Alarobia 19 febroary 2020 — Herinandro fahenina mandavantaona — Evanjely Masina nosoratan'i Masindahy Marka 8, 22-26 — Izaho no fahazavan'izao tontolo izao, hoy ny Tompo; izay manaraka Ahy no hanana ny fahazavan'ny fiainana.

Manomboka miharihary ny maha Izy Azy an’i Kristy, ny maha Mesia Zanak’Andriamanitra Azy. Ireo mino sy mahatoky Azy eto no mitondra marary ary mangataka Aminy mba hanendry azy. Ny fanekeny hanasitrana ity jamba ity no maneho ny maha Izy Azy, tsy mihevitra afa-tsy ny hamonjy ireo mila vonjy. Tsy famonjena ara-batana fotsiny anefa fa fampianarana ihany koa ny misterin’ny Fanjakan’Andriamanitra, izany hoe: “ny fahatanterahan’ny fandaharan’Andriamanitra ao amin’i Kristy, Ilay manao ny asany amin’ny olona rehetra”.

Io dingana halalana marina an’i Kristy io no misongadina eto amin’ity fanasitranana an’ilay jamba ity, tantarain’i Md Marka anio ity. I Kristy izay tsy mpanasitrana na mpampiasa hery sy fahefana amin’ny marary fotsiny (Jo 9, 32), fa ilay Mesia andrasana (Mt 11, 5), Ilay avy amin’Andriamanitra (Jo 9, 33) ary fahazavan’izao tontolo izao, nanoro ny olona ny lalana mankamin’Andriamanitra.

Mila manatona an’i Kristy mandrakariva isika raha te hanatona Azy Andriamanitra, mila sitraniny amin’ireo aretim-panahy maro manakana antsika tsy hibanjina Azy, mila mandray Azy Fahazavana mba hampazava ny diantsika mizotra mankamin’Andriamanitra.

Jesoa ô, maro ny mahajamba anay eto an-tany ka misakana anay tsy ahitanao eo anivonay, maro ko ireo namana no hitanay fa jamba nohon’ny fitiavan-tena kanefa tsy sahinay entina eo anatrehanao. Koa meteza handalo ety aminay mba hanasitrana ny fonay ho afaka hitia Anao.