Zoma 31 janoary 2020 — Herinandro fahatelo mandavantaona — Evanjely Masina nosoratan'i Masindahy Marka 4, 26-34 — Misaotra Anao Aho, ry Raiko, Tompon'ny lanitra sy ny tany, fa nambaranao tamin'ny madinika ny tsiambaratelon'ny Fanjakanao.
Fanoharana roa samy hafa nefa iray ihany no entin'i Jesoa hanambarana ny Fanjakan'Andriamanitra. Voalohany, ohariny amin'ny asan'ny mpamboly, mamafy ny voa amin'ny tanim-boly. Ny voa eto no Fanjakan'Andriamanitra, kendrena hamokatra ao am-pon'ny olombelona. Ny mpamafy dia i Jesoa. Izay nafafin'Andriamanitra ao am-pontsika dia tokony hitombo tsikelikely ary hamoa be. Ao am-pontsika olombelona no Fanjakan'Andriamanitra, miara-monina amintsika Izy raha misokatra ho azy ny fontsika. Izy no mampahavokatra izay rehetra nafafiny, isika kosa ho tany lonaka hanala ireo rehetra mety hiteraka ny haitany ao am-pontsika ka hahatonga azy ho efitra tsy handray ny sitrapon'Andriamanitra.
Faharoa, dia noharin'i Jesoa amin'ny fitomboan'ny voantsinapy ny Fanjakan'Andriamanitra, kely kanefa rehefa nafafy ka nitombo sy nihalehibe dia tonga toerana mamelombelon'aina ho an'ny manodidina azy. Ilay voa nafafy ao am-pontsika olombelona, ny Fanjakan'Andriamanitra, tsy natao ho an'ny tena ihany fa ivelomana indrindra ihany koa ho an'ny hafa; mba hahita fitsaharana noho ny fiveloman'ny tsirairay ny finoana ny hafa mpiara-belona amintsika. Izany no Fanjakan'Andriamanitra: tsy mialon-jafy ary tsy mizaha tavan'olona.
