Zoma 10 aprily 2020 — Zoma Masina — Fijalian'i Jesoa Kristy Tompontsika nosoratan'i Masindahy Joany 18, 1-40 ; 19, 1-42 — Nanolo-tena hanaiky hatramin'ny fahafatesana ho antsika i Kristy, dia fahafatesana tamin'ny Hazofijaliana. Ho valin'izany kosa, dia nasandratr'Andriamanitra ambony indrindra Izy, ary nomeny Anarana mihoatra ny anarana rehetra.
Andro lehibe androany, satria nahataperan'ny ain'i Jesoa Andriamanitra. Isika mianakavy dia manaporofo ilay fitiavan'i Jesoa nanolorany ny tenany teo ambony hazofijaliana. Tsy mba angano, na arira no nifampizaran'ny Fiangonana amintsika mianakavy, fa Izy Andriamanitra mihitsy no nahafoy ny ainy noho ny fitiavany antsika. Tanteraka ny zavatra rehetra, hoy Izy, dia nanondrika ny lohany izy.
Ho ahy, ho anao no antony nifantsihan'i Jesoa Kristy teo ambony hazofijaliana noho ny fitiavany, noho ny hamoram-pony. Isika matetika eny amin'ny fiainantsika andavanandro, rehefa sendra ny zavatra manahirana, na tojo ny zavatra sarotra dia mimenomenona ary indraindray àry toa manome tsiny an'Andriamanitra, toa tsy mahazaka ilay mba anjara hazofijaliantsika.
Alao hery àry, akambano amin'ny hazofijalian'i Kristy ny hazofijaliantsika tsirairay avy dia ho maivana satria ny entan-jaray mora zaka ary ny fiainantsika miaraka amin'izy Andriamanitra Ray dia tsy maintsy misy vahaolana mandrakariva raha sendra ny olana saro-bahana isika tsirairay avy. Ampio izahay, ry Jesoa, mba hatoky ilay fitiavanao. Ary enga anie izahay, mba hahazaka ny anjara hazofijalianay eo amin'ny fiainanay. Amen.
