Alakamisy 28 oktobra 2021 — Masindahy Simona sy Joda, Apôstôly — Midera Anao izahay, Ry Andriamanitra ary manaiky fa Ianao no Tompo; ny antokon’ny Apôstôly be voninahitra dia midera Anao, Ry Tompo — Evanjely Masina nosoratan'i Masindahy Lioka 6, 12-19

Antso miantefa amin’olombelona ny famonjena, antso mifototra indrindra amin’i Kristy mba hinoana Azy sy hanarahana dia Azy ary hijoroana ho vavolombelony. Tao anatin’ireo namaly ny antson’i Kristy ireto nofidiny manokana ka nomeny anarana hoe Apôstôly, anisan’izy ireo i Simôna sy i Joda, ankalazaina fety anio, manome ohatra antsika amin’ny fiainana ny antson’Andriamanitra sy ny iraka nisafidianana antsika ao amin’ny Fiangonana.

Ireo Apôstôly roa ireo no mampianatra antsika fa tsy teny tononina fotsiny ny finoana fa fiainana anaty hamarinin’ny toe-piainana sy ny fomba amam-panao mifanaraka amin’izay sitrak’Andriamanitra. Maro isika no milaza fa mino, betsaka no milaza fa mpivavaka, fa inona kosa no vokatr’izany ? Inona no fiantraikan’izany ? Ary fomba ahoana no nentinao naneho izany ? Moa sahy hanao ny toy ny nataon’ireto Apôstôly ireto ve ? Maty martiry noho ny fitoriana ny Evanjely.

Mila Apôstôly marina, hiaina, hampita ary haharitra tsy hivadika amin’ny finoana izao andro diavintsika izao mba haneho eo anivon’izao tontolo izao ny fisian’Andriamanitra.