Talata 13 avrily 2021 — Herinandro faharoa fankalazana ny Paka — Raha niara-nitsangana tamin’i Kristy ianareo, dia ny zavatra any ambony amin’izay itoeran’i Kristy eo ankavanan’Andriamanitra no katsaho — Evanjely Masina nosoratan'i Masindahy Joany 3, 7-15

Dia ny resaka ifanaovan’i Jesoa amin’i Nikôdema ihany no Evanjely naroson’ny Fiangonana ho sakafom-panahintsika anio. I Jesoa no Lalana sy Fahamarina ary Fiainana. Tsy misy afaka makany amin’ny Ray raha tsy amin’ny alalany. Izy irery ihany no afaka manambara amintsika ny momba ny Lanitra. Isika moa avy amin’ny tany ihany ka ny momba ny eto an-tany no fatatsika sy takatry ny saintsika. Kanefa indro fa noborahany amintsika ny momba ny Fanjakan’ny Lanitra satria Izy irery ihany no avy any an-danitra nidina tety an-tany.

Noho izany ezahantsika ifikirana ny marina ambarany, ny Teniny satria teny feno ny fahamarinana sy ny fiainana. Ny finoana dia ny fifikirana sy firaiketana amin’izay ambarany satria marina mandrakariva, azo itokisana tanteraka ka hanana ny fiainana mandrakizay. Na i Nikôdema, manam-pahaizana sy mpampianatra tao amin’i Israely aza tsy nahazo ny tenin’i Jesoa hoe : “tsy maintsy ateraka indray ny olona vao mahazo miditra ny Fanjakan’ny Lanitra” araka ny Evanjely nohenointsika omaly.

Tsy isika akory ny mahalala noho ny hafa ny momba ny Fanjakan’ny Lanitra na momba ny lanitra. Misy ireo matoky tena ho tafiditra any an-danitra kanefa ny tongony aza tsy miditra eo an-tokonam-baravaram-piangonana akory. Misy ireo mahafoy ny haren’ny tany, mandany mondrokely mba ahazoana ny fiainana any an-danitra. I Jesoa ihany no mampiditra antsika amin’ny tontolo misy an’Andriamanitra, dia ny Fankan’Andriamanitra. Ny olona tso-po, ny olona mahay manetry tena no ho tonga miaraka amin’i Jesoa any amin’ny Fanjakan’ny Lanitra. Ho azy ireo, ny Lanitra no Fanjakany, tanjon’ny fiainany, ny Lanitra no katsahiny na dia mbola eto an-tany aza izy ; koa fitaovana entiny mikatsaka ny Lanitra ireo harena eto an-tany eo am-pelatanany.

Mankalaza ny Paka isika miaraka amin’i Jesoa nandresy ny fahafatesana sy nitsangan-ko velona, io no fototra iorenan’ny finoantsika ary mitondra antsika mizotra mankany an-danitra tanindrazantsika. Koa vanim-potoana hanamafisana ny finoana izao. Ny finoana izay aina mamelona antsika sy hery entintsika miasa isan’andro. Amen !