Alatsinainy 19 avrily 2021 — Herinandro fahatelo fankalazana ny Paka — Nahita Ahy ianao ka mino, fa sambatra izay tsy nahita ka mino — Evanjely Masina nosoratan'i Masindahy Joany 6, 22-29
Mazàna no alaim-panahy isika hitady tany malemy hanorenam-pangady eo am-panarahan-dia an’i Jesoa Kristy : izany hoe, noho ny ny fahitantsika ny fahagagana nataony teo amin’ny fiainantsika no anarahantsika dia Azy. Izany tokoa mantsy no fakam-panahy nahazo ireo vahoaka jody tamin’androny. Nitady azy hatraiza hatraiza izy ireo, noho ny fahagagana fampitomboana ny mofo nataony teo aloha, araka ny ambaran’ny Evanjely anio. Tsy fantatr’izy ireo akory fa tsy haharitra velively izany mofo nampitomboina izany.
Tian’i Jesoa Kristy, raha mikatsaka ny sakafo maharitra sy manan-danja ireo izay hanara-dia Azy ; raha ny tena marimarina kokoa, tiany hitady Azy fa Izy no ilay mofon’ny fiainana mandrakizay. Mila ny finoana anefa izany fikatsahana Azy, ilay Mofon’ny fiainantsika izany. Ko angataho amin’Izy Ray mba hananana mandrakariva.
