Alatsinainy 1 novambra 2021 — Fetin'ny Olomasina rehetra — Mankanesa aty amiko ianareo rehetra izay mitondra fahoriana sy vesaram-pijaliana, fa hanamaivana Anareo Aho, hoy ny Tompo — Evanjely Masina nosoratan'i Masindahy Matio 5, 1-12a
Amin’izao alatsinainy 1 novambra izao dia mankalaza ny fetin’ireo Olomasina rehetra ny Eglizy ary voarakitra mazava tsara ao anatin’ny fiekem-pinoana izany : "Izaho mino ny fiombonan’ny olomasina".
Ny Evanjely mahakasika ny fahasambarana valo no omen’ny Eglizy ho antsika amin’izao fetin’ireo olomasina izao. Ny teny hoe "sambatra" mantsy dia mitovy hevitra amin’ny atao hoe "masina" araka ny voalazan’ny Papa Fransoa. Nahatsiaro tena ho sambatra tokoa izy ireo teo am-panompoana an’Andriamanitra sy ny fiainana ny Teniny ary ny fanoloran-tena izay nataony. Amin’izao fotoana izao, dia inoantsika fa tsy mitsahatra ny mivavaka ho antsika izy ireo mba hiombona miaraka amin’izy ireo rahatrizay. Fa isika kosa dia miezaka maka tahaka azy ireo amin’ireo hatsaram-panahy izay niainany. Tsy tokony hadinointsika anefa fa ny modely amin’ny fahamasinana dia i Jesoa Kristy fa ireo olomasina kosa dia manampy antsika mba hiaina izany toy ny nataony.
Anisan’ny hanenjehana sy haneson’ny finoana hafa antsika katolika ny mahakasika an’ireo olomasina ireo. Aoka àry ho tsapantsika fa anisan’ny fahasambarana izany ary efa nolazain’i Jesoa fa "Sambatra ny miaritra ny fanenjehana noho ny rariny fa azy ireo ny fanjakan’ny lanitra". Afaka miaina ireo hasambarana valo voalazan’i Kristy ireo ihany koa isika. Fahasambarana izay manafaka antsika amin’ny fitiavan-tena sy ny avonavona.
Efa tany am-piadohana àry no tian’Andriamanitra ho sambatra isika olombelona ary izany no mbola nampahafantarany an’ireto lalam-pahasambarana ireto ho antsika mba "ho masina sy tsy hanan-tsiny eo imasony isika" araka ny voalazan’i Masindahy Paoly ho an’ireo kristianina tany Efezy.
Ny fahotana àry araka izany no tsy maintsy hiadivana mandrakariva raha te ho sambatra tahaka ireo olomasina ireo isika. Izy ireo dia nanota toa antsika ihany fa mpanota vonona miarina mandrakariva amin’ny fahotana. Amen.
