Ireo Lahika no tompon’antoka voalohany amin’ny fampivoarana sy fampandrosoana ny firenena. Koa ilaina ny firotsahan’ny olona tsirairay, indrindra isika kristianina, na iza na iza, mba hifarimbona sy hifanasoa ary hifanome tanana. Hentitra ny fampianaran’ny Fiangonana momba io fampandrosoana sy ny fivoarana ary ny fiadanana sy fandriampahalemana io. Tsy ireo mpitondra ao amin’ny Fiangonana sy ny Firenena irery akory no tena ifaharan’izany fa ny olona tsirairay avy, izay samy manana ny andraikiny avy, ka samy manao izay ho afany am-pahatsorana sy am-pitiavana.

Noho izany, mila fanabeazana sy famolavolana ny toe-po amam-panahy, ny foto-pisainana sy ny fitondran-tena, hamongorana ny ratsy isankarazany, indrindra ny kolikoly sy ny fangalarana amin’ny fomba maro samihafa. Tsy mety raha ny vola no atao loha-laharana, fa fanompoantsampy izany, fa ny fitandrovana ny AINA sy ny Fihavanana ary ny Fiombonana no tsy maintsy omentsika ny fizokiana sy tombony bebe kokoa hatrany. Koa alao hery àry ry mpiray Firenena fa "izay be no basy" ary "ny akanga maro tsy vakin’amboa", satria ny asa no mamelona sy mamorona ireo vakoka sy harena isankarazany, sady "ny firaisan-kina no hery" afaka miantoka ny tena fampandrosoana fa tsy ny vola velively izay matetika no toa ratsy tantana...