Alarobia 10 marsa 2021 — Herinandro fahatelo amin'ny Karemy — Sambatra izay mitandrina ny tenin’Andriamanitra, amin’ny fo marina sy tsara, sy mamoa amin’ny faharetana — Evanjely Masina nosoratan'i Masindahy Matio 5, 17-19

"Aza ataonareo fa tonga aho handrava ny lalàna na ny Mpaminany, tsy tonga handrava aho fa hanantanteraka aiza". Mazava amintsika tsara ny tenin’i Jesoa, fa tonga izy hanatanteraka ny Lalàna, tonga haneho amintsika ny tena heviny marina. Nambarany fa ny lalàn’ny fitiavana no mamintina ny lalàna rehetra ka ahafahana miditra amin’ny fahasambarana sy mitahiry azy. Tsy didy natao hangejana ny Didin’Andriamanitra fa didy natao hanafaka, hamelona sy hitahirizana ny fahasambarana vokatr’izany fahafahana izany. Mampianatra antsika i Jesoa fa ny lalàna dia natao hamelona ny olona, natao hikatsahana ny soa ho an’ny olona, fa tsy natao hanamelohana, na hamandrihana ny olona. Ny tena hevitry ny lalàna marina dia azo fitinina hoe ny fitiavana.

Koa ny lalàna nomen’Andriamanitra ho antsika dia lalàn’ny fitiavana. Izany no nahatonga an’i Jesoa niteny hoe tsy ampy fotsiny ny tsy mamono olona fa tsy tokony hitezitra azy akory, tsy ampy fotsiny ny hoe aza mijangajanga, fa tsy tokony hitsiriritra akory. Ka izay te ho mpianany dia tokony hiaina ny didim-pitiavana, sy hampianatra azy amin’ny hafa. Satria ny fiainana sy fampianarana ny hafa izany didy lehibe izany no hahatonga antsika ho lehibe koa ao aminy fanjakan’ny lanitra, no hananantsika anjara ihany koa any amin’ny fanjak’Andriamanitra.