izy dia tonga nahantra noho ny aminareo mba hampanankarena anareo amin’ny fahantrany" 2 Kor 8, 9.

Angataho mandrakariva àry Izy Andriamanitra mba hanome antsika fahatokisana eo am-panompoana Azy amin’ireo zava-tsoa izay omeny antsika isan’andro.