Alatsinainy 14 septambra 2020 — Ny nanandratana ny Hazofijaliana — Evanjely Masina nosoratan'i Masindahy Joany 3, 13-17 — Mitsaoka Anao sy misaotra Anao izahay, ry Kristy, satria tamin’ny Hazofijaliana no nanavotanao izao tontolo izao.
Araka izay Vaovao Mahafaly nosoratan'i Masindahy Joany nohenointsika teo izay àry, dia mankalaza ny nanandratana ny Hazofijaliana Masina ny Fiangonana anio, izay hazo nitondra ny famonjena ny besinimaro noho i Kristy nanaiky nofantsihana teo aminy. Fanehoana ny fara-fitiavan'Andriamanitra an'izao tontolo izao ny namoizan'i Kristy ny ainy teo amin'ny Hazofijaliana : "Fa toy izao no nitiavan'Andriamanitra izao tontolo izao, nomeny ny Zanany tokana mba tsy ho very izay rehetra mino Azy". Avy amin'ny sitrapon'Andriamanitra ny zavatra rehetra, izany no manaporofo fa Fitiavana Andriamanitra, ary ny Hazofijalain'i Kristy no manamarika izany. Ny faniriana tokan'Andriamanitra, ny tarigetram-piainany manokana dia ny hamonjena izao tontolo izao. Ny nanandratana an'i Kristy teo amin'ny Hazofijaliana no fahatanterahan'ny asam-pamonjena, fibaribarian'ny Fitiavany teo imason'izao tontolo izao. Raha heverina amin'ny maha Mpanjaka an'i Kristy dia ny Hazofijaliana ny Azy no seza fiandrianany : Fiandrianam-pitiavana, Fiandrianam-pamonjena, Fiandrianam-panompoana, Fiandrianam-panetren-tena.
Isan'andro isika dia manao ny famantarana ny Hazofijaliana, tsy fombafomba fotsiny ireny na ataotao foana fa misy dikany tokoa, koa ataovy amim-panajana sy amim-pitiavana ary amim-po manenina àry izy iny mba hanomezana voninahitra an'i Kristy, Ilay nasandratra mba hananantsika ny famonjena sy ny fitsanganan-ko velona.
