22 jona 2024 — Sabotsy, Herinandro Tsotra faharaika ambin'ny folo Mandavantaona — Tsy ny mofo ihany no iveloman’ny olona, fa ny teny rehetra aloaky ny vavan’Andriamanitra — Evanjely Masina nosoratan’i Masindahy Matio (Mt. 6, 24-34)

Ry havana; safidy fototra no ataon’i Jesoa ka na ny harena na Andriamanitra. Toe-javatra tamin’izany andro izany nakana ity fanoharana ity dia misy ireo andevo manompo olona roa samy sarotiny: tsy hitany izay asiany ny tenany satria samy mandrirotra azy ireto tompony. Saro-piaro amintsika Andriamanitra. Tiany ho azy irery manontolo isika. Safidiontsika Andriamanitra.

Aza manahy izay hohanina sy hotafiana, hoy i Jesoa. Tsy misy miteny mihitsy hoe andao tsy hiasa fa hivavaka fotsiny, andao hijanona handohalika eo anatrehan’ny Tabernakla dia aleo Andriamanitra no hiantoka izay hivelomana. Tsy maintsy miasa, tsy maintsy miatrika ny fiainana. Fa angatahana mba ho feno fitokisana an’Andriamanitra. Ny tsy mety sy ny mampalahelo dia ny miala tsiny fa sahirana dia tsy mivavaka, na koa sahirana amin’ny harem-be dia tsy misy toerana ho an’Andriamanitra intsony. Aoka ho tena zanaka matoky Ray mitsimbina; aoka ho zanaka matoky Zoky miahy. Omena ny toerana voalohany Andriamanitra. Araka ny fampianaran’i Masindahy Vincent de Paul: “ataovy ny asan’Andriamanitra dia hataon’Andriamanitra ny asanao”. Ny zava-boary hafa aza ahiany fatratra, mainka fa ny zanany tiany.

Sady modelim-bavaka no modelim-piainana ny vavaka nampianarin’ny Tompo: Andriamanitra no voalohany sy lehibe dia manaraka ho azy ny antsika olombelona. Hoy i Masimbavy Terezy avy Avila: “aza mitebiteby, aza matahotra; mahareta, izay manana an’Andriamanitra, manana ny zavatra rehetra”. Amen.