Talata 01 septambra 2020 — Herinandro faha-22 mandavantaona — Evanjely Masina nosoratan'i Masindahy Lioka  4, 31-37 — Raha misy tia Ahy, dia hitandrina ny teniko izy; ka ho tian’ny Raiko ary hankao aminy izahay ka honina ao aminy.

Hitantsika omaly àry fa ny asa voalohany nanirahan’ny Ray an’i Jesoa Zanany dia ny fitoriana ny tenin’Andriamanitra izany hoe ny Vaovao Mahafaly. Ary mbola tohizin’ny Eglizy izany ankehitriny. Ka ny fanasitranana sy ny fandroahana fanahy maloto nataony dia fanatanterahana ilay Vaovao Mahafaly toriany. Mahafaly ny olona satria afaka amin’ny fanandevozan’ny aretina sy ny fanahy ratsy. Misy hery tokoa ny tenin’i Jesoa satria mitondra ny olona makeny amin’ny tena fahafahana.

Eto àry i Jesoa dia mampianatra tao amin’ny sinagoga tamin’ny andro sabata ary tojo lehilahy iray azon’ny fanahy maloto. Ity farany izay niaiky fa i Jesoa no Masin’Andriamanitra. Anisan’ny fanatanterahana ny Vaovao Mahafaly torian’i Jesoa ny fandrohana fanahy maloto ka dia nandidy azy ireo hiala amin’ity lehilahy ity Izy. Tena Vaovao Mahafaly ho antsika ihany koa izany satria mampiseho ny faharesen’ny fanahy ratsy sy hoe i Jesoa dia mandresy foana. Eo amin’ny fiainantsika àry, dia betsaka ny fakam-panahy, ary mila miantso ny anaran’i Jesoa mpandresy ny ratsy isika ahafahantsika mandresy ihany koa.

Ny vavaka àry, araka izany, no fitaovana mahomby indrindra hahafahantsika mandresy ny ratsy : vavaka feno fahatokisana an’Andriamanitra sy feno fanetren-tena. Io no lalam-pahasoavana sy lalam-pibebahana makany amin’ny fandresena. Aoka àry ho tanteraka ao amin’ny fiainantsika ilay vavaka nampianarin’ny Tompo manao hoe : "Aza avela ho azo ny fitaoman’ny ratsy izahay".