Alarobia 17 aogositra 2022 — Herinandro faharopolo mandavantaona — Asehoy ny mpanomponao ny tavanao, ary ampianaro ahy ny fitsarànao — Evanjely Masina nosoratan'i Masindahy Matio 20, 1-16

Fanoharana mahakasika an’ireo mpiasa nalefa tany an-tanim-boaloboka no tantarain’ny Evanjely anio. Ambaran’io fanoharana io fa be famindram-po sy fatra-pitia ny olombelona tsy ankanavaka Andriamanitra. Noraisiny avokoa ireo olona vonona ny hiara-miasa aminy ary nomeny valin-kasasarana mitovy avokoa.

Tsy fanajana ny rariny sy ny hitsiny izany hoy iretsy efa niasa taloha ; miangatra Andriamanitra hoy ireo vita batemy taloha satria mampitovy ny tsy mitovy izy. Fa iza marina moa no manaraka ny rariny sy ny hitsiny eto ?

Ilay mpampiasa izay nampitovy ny karaman’ny mpiasany na dia tsy niaraka nanomboka ny asa izy ireo sa ireo mpiasa efa niasa hatramin’ny ela izay nampitoviany karama tamin’ilay tonga tamin’ny 11 ora antoandro ?

Hampiova ny valim-panontiana izany raha toa ka hosolointsika hoe famonjena ilay karama azon’ireto mpiasa. Koa amin’izany sady fanomezana maimaim-poana ny famonjena no sady tsy misy voavonjy kely na voavonjy kokoa noho ny hafa. Ireto mpiasa velom-pialonana dia ireo mihevitra fa vokatry ny hasasarana irery ihany izay atao isan’andro ny famonjena ka izay mahavita an’izany ezaka lehibe ihany no manatombo. Hadino manomboka hatreo ny maha fanomezan’Andriamanitra ny famonjena.

Farany, ny hahavoavonjy ny olombelona rehetra no tian’Andriamanitra fa tsy antoko vitsivitsy fotsiny, koa raha zanany isika dia mila manana fivelaran-tsaina, fisokafan’ny fo, izany hoe ho faly amin’ny famonjen’Andriamanitra ny hafa izay samy zanak’Andriamanitra tahaka antsika ihany koa na inona na inona ny firazanany, na inona na inona ny toetrany.