Alatsinainy 26 avrily 2021 — Herinandro fahefatra fankalazana ny Paka — Raha niara-nitsangana tamin’i Kristy ianareo, dia ny zavatra any ambony amin’izay itoeran’i Kristy eo ankavanan’Andriamanitra no katsaho — Evanjely Masina nosoratan'i Masindahy Joany 10, 1-10

Nohenointsika teo fa tsy mitsahatra mampianatra ny mpianany amin’ny alalan’ny fanoharana i Jesoa. Isika vahoakan’Andrimananitra no ondry andrasana, ary ny valan’ondry dia tsy inona akory fa ny fanjakan’Andriamanitra, ary izy tenany no mpiandry ondry tsara, izy no vavahady idiran’ny ondry. Koa nambarany mazava fa mpangalatra sy jiolahy izay tsy mandalo eo amin’ny vavahadin’ny ondry.

Inona ary no tian’i Jesoa hangatahana amintsika ? Ny tiany hangatahana amintsika dia ny hoe izy no lalana hahafahantsika miditra amin’ny fanjakan’ny Rainy. Izy no mpiandry ondry tsara, ary ny faniriany dia ny olona rehetra no hisitraka ny fanjakan’ny lanitra. Ka noho izany efa nomentsika ny teniny entintsika miaina sy miomana amin’izany, efa natorony sy nampahafantarany antsika ny lalana miditra any amin’ny fiainana mandrakizay. Ary efa nahafoy ny ainy mihitsy àry izy, hamonjena ny olombelona, nijaly sy maty ary nitsangan-ko velona. Fara fitiavana ny olombelona izany ary porofom-pitiavana lalina, izay nasehon’Andriamanitra antsika miharihary. Koa sahia àry isika mandalo sy manatona eo aminy fa izay manatona azy no manana ny hafenoana. Satria i Jesoa ihany no nanambara ny tenany, fa izy no vavahady hidirana amin’ny fiainana tena izy. Ao aminy no tena ahitana hasambarana, hafaliana, fahafahana ary famindram-po amim-pamelan-keloka.

Koa manasa antsika rehetra tsy an-kanavaka àry i Jesoa, mba hanatona Azy ka hiaina ny fiainana lavorary miaraka aminy. Satria hoy izy hoe : "Izaho no avy dia mba hananan’ny ondry fiainana, sady hanany azy be dia be."