Zoma 20 marsa 2020 — Herinandro fahatelo amin'ny Karemy — Evanjely Masina nosoratan'i Masindahy Marka 12, 28-34 — Tsy ny mofo ihany no iveloman'ny olona, fa ny teny rehetra aloaky ny vavan'Andriamanitra.

Ny lalana dia natao hampirindra ny fiaraha-monina ary aro fanina. Maro ireo lalana natao hotandreman'ny vahoaka Jody, hiainany isan'andro. Eto kosa, nofintinin'i Jeso amin'ny lafiny roa ihany izany, dia ny fitiavana an'Andriamanitra amin'ny fo, ny saina, ny fanahy manontolo ; ary ny fitiavana ny namana tahaka ny itiavana ny tena. Koa io fitiavana io no hitsarana antsika amin'ny andro farany. Io fitiavana io no mandavorary ny fiainantsika ka mahatonga antsika hanahaka Ilay Andriamanitra Fitiavana.

Na ity Mpanora-dalana nanontany an'i Jesoa ity aza dia niaiky fa ny fitiavana an'Andriamanitra sy ny fitiavana ny namana no fototry ny lalana rehetra. Nolaizain'i Jesoa fa tsy lavitra ny fanjakan'Andriamanitra izy noho izany fanambarany izany. Tsy hoe efa ao anatin'ny fanjakan'Andriamanitra izy fa efa akaiky, efa mahafantatra ny tokony atao mba hidirana ao anatiny ; satria koa tsy ny fahaizana tsianjery ny lalana no hahatafidirana amin'ny fanjakan'ny Lanitra fa ny fiainana azy mivaingana sy azo tsapain-tanana.

Takiana amintsika amin'izao vanim-potoanan'ny Karemy izao, ankoatra ny fitiavam-bavaka sy ny famolahan-tena, ny fanaovana asa fitiava-namana. Maro ireo olona manodidina antsika no mijaly, tsy ampy sakafo, lazoin'ny aretina. Mila ny fanampiantsika sy ny fitiavantsika izy ireny amin'ny alalan'ny fanampiantsika, ny fahafoizantsika, ny vavaka ataontsika ho azy ireny. Tenin'i Jesoa ny hoe : "Izay rehetra ataonareo amin"ireny madinika ireny dia Izaho no anaovanareo azy". Raha manao soa amin'ny namantsika isika dia i Jesoa no anaovantsika izany. Amen.