7 septambra 2023 — Alakamisy, Herinandro Tsotra faharoa amby roapolo Mandavantaona — Efa nataoko hoe sakaiza ianareo, hoy ny Tompo; satria efa nambarako taminareo avokoa izay rehetra reko tamin’ny Ray — Evanjely Masina nosoratan’i Masindahy Lioka (Lk. 5, 1-11)
Mampahatsiahy ny fiainana tokony hananantsika sy ny fanatanterahana ireo adidy ankinin’Andriamanitra antsika kristianina ny Evanjely anio. Natao ho mpitondra ny hafatr’i Kristy isika, izany hoe nantsoiny ho iraka eo amin’ny toerana misy antsika. Noho izany, tsy anarana entina fotsiny akory ny maha kristianina fa fiainana, ary misy adidy mila tanterahina, adidy avy amin’i Kristy mihitsy. Natao hampita ny hafatr’i Kristy isika. Hafatra miompana amin’ny fandresena ny herin’ny Ratsy sy ny firotsahana amin’ny fanampiana ireo sahirana sy tsy misy mpiahy. Fa miankina indrindra amin’ny fihainoana sy ny fanarahana izay Lazainy ary ny fahatsapana fa miaraka amintsika ny Fanahy Masina anefa, no antoka hampahomby an’izany iraka ampanaovin’i Jesoa Kristy antsika izany.
