Alakamisy 09 janoary 2020 — Herinandro manaraka ny Epifania — Evanjely Masina nosoratan'i Masindahy Lioka 4, 14-22 — Mpaminany lehibe no efa niseho eto amintsika, ary Andriamanitra efa namangy ny olony.
Tsy kisendrasendra ny Tenin'Andriamanitra izay nambaran'i Kristy eto, fa efa fandaharana avy amin'Andriamanitra Ray sy Izy Kristy Zanaka, ary indrindra noho ny herin'ny Fanahy Masina. Miseho ampahibemaso eo amin'ny tany nahabe azy i Kristy, izay tsy nampoizin'ny mpiara-monina aminy. Nanana ny lazany sahady Izy eo am-panombohana ny asa nanirahan'Andriamanitra Ray azy. Ambaran'i Kristy ankarihary àry fa Izy tokoa no Ilay nohosoran'ny Ray hankahery ny torotoro fo, hitondra fahafahana ho an'izay voafatotra, indrindra fahiratana ho an'ny jamba.
Tsy mijanona ho soratra fotsiny intsony arak'i Izaia mpaminany izay voalaza izay, fa tena fisehoan'ny Kristy ampahibemaso mihitsy. Tsy hoe faminaniana intsony, fa tena asa mivaingana azo tsapain-tànana amin'ny fotoana ankehitriny. Toy ny volamena latsaka am-bovoka tokoa i Kristy ka tsy avelan'ny maha-izy azy tsy hamiratra. Tsy avelan'ny maha-Andriamanitra azy tsy hitory ny Vaovao Mahafaly. Tsy avelan'ny fahefany sy ny fahaizany tsy hamonjy ny olona. Tsy mety aminy izany hoe miandry fotoana na midonana-poana, fa vao mainka Izy miatrika ny asam-pamonjena.
Manome ohatra ho antsika i Kristy eto, tsy hisatry fanahy tokoa isika, indrindra indrindra ho mamay fo amin'ny fitoriana ny Vaovao Mahafaly eny anivon'ny fiarah-monina eny.
