10 desambra 2024 — Talata, Herinandro faharoa amin'ny Fiavian'ny Tompo— Indro avy ny Mpanjaka, Tompon’ny tany, ary Izy no hanafaka antsika amin’ny jiogam-panandevozana — Evanjely Masina nosoratan’i Masindahy Matio (Mt 18, 12-14)

Fanoharana maneho ny endrik’Andriamanitra tompon’andraikitra no aroson’ny Fiangonana ho sakafom-panahintsika anio. Asaina isika haka tahaka an’Andriamanitra tsy mahalala hakiviana sy harerahana amin’ny fitadiavana ireo ondry very sy nania. Asaina hijery akaiky ireo madinika indrindra, mijaly indrindra, ireo mpioko sy tia manaraka ny làlana tsy alehan’ny besinimaro, fa te hanandrakandrana e!

Manasa antsika hahita hafaliana lalina manoloana ny fiverenan’ireo mpiray Fiangonana amintsika, na ny iray trano amintsika, na koa havantsika amin’ny fiombonana amin’Andriamanitra sy amin’ny fiaraha-monina ihany koa ity fanoharana ity. Lazainy fa faly aoka izany ity mpiandry ondry rehefa nahita ny ondriny, nahita ny fiveranany. Noho izany, toe-tsaina roa no angatahana hiainantsika eto: mitady ny very ary mifaly rehefa mahita azy; faly rehefa mahita azy tafaverina amin’ny namany, ao amin’ny fianakaviantsika.