Alatsinainy 24 febroary 2020 — Herinandro fahafito mandavantaona — Evanjely Masina nosoratan'i Masindahy Marka 9, 13-28 — I Jesoa Kristy Mpamonjy antsika no nanafoana ny fahafatesana sy nanambara ny fiainana amin'ny Evanjely.

Mampiseho ny fandresen’i  Jesoa ny ratsy eto ny Evanjely hitantsika fa nanafaka ny olona  Izy izay ao anatin’ny fangejan’ny ratsy.

Eto dia raim-pianakaviana iray nitondra ny zanany izay azon’ny fanahy ratsy tamin’i Jesoa mba hositraniny. Marihina fa efa nentin’ity raim-pianakaviana tamin’ny mpiantr’i Jesoa ity zanany lahy nefa dia tsy naharoaka ny fanahy maloto tao aminy. Eto dia azo lazaina fa tojo tsy fahombiazana ireo mpianatra. Tsy fahombiazana izay mety hahazo antsika Kristianina ihany koa eo amin’ny fitoriana ny evajely sy ny fikatsahana vokatra tsara eo amin’ny fiainam-panahy. Eo anatrehan’izany ary, dia mila miroso any amin’ny fibebahana lalina kokoa isika izay ny vavaka no atao lahara-pamehana. Mila finoana arak’izany ny fandresena ny fanahy ratsy.

Finoana io no nangatahan’i Jesoa tamin’ity raim-pianakaviana mba ho fanasitranana sy famonjena ny zanany. Tsy misy tsy azo tokoa ho an’izay mino. Rehefa mino isika, dia miasa ao anatintsika sy miaraka amintsika Izy Andriamanitra.

Nampianatra an’ireto mpianany ary Jesoa fa misy ny karazana demony dia tsy roahina afa-tsy ny fivavahana sy ny fifandian-kanina ihany. Mila mivavaka mandrakariva ary arak’izany mba handresena ny fanahy ratsy. Ny vavaka mantsy dia fifandraisana akaiky amin’Andriamanitra ary tsy mahefa na inona na inona isika rehefa tsy miaraka aminy. Miaraka amin’izay dia ilaina ihany hoe ny fifadian-kanina raha te handresy ny ratsy. Araka ny voalazan’i Md Jean Chrysostome mantsy, dia ny fifadian-kanina no hery hahafahantsika mandresy ny fahavalo ara-panahy sy manafaka antsika amin’ny fangejan’ny fahotana mba ho tonga olona afaka.

Tompo ô, ampitomboy ny finoanay!