Alarobia 22 aprily 2020 — Herinandro faharoa amin'ny Paka — Evanjely Masina nosoratan'i Masindahy Joany 3, 16-21 — Ry Jesoa Kristy, vavolombelona mahatoky, Lahimatoa amin'ny maty, tia anay Ianao sy nanasa ny helokay tamin'ny Ranao.
Tamin’ny alalan’ny Zanany maty teo ambony Hazofijaliana no nanehoan’Andriamanitra ny fitiavana antsika olombelona sy nanolorany antsika ny Famonjena dia ny hahazoan’izao tontolo izao ny famelana. Io Zanany io mantsy no fanomezan’Andriamanitra ho antsika olombelona ka ny fahatongavany ho nofo sy ny fiainany teto an-tany ary ny iraka nataony dia fanehoan’Andriamanitra izany fitiavany izany.
Tian’Andriamanitra ho voavonjy isika olombelona, hanana ilay fiainana ao Aminy ka nomeny ny Zanany, hizara amintsika io fiainana ao amin’Andriamanitra io. Ary ny hafantarana fa miaina izany isika dia raha miombona Aminy amin’ny fotoana rehetra, raha manao ny sitrapony fa indrindra raha mijoro ho fahazavana eo anivon’ireo manodidina antsika.
Meteza hiara-mandresy amin’i Kristy ka hanorina fiainam-baovao miaraka Aminy. Mba ho Paka lalandava no iainatsika amin’izao andro diavintsika izao.
