14 mey — I Matthias dia ilay mpianatra nofidiana hasolo an'i Jodasy, ho isan'ny apôstôly, ny Asan'ny Apôstôly 1, 15-26 no mitantara ny fomba nifidianana azy io, taorian'ny niakaran'i Jesoa tany an-danitra.

Tamin'izay dia efa niisa 120 teo ho eo ny isan'ny mpianatra nivory tao Jerosalema, tamin'izay i Piera no nitady izay hasolo an'i Jodasy ka nambarany ny fomba hifidianana azy, dia hoe : lehilahy mpiara-dia tamin'izy ireo nandritra ny andro nifaneraserana tamin'i Jesoa, tamin'ny andro nanaovana batemy azy ka hatramin'ny andro nanalana azy sy ny niakarany tany an-danitra, mba ho vavolombelon'ny fitsanganan'i Jesoa ho velona izay voafidy eo. Izao no voalaza momba an'io : "Nisy roalahy natokana hifidianana, dia i Josefa atao hoe Barsabasy, nampiana hoe : i Marina ; sy Matiasy. Ary nivavaka izy rehetra nanao hoe : Ianao no mahalala ny fon'ny olona rehetra tsy an-kanavaka ry Tompo, ka hasehoy izay nofidianao amin'izy roa lahy ireto. Dia nanaovana an-tsapaka izy roalahy ka voafidy i Matiasy, izy no nanampy ireo Apôstôly iraika ambin’ny folo lahy, ka nahafeno azy ho roa ambin’ny folo". Mpiaro an'ireo mpiala amin'ny fisotroan-taoka, hono, i Matthias.