3 septambra 2024 — Talata, Herinandro Tsotra faharoa amby roapolo Mandavantaona — Raha misy tia Ahy, dia hitandrina ny teniko izy; ka ho tian’ny Raiko ary hankao aminy izahay ka honina ao aminy — Evanjely Masina nosoratan’i Masindahy Lioka (Lk. 4, 31-37)

Ry havana; ao amin’ny sinagoga andro sabata i Jesoa mitory teny sy mampianatra. Fianarana ho antsika momba ny fankamasinana ny andro alahady any am-piangonana. Tsy azo atao ny manamarin-tena amin’ny zavatra diso hoe tsy anya m-piangonana ihany no mivavaka. Any am-piangonana rehefa alahady satria i Jesoa mihitsy io no modely ary sitrak’Andriamanitra kokoa ny Eglizy miara-mivavaka.

Manaraka izany, mandroaka demony maloto i Jesoa. Entina ilazana fa ratsy indrindra ilay teny hoe demony maloto. Manarakaraka ny toriteny nisantaran’i Jesoa ny asany dia ny fandroahana demony no ataony: mandresy ny hery rehetra i Jesoa, resy ny fahavalo sy mpanohitra ny famonjena, rava ny fanjakan’i satana fa mijoro manomboka eo kosa ny Fanjakan’Andriamanitra. Izany hevitry ny fandroahana demony ataon’i Jesoa. Ho an’ny Eglizy ankehitriny dia ny Eveka sy izay Pretra omeny fahefana manokana no mandroaka demony. Ministera manokana tsy azo sandohana io ary saro-pady ka mila fahamalinana. Ny sakramenta konfesy matetika no fandroahana demony tsy maintsy ataontsika satria mitohy ny ady atao amin’ny demony sy ny fakam-panahy.

Notanisain’ny demony ny anarana sy toetran’i Jesoa, toy ny hoe Jesoa avy any Nazareta, Ilay Masin’Andriamanitra. Fiheveran-tena ho amboniny ny fanononana olona amin’ny anarany; ary izany no ataon’ny demony eto… Fa ho antsika kosa Jesoa Kristy dia anaram-pamonjena, anarana ambonin’ny anarana rehetra, anarana akan’izany mino rehetra anarana, ary anarana hiankohofan’ny lohalika rehetra indray andro any. Misy ilay vavaka Litanian’ny Anarana masin’i Jesoa iny azo atao tsara fa sady fandalinam-pinoana no vavaka maharesy fahotana; dia ho tonga anie ny Fanjakan’Andriamanitra. Amen.