Alakamisy 6 aprily 2023 — Alakamisy Masina — Hariva — Didy vaovao no omeko anareo, hoy ny Tompo, dia izao: Mifankatiava ianareo, ary aoka ho toy ny nitiavako anareo no hifankatiavanareo — Evanjely Masina nosoratan’i Masindahy Joany (Jo. 13, 1-15)

Miditra amin’ny fankalazana ny hateloana masina amin’ny fanomanana akaiky ny fetin’ny Paka, na fetin’ny fanavotan’Andriamanitra isika anio. Mampiditra antsika tsikelikely amin’ny fijalian’i Jesoa ny tantara eto : efa tapakevitra ny hanatanteraka ny fikasan-dratsiny i Jodasy Iskariota ary efa fantatr’i Jesoa Kristy rahateo ny hanjo Azy.

Tsy mitantara ny famoronana ny Eokaristia i Masindahy Joany, evanjelista eto fa nosoloiny ny fanasana ny tongotry ny mpianany izany. Mifono hevitra lalina mahakasika ny Eokaristia izany ; izany hoe famantaram-pitiavana ho antsika ny Eokaristia. Famantaram-pitiavana satria nasehon’ny Zanak’Andriamanitra fa tonga hanompo ny hafa no antom-pisiany sy asa nanirahan’Andriamanitra Azy.

Milaza ny fahaiza-mandray ny hafa ihany koa no ao ambadik’izao fanasana tongotra izao. Midika izany fa vonona ny nanolo-tena mihitsy ny Zanak’Andriamanitra fa tsy hoe akory niharan’ny fanenjehana fotsiny avy amin’ny lohandohan’ny mpisoroana sy i Jodasy Iskariota mpianany. Ampirisihiny haka tahaka Azy isika amin’ny fahaiza-mandray ny hafa sy amin’ny fahavonoana ny hanompo azy ireo.