16 jona 2024 — Alahady Tsotra faharaika ambin'ny folo Mandavantaona — Sokafy, ry Tompo, ny fonay mba hitandrina izay nolazain’ny Zanakao — Evanjely Masina nosoratan’i Masindahy Marka (Mk. 4, 26-34)

Ry kristianina havana; fanoharana momba ny Fanjakan’Andriamanitra ny Evanjely anio. Fanoharana moa no entin’i Jesoa mampita lesona satria izay no takatry ny olona, izay no ahafahan’ny olona misafidy hanokatra ny fony handray ny fampianarana na tsia. Manan-tsafidy manko isika na hino na sanatria handà; tsy azo atao amboletra na an-tery ny finoana fa misy safidin’olombelona koa.

Asan’Andriamanitra manontolo ny fahatongavan’ny Fanjakany: efa napetrak’Andriamanitra ao izay rehetra hilaina hampitsimoka sy hampitombo io fanjakany io ary tsy misy mahasakana izany. Tahaka ny voa afafy mihitsy tokoa: tsy ampiana zavatra hafa akory ao anatin’ilay voa afafy fa efa ao aminy izay rehetra ilainy. Misy asan’olombelona koa anefa ao dia ny mikarakara ny tany, ny manisy zezika sy ny manondraka. Efa ataon’Andriamanitra izay rehetra ilaina fa anjarantsika sisa. Raha adika amin’ny fiainantsika dia izao: ny voa afafy dia ny Tenin’Andriamanitra sy ireo fahasoavana sesehena omeny antsika; ny tany amafazana dia ny fontsika; ny fitiavam-bavaka sy ny fitiava-namana no toy ny rano anondrahana azy.

Ny fitokisana an’Andriamanitra no tena tiana holazaina koa. Afafy ny voa, dia miandry am-pitokisana. Tsy araka ny lojikan’olombelona manko ny fizotry ny fahavokarana fa araka ny fomban’Andriamanitra: kely eo am-panombohana fa lehibe rehefa mitombo; marefo eo am-pamafazana fa matanjaka sy mahefa be rehefa mamokatra. Dia toy izany ny Eglizy: i Jesoa sy ny mpianany irery no nanomboka, fa mahenika izao tontolo izao ankehitriny. Aoka ary hatoky an’Andriamanitra isika: miasa am-pitoniana sy am-pinoana dia miandry amim-paharetana sy am-pitokisana. Amen.