Alatsinainy 17 janoary 2022 — Herinandro faharoa mandavantaona — Misaotra Anao Aho, ry Ray, Tompon’ny lanitra sy ny tany, fa nambaranao tamin’ny madinika ny tsiambaratelon’ny fanjakanao — Evanjely Masina nosoratan'i Masindahy  Marka 2, 18-22

Fanontaniana naka endrika tsikera no nisy nametraka tamin’i Jesoa mahakasika ny tsy fifadian-kanina ataon’ireo mpianany. Mazava ny navalin’i Jesoa fa miala eo amin’izy ireo ny mpampakatra, ka amin’izay vao hifady hanina izy ireo.

Ny Mpampakatra tiany ho teneniny eto dia Izy tenany ihany, i Jesoa Kristy. Raha mbola eo anivontsika tokoa mantsy Izy, dia tokony hafaliana mandrakariva no hanenika ny fiainantsika. Miara-mifaly aminy, noho izany tsy ilaina ny mifady hanina. Ohatra fotsiny, rehefa tonga ny Noely, fankalazana ny fahatongavan’i Jesoa ho nofo izay vao avy nodiavintsika teo, ny Eglizy dia mamporisika antsika ary handray izany an-kafaliana.

Ankilan’izay anefa, dia misy ny andro izay hanesorana ny mpampakatra eto anivontsika, dia ny Zoma Masina izany. Io no hamporisihan’ny Eglizy antsika izay mpianatr’i Kristy ny hifadiana hanina. Tsaroantsika fa Izy Jesoa mihitsy no niaina an’io fifadian-kanina io voalohany nandritry ny 40 andro rehefa nalain’ny demony fanahy tany an’efitra Izy.

Ry kristianina havana, aoka ary mba am-pitiavana tokoa no hanatanterahantsika ny fifadian-kanina izay entintsika miady amin’ny fahotana miaraka amin’ny vavaka. Mifady hanina isika mba ho fitiavana an’Andriamanitra sy ny namana ary koa nampianatra antsika amin’ny famolahan-tena sy mba hanana fo vaovao.