Talata 27 jolay 2021 — Herinandro fahafito ambin'ny folo mandavantaona — Niteraka antsika an-tsitra-po tamin’ny fahamarinana ny Ray; mba ho santatry ny zava-boaariny isika — Evanjely Masina nosoratan'i Masindahy Matio 13, 36-43
Manazava amin’ireo mpianany ny hevitra fonosin’ilay fanoharana mahakasika ilay ahi-dratsy i Jesoa Kristy eto. Hazavaina amin’izy ireo fa toerana iadian’ny zanaky ny Fanjakan’Andriamanitra sy ny zanak’ilay ratsy ity tany onenantsika ity, koa mila miady amin’ilay ratsy isika mba ho afaka hiatrika ilay fitsarana farany. Tsara homarihina fa hisy fijinjana sy fanavahana io fitsarana farany lazaina eto io.
Mila mandray anjara amin’izany ady izany isika izao, satria miankina amin’io ady ataontsika ankehitriny io no ho anjara tandrify homen’Andriamanitra antsika amin’ny fitsarana farany. Sanatria tsy hampatahotra antsika akory no antony nilazan’i Jesoa an’izany, fa fampirisihana antsika ho masina tahaka an’Andriamanitra nahary antsika, izany hoe, manasa antsika i Jesoa mba hiha-zanaky ny fanjakan’Andriamanitra hatrany hatrany isika.
