11 jolay 2023 — Talata, Herinandro Tsotra fahefatra ambin'ny folo Mandavantaona — Taona tsy ankasa — Velomy araka ny hatsaram-ponao aho; mba hitandremako ny fanambarana avy amin’ny vavanao — Evanjely Masina nosoratan’i Masindahy Matio (Mt. 9, 32-38)

I Jesoa no Tompon’ny fiainana, tonga teto amin’izao tontolo izao mba hanasitrana sy hanafaka ary hanavotra ny fanahin’ny olona. Tsy manan kery Aminy mihitsy ny herin’ny ratsy. Amin’izany no anehoany ny heriny sy ny maha Mesia Azy na dia tsy mety manaiky izany aza ireo Farisianina izay mandà Azy tanteraka. Na eo aza izany dia tohiziny foana ny asam-pamonjena izay efa natombony satria tsy tiany mantsy ny olona ho voagezan’ny ratsy. Tsy misy tsy hain’Andriamanitra atao tokoa eo amin’ny fiainantsika olombelona indrindra rehefa mino sy matoky isika. Izy irery ihany no Mpamonjy.

Ankehitriny dia betsaka tokoa ny olona mitady ny fiadanana anaty sy ny famonjena avy amin'i Kristy nefa tsy ampy ny olona hanampy Azy sy hiara-miasa Aminy. Mila olona vonona hitory sy hanohy ny asam-pamonjena nataony ho an’ny olombelona rehetra mantsy Izy mba hinoan’izao tontolo izao fa Izy no Mpanafaka sy Mpamonjy. Isika kristianina rehetra mihitsy no iangaviany amin’izany iraka izany ka tokony mba hiezaka haneho oha-piainana mifanaraka an’izany.

Mankalaza an'i Masindahy Benoît ny Eglizy anio, ilay Rain’ireo relijiozy mpitoka- monina izay mitady an’Andriamanitra ao anatin’ny fanginana sy miala ao anatin’izao tontolo izao. Izy ihany koa ilay mpiaro sy miady amin’ny herin’ny ratsy.

Tompo ô, aniraho mpijinja ny sahanao mba hamonjy sy hanafaka ny olonao.