Sabotsy 14 marsa 2020 — Herinandro faharoa amin'ny Karemy — Evanjely Masina nosoratan'i Masindahy Lioka 15, 1-3. 11-32 — Hitsangana aho ho any amin'ny raiko, ka hanao aminy hoe : Dada ô, nanota tamin'ny lanitra sy teo anatrehanao aho.
Antsointsika amin'ny fiteny mahazatra hoe "Ilay zaza mpandany" ity fanoharana mifono fampianarana ataon'i Kristy ity. Mampiseho ny toetran'Andriamanitra Ray manoloana ny fahalementsika olombelona. Noho ny fanakianana ataon'ny Farisianina sy ny Mpanora-dalana no hanomezan'i Kristy hafatra fa Izy Andriamanitra Ray dia manaja hatrany ny fahafahana sy izay heverintsika ho fahaleovantenantsika olombelona zanany, eny fa na dia tsinjony izao aza fa hahavoa antsika ny vokany. Avelany handeha ilay zandriny eto mba ho faty ao anatin'ny filibana. Nefa ao anatin'ny fanantenana mandrakariva izy fa indray andro any io mbola hahatsiaro tena ka hahatsapa ny fitiavan'ny rainy azy.
Izany ny fiainantsika olombelona manoloana ny fahatsoran'Andriamanitra. Mitsako tsy laitra koa kenda vao dony aho Ranaotra. Ny heloka hibabohana tokoa, mody rariny, fa ny rariny itompoana, zary heloka. Fahendren-drazana tarafina amin'ity fanoharana nentin'i Kristy ity izany, ary mbola tsy lefy laza fa azo ampiharina amin'ny fiainana andavan'andro eny. Koa mahaiza àry mamindra sao fatra-pifidy ny manganana, tahaka ity zandriny ity, ka ho sendra ny mangidy tsy telina. Tsarovy anefa fa ny famindram-pon'Andriamanitra sy ny fitiavany dia miandry ny mpanota mandrakariva.
