Ny didy aman-dalàna sy ny didin'Andriamanitra no fototra handrafetana ny fitsipika hifampitondra eo amin'ny samy mpiara-belona. Misy amin'ireo lalàna noheverina handrindràna ny fiaraha-monina no tsy mipaka any amin'ny tontolo ambanivohitra, izany hoe tsy ampy ny fahampahafantarana azy ireny. Na nisy aza ny fivoriana nataon'ireo andrim-panjakana mpanao lalàna dia tsy misy fampahafantarana izay lalàna niadian-kevitra sy izay mety ho fampiharana izany.

Ny lalàna dia natao hanafaka antsika, natao haolomarina sy olon'afaka anefa ny mifanohitra amin'izany no misy ankehitriny satria ny vola sy ny fahefana no mibaiko. Ny Eglizy dia miantso ny tompon'andraikitra isan-tsokajiny amin'ny fanentanana sy ny fampahalalana ny lalàna rehetra misy, ary koa ny fampiharana ny lalàna araka ny fahamarinana.