22 septambra 2024 — Alahady Tsotra fahadimy amby roapolo Mandavantaona — Ny ondriko mihaino ny feoko, hoy ny Tompo; Izaho mahalala azy, ary izy manaraka Ahy — Evanjely Masina nosoratan’i Masindahy Marka (Mk. 9, 29-36)

Manambara fanindroany ny fomba hijaliany i Jesoa Kristy, sady manambara Izy no mampianatra ihany koa. Tsy azon’ireto mpianatra izany ary natahotra ny hanontany Azy ihany koa izy ireo. Zavatra mifanipaka aza no nandanian’izy ny dia, ady hevitra mahakasika hoe iza no voalohany amin’izy ireo. Toetra matetika asehon’ny mpianantra avokoa izany rehetra izany: tsy mahazo, tahotra ny hanontany, manao zavatra hafa mandritra ny fampianarana.

Mahagaga anefa fa tsy namerina ny fanavazana nataony teo aloha i Jesoa fa nampianatra an’ireo mpianany ny hevitra fonosin’ny hoe “voalohany” amin’ny maha-mpianany. Voalohany ireo vonona ary faly ny hanompo ny hafa; voalohany ireo izany miaina ny fanetren-tena. Ambaran’i Jesoa ankarihary eto fa ny fahefana ananan’ny voalohany dia asehony amin’ny alalan’ny toetsaim-panompoana mandrakariva toy ny nataony rehefa nanasa ny tongotry ny mpianany Izy ny alakamisy masina. Mibaribary ny fahambonian’ny voalohany, izany hoe ireo manana andraikitra ambony ao amin’ny Fiangonana sy eo amin’ny firenena rehefa mitsinjo sy manompo am-pitiavana ireo madinika indrindra, ireo voailikiliky ny fiaraha-monina izy ireo. Izy ireo mantsy no ankizy madinika noraisin’i Jesoa, napetrany teo afovon’ny rehetra ary nofihininy.