Sabotsy 14 mey 2022 — Masindahy Matthias, Apôstôly — Izaho no nifidy anareo teo amin’izao tontolo izao, mba handehananareo sy hahavokaranareo ary haharetan’ny vokatrareo, hoy ny Tompo — Evanjely Masina nosoratan'i Mansindahy Joany 15, 9-17

Ry kristianina havana ; mankalaza an’i Masindahy Matiasy apostoly ny Eglizy isaky ny 14 mey. Ankatoavintsika amin’ny fiekem-pinoana fa apostolika ny Eglizy. Ny apostoly manko no vavolombelona nahita maso an’i Jesoa Kristy sy nametrahana tsy diso ny finoana mahavonjy. Fanampin’izany dia i Masindahy Matiasy no nisolo ny toeran’i Jodasy mpamadika mba ho roa ambin’ny folo hatrany ny apostoly. Tsy azo ovana manko izay naorin’ Andriamanitra.

Araka ny fomba fampianaran’i Masindahy Joany amin’ny Evanjely dia miseho amin’ny fitiavana ny finoana. Tsy maintsy tia izay mino. Izany fitiavana izany no hafatrafaran’i Jesoa ny mpianany eto. Fitiavana an’i Kristy no maha kristianina ny kristianina ary miseho amin’ny fitiava-namana izany. Izay fitiavana nitiavan’i Jesoa antsika no tonga fiainantsika ka ifankatiavantsika. Tsy maintsy atao fitsipi-piainana ny fitiavana.

Tohin’ny fitiavan’i Jesoa ny mpianany dia namborahany ny tsiambaratelony ; izay tia matoky. Tia i Jesoa ka niantso, nifidy ary naniraka am-pitokisana. Ny tohin’ny fitiavantsika an’i Jesoa kosa dia fanjakan’Andriamanitra. Izay no fampanantenan’i Jesoa : hahazo zato heny eto amin’ity fiainana ity ary hahazo ny fiainana mandrakizay any an-danitra. Ho mafy orina eo ambon’ny apostoly vatofototra anie ny finoantsika ary tsy ho levona anie ny fitiavantsika. Amen.