Alahady 10 oktobra 2021 — Alahady fahavalo amby roapolo mandavantaona — Hataoko hoe sakaiza ianareo, hoy ny Tompo, satria efa nambarako taminareo avokoa izay rehetra reko tamin’ny Raiko — Evanjely Masina nosoratan'i Masindahy Marka 10, 17-27

Manampy antsika hamaly ilay fanontaniana manitikitika ny fo amam-panahintsika efa hatramin’izay ny Evanjely izay vao avy novakiana tamintsika teo : Ahoana ny fomba hahazoantsika ny fiainana mandrakizay ? Inona avy ireo làlana mila harahina raha te hahazo an’izany isika ? Raha ny fiainana mandrakizay àry no katsahintsika, ahoana ny fomba hampifanarahantsika ny fikatsahana ny hahasoa ny fiainantsika amin’ny alalan’ny fitadiavana harena sy ny fanarahantsika an’i Jesoa Kristy ?

Làlana telo no atoron’i Jesoa Kristy antsika ka ny voalohany amin’izany dia ny fanatanterahana ny didin’Andriamanitra, ka ireo didy mahakasika ny fahaiza-miara-monina no antitranterina anio : "aza mangalatra, aza mamono olona, aza mijangajanga...". Ohatran’ny hoe te hilaza amintsika toy izao i Kristy : "Raha te hahazo ny fiainana mandrakizay ianao, raha te ho sambatra araka ny sitrapon’Andriamanitra ianao : mahaiza miara-monina amin’ny hafa !".

Manaraka izany, mila manaraka an’i Kristy isika ka amin’ny alalan’ny fanahafana azy no antoka hahazoantsika ny fiainana mandrakizay. Ny tsy fifikirana amin’ny haren’ny tany ary ny fampiasana ireo haren’ny tany ho fitaovana hahafahana hanampiana ny sahirana ihany koa, mba hahafahan’izy ireo hioitra eo amin’ny fiainana no endrika isehoan’izany fanahafana an’i Kristy izany.

Farany tsy afaka hahazo ny fiainana mandrakizay velively isika raha tsy manome ny fahasoavany Izy Tompo, satria io fahasoavana io indrindra no ahafahantsika hahay hiara-monina amin’ny hafa sy ho vonona hizara ny manta sy ny masaka amin’ireo olona sahirana eo akaikintsika.