Ankehitriny dia betsaka ny zavatra manahirana ny olona ka manosika azy ireny hitady sy hila famonjena. Ny fady dia mifamatotra amin'ny lafim-piainan'ny malagasy, ary mifamatotra amin'ny fiainan'ny kristiana sy ny tanora izay samy mitady sy miandrandra fiadanana sy famonjena. Ny fiangonana anefa metetika no mirona manatsatso sy manameloka ireny fomba amam-panao sy fady ireny ho fomba mahadiso na mandika ireny ho finoanoam-poana. Ny fady dia zavatra na olona tsy azo tononina anarana na tsy kasihana ary tsy azo atao.
Ny fady sy ny fomba amam-panao dia hadikan'ireo mpitondra fivavahana sasany ho finoana avy amin'ny devoly ; ireo manampahaizana tandrefana ihany koa dia milaza fa fomba misakana ny fampandrosoana ireny. Hoy itompokolahy P. Adolph : tsy omena tsiny akory ireo misiônera nihevitra izany tamin'ny fitandroana ny amin'ny finoana kristiana. Ankehitriny dia tsy azo atao "safo be mantsina" ny mikasika ny fady fa tsy maintsy dinihana ny fanatanterahana ny fady. Misy antony hatrany ireny fady ireny ary tokony ho fantarina ny loharanony, inona no vokany amin'ny lafiny ara-piaraha-monina sy ara-pinoana.
