Alarobia 08 janoary 2020 — Herinandro manaraka ny Epifania — Evanjely Masina nosoratan'i Masindahy Marka 6, 45-52 — Hitory teny soa mahafaly amin'ny malahelo no nanirahan'Andriamanitra Ahy, sy hankahery ny torotoro fo.
Misy trangam-piainana vaovao asehon'i Masindahy Marka eto, mba hanambarana ny fisehoan'i Kristy indrindra ny maha-izy azy. Efa fiainan'i Kristy ny manokana fotoana any an-tendrombohitra mba hivavahana, indrindra raha misy asa hataony na rehefa nahavita asa Izy. Izany dia isaorany an'Andriamanitra Ray amin'ny maha-Zanaka azy. Zava-dehibe amin'ny fiainan'i Kristy tokoa ny vavaka, manome ohatra ho antsika izy eto.
Ny fandehanany eny ambony ranomasina indray dia hisehoan'ny maha-Andriamanitra azy, tompon'ny hery, tompon'ny fahefana, afa-mandidy ny zava-boaary rehetra. Tsy hoe matotoa araka ny fiheveran'ny mpianany azy Izy, fa Andriamanitra miseho amin'ny toerana rehetra, miseho amin'ny heriny manontolo: "Matokia, fa Izaho ihany ka aza matahotra". Tsy voafetran'ny fotoana sy ny toerana ny fisehoan'i Kristy sy ny fisiany ary tsy voazakan'izay rivo-mahery ny fahefany.
Tsy takatry ny saintsika olombelona raha ny misterin'Andriamanitra, indrindra moa fa izany fahefana sy hery izany. Donto tokoa raha isika, kanefa ny finoana, izay herim-panahy avy amin'Andriamanitra omeny antsika, no fanalahidin'izany tsy fahatakarantsika ny misteriny izany. Koa raiso ary halalino io herim-panahy omen'Andriamanitra io mba halalantsika azy, hatakarantsika ireny karazam-pamantarana hanehoan'i Kristy ny maha-izy azy ireny eo amin'ny fiainantsika.
